3月份好評餐廳十強
2020-04-03

3月上榜嘅有唔少都係星馬日台菜式嘅餐廳,可能大家呢排都冇得飛,惟有搵地道嘅餐廳去食住止一止癮先。另外,亦有啲新開冇耐嘅小店,強勢入圍,值得鼓掌啊。

第10位  肉骨皇(*新上榜)

 圖:mylittlegourmandiris2002208

想食馬來西亞同新加坡嘅肉骨茶,可以去大坑會一會。呢間嘅肉骨茶色澤深,藥材味香,濃中帶甜,豬肉仲好腍身添,配埋米粉同油炸鬼就最夾。如果飲晒唔夠喉仲可以免費添湯。

第9位  素年(*新上榜)

 圖:SAlytSnappyinHK

素食文化愈嚟愈多元化,呢間餐廳主力提供日式同西式嘅素食,部分蛋奶素菜式仲可以轉做全素或者走五辛,素食人士嘅選擇都可以好豐富!大力推介素漢堡,塊肉係以Impossible™ Meat植物牛肉製作,口感同真牛肉幾似,一樣juicy。

第8位  茶聊   

 圖:tabosukileesinsin

鬆軟到會彈彈下嘅梳乎厘就梗係治癒,但更多人應該會係為咗塊百潔布嚟!講緊嘅係呢份造型似到十足嘅百潔布蛋糕,原來係檸檬芝士蛋糕,酸酸地幾清新,口感軟滑,有外表又有內涵,唔怪得咁受歡迎。

訂座優惠:獲送梳乎厘乙個(價值$88) (只限消費滿$300)

第7位  Bellevue Bar and Grill(*新上榜)  

 圖:識食小姐jennyk1523

牛魔王要搵肉食,呢間設有熟成肉櫃嘅餐廳當然係名單之內,由前星級酒店行政總廚主理,質素有保證。無論係美國特級安格斯肉眼扒定係碳燒西冷牛扒,叫五成熟就啱啱好,啖啖肉香仲有肉汁。甜品推介伯爵茶朱古力撻,甜中帶茶香。

第6位  馬祖台灣養生湯麵館(*新上榜)

 圖:kwannicolelai貓豬豬

新開冇耐就可以上榜嘅呢間火鍋店,一人一鍋,晚巿仲做埋90分鐘火鍋放題,完全解決晒一班火鍋控想打邊爐但又怕同人同煲嘅煩惱。9款湯底選擇包括有麻辣、蕃茄、椰子等等,特別推介係藥膳蟲草花桃膠雞湯,滋潤養生呀,牛肉仲要有高級嘅Prime Grade揀!

第5位  Check-In Taipei   

 圖:lankiman6330Voracious

呢間台式餐廳幾時都咁受歡迎,蛋餡餡料多多,又有新意,最受歡迎嗰款肯定係髒髒紫薯麻糬蛋餅,個樣又靚,食落又啖啖紫薯蓉香,仲有煙韌麻糬,口感豐富。正餐叫多款溏心蛋滷肉飯,滿滿油香,隻蛋更加係bonus。

第4位  Homeland(*新上榜)

 圖:karccyoyo454

最近先新開嘅餐廳,仲可以短時間內衝上十強榜,靠嘅係店主嘅心機同誠意。小店主打每日新鮮製造嘅手打意粉、手工薄餅等,特別推介墨汁烏冬,鮮爽彈牙,樣樣都係手工嘢,深得大埔街坊支持呀。

第3位  十和田總本店

 圖:LiLingWongWincyholic

冇得飛日本係會特別想食日本嘢,呢度由資深日籍壽司師傅主理,食材每日由日本空運到港,壽司選用赤醋飯,味道微酸亦更香醇。壽司以外最受歡迎嘅應該係三色丼,細細碗但三碗都勁吸引,海膽啦、蟹膏蟹肉啦,仲有吞拿魚蓉。

第2位  花斑茶社(*新上榜)

 圖:foodiettFoodjiwara_or

呢間茶飲店嘅茶底,採用嚟自台灣南投嘅茶葉,茶味更香濃突出,主力賣黑糖珍珠、鮮奶茶同果茶等。珍奶控揀黑糖珍珠厚鮮奶就實冇錯,勁多珍珠呢,有成三分一杯咁多,甜甜地好有咬口。白桃烏龍亦係推介,仲有絲絲桃肉食到!

第1位  Wagyu Ya (*新上榜)

 圖:vvny覓食小姐

榜首位置由今年年頭先開嘅燒肉店奪得,主打JA鹿兒島直送和牛,牛肉拼盤有齊牛舌、牛小排、牛三角、西冷等唔同國家同部位嘅肉,牛舌厚切薄切都有,咩口感都食到!牛魔王不能不試。呢度仲有大熱吉列和牛三文治啊,外脆內嫩,加埋海膽嘅話真係滿分。


文:Kar

Keyword
十強名單
好評十強
報榜
牛肉
火鍋
尖沙咀
大埔
大坑
旺角
開飯專題
開飯仔為你提供各類型最新飲食情報及優惠,全面照顧你的飲食喜好。
Restaurant Info
Show More
Show Less
Monthly chart
The Results of OpenRice Best Restaurant Awards 2020
6 Days Ago
OpenRice Best Restaurant Awards 2020 - Prestigious Awards Goes to Mamaday
6 Days Ago