講到泰國地道風味麵食，點少得一碗熱辣辣、香氣四溢嘅船麵～今次就同大家嚴選一系列必試船麵，讓你無論身處邊區，都可以搵到屬於你心中嘅最強船麵！
新派泰式麵吧 Mama Tiger Noodles
圖：Nova.C
呢間新派泰式麵吧嚟自曼谷、由經驗豐富嘅主廚Thanit Changchai主理，位置便利，裝修有活力，就好似去咗曼谷街頭咁。招牌Wagyu Boat Noodles湯底濃香有層次，入面有兩大塊入口即融嘅和牛片、牛腩同勁彈牛丸，加埋清爽嘅蒟蒻麵，口感豐富又唔會太飽滯，絕對係中環上班族或者週末覓食好選擇！
正宗牛頸脊船粉 Soi Eat Thai Cuisine 
圖：長沙灣一帶人氣泰菜店，主打嘅正宗泰式牛頸脊船粉絕對值得一試。湯底用秘製豬骨長時間熬煮，味道香濃但完全唔油膩，飲落有層次感。牛頸脊切得夠薄，上枱時仲帶輕微粉紅色，浸熱湯後「熟成」，口感軟腍又唔會欠嚼勁。你仲可以自選麵底，分別有米粉、金邊粉同蛋麵，米粉爽滑最吸湯；金邊粉就偏厚身啲，質地彈牙；蛋麵偏幼身少少，有蛋香味，掛湯力唔錯，再加上脆卜卜嘅豬皮，成碗麵由湯到底、由麵到底料都照顧到口感同風味，食完真係會想再encore！
招牌昭拍耶船麵 KOK KOK
圖：元朗泰式小店，由泰國廚師親自主理。招牌昭拍耶船麵湯底以麵豉加上豬骨湯煲製，味道濃郁，帶少少甜香，唔會有強烈草藥味，令到味道更易入口，啱晒唔太習慣濃重香料嘅人。配料方面好足料，有豬肉丸、肉片、芽菜同雞肉，仲有最惹味嘅炸豬皮，唔會浸到淋晒，咬落依然卜卜脆，仲吸滿湯汁夠晒香，真係令人食到停唔到口。麵底用上泰式河粉，掛湯力強，質感煙韌。
泰式和牛船麵 泰仔
圖：Vanho901
尖沙咀新開嘅泰國餐廳，環境企理，假日嚟都唔算迫人，幾啱慢慢chill住食。泰式船麵和牛金邊粉分量十足，選用金邊粉做麵底，幼身彈牙又超索湯，每啖都吸盡湯底精華。湯底方面，係用豬骨加香料慢熬而成，味道濃郁又夠晒香，單係聞已經令人食慾大開。配料方面，和牛片嫩滑入味，肉丸爽彈有口感，整體層次豐富，非常出色。
文：Yanica
編：Cathy
