相信冇人唔鍾意掃街，話晒一次過掃唔同Comfort Food人都開心啲～今次掃街篇更新到尖沙咀，原來有好多卧虎藏龍嘅掃街美食！
目錄
尖沙咀篇
創意港式小食 餓媽家姐
圖：食得好123
呢間小店真係充滿驚喜～全部都係自家創作嘅特色小食，最出名嘅炸燒賣仲上過「香港燒賣關注組」，人氣超高！燒賣可以揀蒸或者炸，配自家製醬汁平衡鹹香啱啱好。仲有創意十足嘅芝士白汁三文魚腸粉，白汁好重奶香但唔膩。想食得重口味啲，就試下XO醬牛肉炒腸粉或者鹹蛋黃炸燒賣。最後再配返杯荔枝蝶豆花梳打，顏色夢幻又清新，完美收尾～
菲律賓過江龍惹味薯條 Potato Corner
圖：呢間菲律賓過江龍炸薯店真係邪惡得嚟又好食～無論薯條、薯格、薯粒定係蕃薯條都係即叫即炸，熱辣辣放入筒加粉Shake，一打開個蓋已經香到爆！經典酸忌廉洋蔥同芝士味最受歡迎，仲有辣味、BBQ味可以自由配搭。薯粒外脆內軟之餘，蕃薯條就甜中帶辣，出奇地夾～分量方面有唔同size揀，一個人食定同朋友share都好啱。
超多口味雞蛋仔 醉香小食雞蛋仔
圖：主打各式各樣創意雞蛋仔同格仔餅，口味多到選擇困難症發作～最受歡迎嘅有抹茶朱古力麻糬雞蛋仔，外層金黃香脆，入面軟糯拉絲!! 鍾意新口味嘅朋友可以試吓開心果脆醬格仔餅，一打開已經聞到開心果香味，好邪惡但好療癒～而且老闆娘超親切，行行吓街想歎返個甜品，呢度絕對係補充能量嘅最佳選擇！
招牌白魚蛋 林昌記 藍哥
圖：掃街主意
第一次嚟一定要試佢嘅白魚蛋，魚肉比例啱啱好，彈牙爽滑又重魚香，最重要完全冇腥味!! 就算平時唔太食魚嘅人都話好食。如果食得辣，記得一定要加佢秘製辣汁，辣得嚟又唔會蓋過魚味，愈食愈上癮。除咗白魚蛋，炸金蛋同咖喱魚蛋都好受歡迎～雖然只係細細間外賣舖，但離遠都聞到香味，行過忍唔住要買返串呀！
少見既牛雜脆骨 牛雜天王
圖：牛雜種類特別多，除咗常見嘅牛腩、牛肚、大腸、小腸，仲有少見嘅牛脆骨同牛骨髓，食落幾驚喜。每件牛雜都都入晒味，店家會預先剪好，再用熱湯灼一灼上碗。而湯底係另一個亮點，香濃帶微辣有啲似胡椒豬肚湯咁，蘿蔔又吸晒熱湯，好啱秋冬飲落暖笠笠。想食飽啲可以加碗白飯或者試埋佢哋嘅招牌全餐，牛雜、牛丸、魚蛋樣樣有，再加樽裝奶茶真係港式風味滿分！
沙田石門篇
多款特色Crepe NANALAND CREPE
圖：pigpick
主打各款可麗餅同麻糬甜品，價錢親民，款式選擇多。招牌芋泥麻糬可麗餅啖啖芋香，質感綿密細膩，配上煙韌麻糬，甜度適中，食到最後一啖都仲好足料；Tiramisu可麗餅就好似將成杯Tiramisu包入餅皮，入口有濃郁mascarpone、咖啡手指餅同脆脆配料，層次感十足；香蕉朱古力榛子醬可麗餅同樣受歡迎，香甜嘅香蕉配上濃厚榛子醬同朱古力，滿滿幸福感～另外仲有抹茶沾醬麻糬，外層柔軟煙韌，配埋濃厚茶香嘅抹茶醬，抹茶控必食！
地道荊州小食 盔匠
圖：幾特別嘅小店，主打荊州「鍋盔」，有啲似內地嘅燒餅，香港真係唔多見。麵糰每日新鮮製作，落單後即場桿薄，加滿芝麻，再放入高溫烤爐，成個過程睇住都好治癒。口味選擇幾多，有羊肉、牛肉、咖喱雞、紅糖豆沙等等，其中羊肉鍋盔最受歡迎，外皮香脆，內餡帶濃郁孜然香，熱辣辣食特別正！韭菜肉餅就用料實在，七成韭菜三成碎肉，鹹香有肉汁又唔覺肥膩，好啱香港人口味。除咗鍋盔，仲有水果冰乳酪，口味多達八、九款，芒果同冧酒提子特別受歡迎，清爽解膩；冬天仲可以試埋古法烤番薯，甜蜜軟糯暖笠笠。價錢親民，分量足料，嚟石門掃街一定要排入list。
必試招牌芋圓+豆花 豆腐巴克
圖：momuji
石門其中一間人氣小店，以芋圓同炸物最出名，必試嘅一口炸芋圓係將三色芋圓炸到外脆內煙韌，一啖一粒好容易入口，沾上煉奶甜甜哋更加邪惡，好食到停唔到口！另一款招牌芋圓4號，以黑糖配豆腐花、芋泥、仙草同花奶，豆腐花滑溜，芋泥綿密，仙草爽口，加埋煙韌芋圓口感超豐富。除咗甜品，炸燒賣都係驚喜，外脆內軟糯，點埋蜜糖芥末醬鹹甜交錯；午市仲有供應雲吞，用蟲草花豬骨湯做底，湯頭清香唔膩，雲吞飽滿足料～
炸拉絲芝士條 壹心芝脆小食
圖：店內主打炸物小食、輕食同主食，選擇多到眼花繚亂！必食推薦拉絲芝士條，濃濃芝士味一咬就爆晒出嚟，滿足感十足；雞軟骨炸得外脆內爽，加埋香料粉更加停唔到口～芝士薯條同蜜汁拼盤都係人氣之選，鹹香同甜蜜滋味一次過滿足。除咗炸物，小店仲有驚喜熱食，例如白汁蘑菇海鮮炒意粉分量勁多，配料多到啖啖有蜆肉、魷魚粒同煙肉，價錢仲要超親民；白汁碎蛋牛角包清爽唔膩，早餐或者下午茶都啱食。
足料韓國小食 壹韓台
圖：主打韓式小食同飯卷，快靚正又抵食。飯卷選擇好多，由傳統到新派口味都有。傳統韓式飯卷餡料足，青瓜絲、蛋絲、火腿同蘿蔔絲係經典而簡單嘅配搭，$36就有一大條，飽肚又好味；而新出嘅吞拿魚蛋黃醬飯卷更加誘人，紫菜外層塗滿麻油同芝麻，裡面塞滿吞拿魚、蛋絲同蔬菜，八成以上都係餡料，口感豐富，仲帶點香濃蛋黃醬味，食完好滿足。除咗飯卷，泡菜豬腩片烏冬酸辣開胃，豬腩片煮得腍滑，同彈牙嘅烏冬一齊食層次感十足；牛小排餃子亦好有驚喜，皮薄多汁，一咬即爆肉汁，真係好滋味。
元朗篇
超人氣炸壽司 朗屏壽司阿姨
圖：安婕婕
超人氣小食店，由宵夜檔起家，阿姨年中無休、親力親為，就算搬咗舖都依然人氣高企！招牌炸壽司係必試之選，糯米炸到外脆內煙韌，咬落去香口又滿足，有10件或12件裝，唔怕熱氣嘅話真係會一食上癮，加多啲椒鹽仲更惹味。除咗炸壽司，都好推介炸大腸、炸帶子同韭菜花串燒，韭菜花嫩得嚟冇渣唔韌，好驚喜～如果唔想食炸嘢，炒麵都係唔錯嘅選擇，自由揀麵底配上秘製醬汁，再配杯阿姨自家煲嘅羅漢果菊花茶，清熱解膩又有住家feel～
手工生煎包 賀苗記包點
圖：如果你係生煎包控，嚟到元朗就絕對唔可以錯過呢間包點專門店，生意好到假日都經常現人龍㗎～生煎包係鎮店之寶，價錢親民，包身唔大但絕對足料，外皮煎到金黃脆卜卜，唔會過油，外皮厚薄適中，入面啖啖肉餡，口感實淨又多汁，食落非常鮮味又唔會太重味精感。仲有鍋貼同菜肉包都好受歡迎，鍋貼煎到脆卜卜，香口惹味；菜肉包餡料多又新鮮，食到蔬菜嘅鮮甜，相對較清新。
秘製沙嗲醬 百味香串燒專門店
圖：開咗三十幾年、街坊力推嘅地道港式串燒店。人氣必試嘅雞肉串燒，外皮微焦但肉質嫩滑juicy，啖啖都香口；豬頸肉就更加甘香彈牙；手打魚腐條都有咬口，豬皮就充滿膠質，全部都好高質素呀～加埋佢哋自家調配嘅沙嗲醬，有唔辣、少少辣或者好鬼辣可以揀，鹹香帶辣嘅滋味更加有層次！
小巷人氣雞蛋仔 嘉發小食
圖：OsmanC
呢間雞蛋仔專門店喺元朗廣場附近嘅小巷，未行近已經聞到陣陣蛋香，原來佢哋堅持用傳統鐵模炭烤，難怪香味特別強勁！雞蛋仔款式超多，人氣必試有特濃朱古力、抹茶麻糬、海苔肉鬆、雙重芝士、開心果同伯爵茶麻糬，每粒都外脆內軟，爆漿餡料勁邪惡。朱古力口味嘅流心黑朱古力濃郁唔死甜，香氣十足，食完想即刻encore！另外格仔餅都係主打之一，推介花生醬厚格仔餅，餅底外脆內鬆軟，夾住滿滿花生醬同花生粒粒，邪惡指數爆燈～仲有繽紛樂格仔餅、芝士豬柳蛋雞蛋仔等創新口味，全部即叫即製，上手熱辣辣，記得即刻食！
出色茶底 TEATOP 第一味 
圖：夏天熱辣辣，最啱就係嚟杯透心涼手搖飲！元朗呢間嚟自台灣嘅過江龍，用台灣直送茶葉同百年沏茶技術，唔單只真材實料，款式仲勁多選擇，茶控絕對要試！人氣推介包括百香鮮QQ，以綠茶為底，配上大量百香果、珍珠同椰果，酸甜清新；108茶王係招牌限量茶款，味道甘香唔澀，茶味濃郁又順喉，即使唔加料都一樣好飲。紫芋西米露芋泥綿密，加上椰奶、西米同鮮奶底，飽肚感滿分亦唔假甜。店內仲有打卡牆，買完飲品順便影靚相一流～
筲箕灣東大街
必試惹味沙嗲醬 印尼沙爹屋
圖：行到筲箕灣東大街，梗係唔可以錯過呢間開業多年嘅印尼沙嗲小店啦。雖然下午四點先開門，不過一到開檔時間，門口已經有熟客排隊。串燒有牛、羊、雞、魷魚等等，仲有啲外賣店少見嘅款式，例如牛舌、烤鱔、雞軟骨、雞腎，全部都係即叫即燒，火喉啱啱好，肉質結實唔靭，保持到嫩滑又juicy。最吸引嘅係佢自家製嘅沙爹醬汁，唔會死鹹，反而有啲微甜香口，加埋滿滿花生碎喺熱辣辣嘅串燒上面，簡直係靈魂所在！
焦糖燉蛋班戟 I Love 戟 - 班戟專門店
圖：主打即叫即製班戟嘅小店，必試招牌焦糖燉蛋班戟，表面一層薄薄脆脆嘅焦糖燒得幾香口，底下係滑溜甜蜜嘅燉蛋，同軟綿綿嘅班戟夾埋一齊，每啖都好有層次，甜而不膩～另外士多啤梨雪糕班戟都唔錯，新鮮士多啤梨酸酸甜甜，加上雪糕嘅冰涼同暖笠笠嘅班戟撞埋一齊，有種冰火交融嘅幸福感。夏天嚟仲可以試吓四球雪糕，款式選擇多之餘價錢幾親民，買嚟邊行邊食啱晒。
人龍雞蛋仔專門店 低調高手大街小食 
圖：yofood00
經常大排長龍嘅人氣小食店，個個都係為佢嘅雞蛋仔而去。原味雞蛋仔賣相金黃飽滿，每粒外脆內軟熱辣辣，食落唔會太甜，仲帶住陣陣蛋香，咬落去真係有種回到童年街頭味道嘅感覺。佢哋嘅格仔餅都係必試之選，外層香脆，入面鬆軟有嚼勁，唔會過甜，整體口感豐富又滿足。最加分係即叫即整，企喺門口聞住香味都已經流晒口水！
人氣魚肉燒賣 呂仔記二哥一九七八
圖：呢間街坊老字號已有多年歷史，一直堅持手工製作。最出名就係佢哋嘅手打燒賣，用全魚肉製成，冇粉感，大大粒夠彈牙，配埋佢自家辣椒醬，真係鮮香惹味～除咗燒賣，三溝都係經典之選，包括碗仔翅、生菜同魚肉，湯底用雞殼長時間煲成，味道濃郁又唔會過鹹，魚肉仲滲出淡淡蒜香，再加埋爽口生菜，完美平衡。
誠意港式小食 街頭巷尾
圖：最近新開嘅小食店，一經過就已經聞到串燒嘅香味！主打即叫即燒，燒得夠香又唔會太乾，雞軟骨脆卜卜兼香口；白鱔則厚肉juicy，外皮燒到微微焦脆，好有層次感。佢哋仲有唔少湯品小食，好似杭州小雲吞，一啖一粒，湯底有紫菜蝦米蔥花，好清香；紅油抄手就酸辣惹味，唔會太嗆口，辣得啱啱好。甜品都一樣出色，紅糖糍粑炸到脆卜卜，配埋黑糖漿同黃豆粉，香甜唔膩，夠晒滿足。
屯門龍門居
超驚喜串燒 齊齊串泰式小食
圖：wnganc
龍門居其中一間超受歡迎嘅串燒店，行過已經聞到陣陣燒烤香味，令人忍唔住要買幾串試吓！主打泰式串燒，燒好之後會掃上一層酸辣帶甜嘅泰式辣醬，食落層次豐富，鹹香惹味。推介豬頸肉串燒，燒到表面微焦，啖啖肉之餘煙韌又juicy；雞軟骨口感好爽脆，食到停唔到口。司華力腸外皮燒到微微焦香，一咬落去就感受到內裡啖啖肉汁，口感同味道都好滿足！價錢方面相當親民，叫多幾串都唔覺傷荷包～
特色煎餅果子 有家煎餅
圖：主打煎餅果子，加埋幾款特色甜品同手打檸檬茶，夠晒創新又好味！呢度嘅煎餅果子大大份，皮薄餡多，食落口感層次超豐富。麵糊煎得金黃香脆，內裡夾住生菜、薄脆、肉鬆，再淋上特製香辣醬或者沙律醬，仲可以自選配料，如豬頸肉帶少少焦香，肉質juicy又爽口。甜品同飲品就推介清新回甘鴨屎香手打檸檬茶、淡淡桂花香氣嘅桂花河粉布甸碗，同埋香甜綿密嘅芋泥豆酪碗～
台式芋圓專門店 摩登士丹里
圖：呢間主打台式飲品同甜品，啱晒食完燒烤串燒之後當飯後甜品解解饞！招牌係芋圓糖水，經典芋圓2號超豐富，入面有仙草、紅豆、小丸子，再加大量煙韌芋圓；仙草爽滑，紅豆夠晒綿密，分量大到夠兩個人share，食完勁滿足。如果鍾意紫米嘅話，可以試芋圓紫薯紫米露，紫米露帶少少甜香，入面有整整一球紫薯蓉，再加上Q彈芋圓，每啖都好有層次感。
街坊糖水小店 泡沫茶
圖：hyperbec
價錢親民，分量足料嘅街坊糖水舖，主打傳統糖水，南瓜丸子甘露滿滿南瓜香，仲有大大粒丸子，煙韌彈牙，配搭西米，口感豐富又飽肚，食落清甜香滑，秋冬嚟一碗最啱！芋頭紫米露大大嚿芋頭夠晒香綿，紫米煮得夠濃稠，入口有陣陣芋香；楊枝甘露都係人氣之一，芒果粒大大嚿，清新解膩。另外佢哋仲有供應特飲，如鮮果汁、紅豆冰同菠蘿冰等，啱晒掃街～
地道港式煎釀三寶 泰美美食
圖：KakaEat
主打煎釀三寶嘅港式小食店，選擇超多，基本上紅腸、茄子、青椒、炸魚蛋、餃子、炸豆腐、蟹柳應有盡有！其中最推介就係魚肉茄子，茄子炸到外層微脆但內裡鬆軟，搭配上面一層自家調味魚肉，非常香口！炸雲吞同炸魚蛋都推薦，前者炸到香脆，魚肉點綴得啱啱好；後者則夠彈牙。如果唔想咁熱氣可以試吓生菜魚肉，呢度用嘅鯪魚肉特別處理過，完全冇腥味，仲帶淡淡魚香，口感彈牙有嚼勁～
荃灣路德圍篇
爆餡軟殼蟹吐司 Try My Bread (荃興徑) （已結業）
圖：主打爆餡吐司同越南法包，仲有貝果同漢堡可以揀，選擇多樣化，招牌脆炸軟殼蟹滑蛋吐司啱啱烤好嗰陣香氣撲鼻，吐司外層微脆，帶輕輕牛油香，內裡滑蛋好creamy，再加埋大大隻軟殼蟹，一啖咬落去層次感十足，真係令人好滿足！韓式蜂蜜柚子炸雞漢堡炸雞大大件，外脆內嫩又juicy，仲配有清新嘅蜂蜜柚子醬，甜而不膩，味道層次好豐富。
自家秘製麻辣醬 棟篤食
圖：Meowmeoow、輕鬆豆*HappyMealFamily
掃街一定唔少得篤串魚蛋燒賣！呢間小食店主打燒賣、魚蛋同埋佢哋嘅秘製醬汁，燒賣口感紮實；魚蛋都好彈牙，但最正係配埋沙嗲醬，入口香噴噴有花生碎，後勁辣味出現，愈食愈惹味，如果唔食得辣仲有唔辣版本，同樣咁好味！炸燒賣都推介，香脆得嚟又有咬口；另外佢哋仲有供應各式串燒，記得一定要配埋沙嗲醬食呀。
超抵食手卷 桜
圖：經常都排隊嘅外賣手卷店，門口有張立食枱畀大家～首推加拿大海膽手卷，食到最底都仲有好多海膽，鮮甜又足料；厚切三文魚腩手卷真係超厚切，滿足感十足！火炙牛油三文魚手卷入口魚油香氣即刻爆開，仲要係熱辣辣嘅口感，加少少豉油更惹味！另外仲有北寄貝手卷同帶子拼海膽手卷都係人氣之選，唔少鍾意食日本嘢嘅朋友都會喺度快速醫肚。
黑芝麻外賣專門店 暖心芝作
圖：wingscc
掃街又點少得甜品呢！呢間小店專注於黑芝麻製品，每樣都係真材實料，香濃得嚟又夠特色。黑芝麻軟雪糕係佢哋嘅招牌，濃郁滑溜嘅黑芝麻雪糕加埋黑芝麻醬畫龍點睛，芝麻味層次分明，再配埋香脆嘅雪糕筒，口感豐富。另外流心黑芝麻布甸亦係人氣之選，賣相普通但味道絕對有驚喜，布甸滑嫩之餘內裡仲有黑芝麻漿流出，芝麻味更加濃郁。黑芝麻菲林卷都好搶手，每個鐘頭限量發售，想食要早啲去買呀～
香口惹味串燒店 串燒皇
圖：有冇六個文字
呢度主打串燒，種類超多，價錢仲好親民，而且仲有酸辣粉可以揀。串燒即叫即燒，啱啱燒好嗰陣熱辣辣，香氣逼人，如牛肉串同豬肉串食落外層有少少焦香，加上調味惹味，令人一串接住一串。另外仲有好多種類，包括燒羊架、原隻魷魚、多春魚同牛脷等等，款式多籮籮呀～
紅磡篇
必食沙律芒果班戟 紅磡雞蛋仔
圖：講到紅磡掃街，點可以唔提呢間超人氣小店呢？呢度唔單只有香口酥脆嘅經典雞蛋仔，仲有創新又吸引嘅甜品班戟，行過真係要買返份！沙律淨芒果班戟絕對係必試之選，班戟皮厚薄適中適中，包住啖啖新鮮芒果，加埋香甜沙律醬，一啲都唔膩，咬落仲爆出陣陣果香，滿足感爆燈！肉鬆班戟鹹甜味配搭得宜，口感豐富又帶驚喜。鍾意雞蛋仔嘅朋友記住試埋呢度嘅原味雞蛋仔，傳統做法，外脆內軟，蛋香濃郁；如果鍾意濃郁甜味，咁就要揀朱古力雞蛋仔，每粒都夠晒香滑，啱晒朱古力控。
人氣北京烤鴨煎餅 煎餅廚房
圖：中式煎餅專門店嘅北京烤鴨煎餅，餅皮煙韌香滑，內餡係香濃惹味嘅北京烤鴨，配埋新鮮青瓜絲同甜麵醬，每一啖都係熟悉嘅味道。嗜辣味嘅朋友，推介麻辣雞肉煎餅，雞肉鮮嫩，麻辣惹味；沙嗲豬梅肉煎餅就啱晒鍾意濃郁香料味嘅你，豬梅肉嫩滑多汁，沙嗲醬香氣四溢，齒頰留香！食完煎餅，記得嚟杯自製老陳皮山楂紅茶，酸酸甜甜好清新，飲一就啖可以解膩又消滯，為掃街劃上完美句號。
招牌焦糖雪冰 Sweet Craft（已結業）
圖：呢間小店以各式粉雪冰聞名，口感綿密輕盈，款款都好啱甜品控！其中焦糖海鹽粉雪冰更加係人氣之選，甜而不膩嘅焦糖淋醬，配埋少少鹹鹹哋嘅海鹽，味道層次豐富，冰涼細滑。鍾意清新水果味嘅話，可以試埋果蜜白桃粉雪冰，白桃果肉香甜多汁，真係食出夏日果香味；而絲滑可可粉雪冰就有濃郁可可味加埋細膩口感，食得好滿足！另外餐廳有供應軟雪糕，濃厚豆乳軟雪糕味道香醇細膩，超適合鍾意豆乳嘅朋友～
台灣人氣炸雞 2派克雞排
圖：講到掃街小食，台灣人氣炸雞絕對係必試之選～招牌脆皮無骨雞排外脆內嫩，配埋特製台式椒鹽，香氣撲鼻，而且啖啖肉！脆皮無骨腿丁都係必食推介，外層香脆，肉汁鎖得好，分量仲超足，邊行邊食啱哂。另外脆皮杏鮑菇炸到外層香脆，入面係杏鮑菇嘅嫩滑質感，每啖都帶住菇香，簡單調味已經好出色。
旺中篇
印尼連鎖過江龍 斑蘭/Nutella月亮餅 Martabak Pecenongan 78
呢間印尼連鎖甜品店悄悄地登陸香港，最近仲喺旺角連開2間分店𠻹！店舖主打約10款鹹甜口味嘅月亮餅，客人可以先揀原味或斑蘭味嘅餅底，再選內餡同分量。想試特別口味，推介斑蘭粟米芝士口味，餅底質感濕潤鬆軟，中間夾滿芝士碎同粟米粒，鹹甜交替幾過癮。另可揀薄脆版本，相對脆口同埋滿腹感較低。期間仲見到唔少印尼姐姐都會幫襯，係幾特別嘅掃街選擇～
泰式奶茶香蕉煎餅 堅泰
圖：味味道來
講到旺中掃街，點少得呢間泰式小店！呢度嘅泰式奶茶香蕉煎餅同朱古力香蕉煎餅真係一試成主顧，煎餅即叫即煎，外層脆卜卜，入面係香甜香蕉，淋上濃郁泰奶或者朱古力醬，食落甜甜哋好滿足～仲有佢哋嘅炒金邊粉，酸酸辣辣，好有泰國街頭風味，鑊氣足之餘仲加咗好多配料，口感層次分明，啖啖都食得出泰國味！鍾意食燒嘢嘅朋友，一定唔好錯過泰式烤豬頸肉！燒到外層金黃香脆，入面肉質爽彈，香氣撲鼻，絕對係邪惡又滿足嘅選擇。
超足料bagel+Tiramisu Miss Tira（已結業）
圖：bbgube
香港首間主打現切韓式提拉米蘇嘅專門店，佢哋仲有好多趣味甜品，夠晒吸睛又好味！呢度嘅招牌係大便造型提拉米蘇，用上三重朱古力做底，外層係軟糯麻糬，入面加上香濃朱古力、朱古力脆脆珠同餅底，食落好有驚喜。仲有創新嘅港式檸檬茶提拉米蘇，上層係清新嘅檸檬茶啫喱，下面就係綿滑嘅Tiramisu，入口充滿檸檬茶香。另外仲推出咗厚醬夾心貝果，如脆皮黑巧厚醬夾心貝果、雙重濃厚開心果厚醬夾心貝果，以及焦糖芝士伯爵茶脆餅厚醬夾心貝果，款款都好吸引！
港式掃街暴走杯 波士BB
圖：港式掃街暴走杯真係好方便，而且可以自由組合，底層係飲品，上層係小食，一杯兩味超滿足！飲品方面，招牌開心果啜啜豆腐花開心果味超濃，仲有香甜滑口嘅開心果粒、豆香濃郁又質地順滑嘅豆腐花𠻹。小食方面都有幾款特別推介，柚子雞翼酸酸甜甜，煎過之後再加柚子醬，掃街食落唔會膩；而栗子紫薯餅就係即叫即整，熱辣辣又充滿紫薯同栗子味，連大熱嘅熱香餅豬柳蛋漢堡食𠻹呀～
性價比高日式小食店 手卷駅
圖：bdreamy
一間主打新鮮平價壽司同手卷嘅日式小食店，佢嘅芝士吉列蝦卷係必試款式之一，外層吉列炸得香脆，內層蝦肉鮮甜，再配上濃郁芝士，口感豐富，食落超滿足！另外厚燒玉子夠厚身，但玉子仍然柔軟細滑，帶有微甜味道，好適合做開胃小食。壽司同手卷全部都即叫即製，魚生新鮮，用料十足，而且價錢相當親民，非常適合想喺旺角掃街食嘢又唔想荷包大出血嘅朋友！
正宗足料韓式炸雞店 Hong Korean Chicken（已結業）
圖：主打多款唔同口味嘅韓式炸雞，由韓國人主理，絕對帶嚟地道韓國滋味！炸雞嘅醬汁選擇超多，每款口味都有獨特風味，雞肉嫩滑多汁，雞髀肉量多，食得非常滿足！其中三味炸雞係必試之選，包括甜辣、Wasabi蛋黃等口味。甜辣味有骨炸雞帶有韓國經典炸雞嘅味道，甜辣度適中，香口得嚟唔會過辣；Wasabi蛋黃味有骨炸雞則別具特色，Wasabi味道唔會過分刺鼻，配上蛋黃醬嘅香滑，特別好味！
文：Yanica
編：Cathy、Sharon、Kate
