一年容易又冬至，又係同屋企人圍爐食好嘢嘅時候啦！呢個懶人包幫你一次過精選城中人氣中菜，等你同家人過一個暖心又滿足嘅冬至～
鮑魚蟹鉗羊腩煲團圓冬至套餐 大宅 
好有家的味道嘅團圓套餐，全部菜式都走暖心路線，用料靚、火候講究，成餐都好有冬至應有嘅儀式感。脆炸40頭乾鮑淋上吉品鮑汁超加分，配埋炆到入晒味嘅鵝掌，味道超豐富。三蔥焗珍寶蟹鉗蔥香撲鼻，蟹肉又厚又鮮甜。雙冬羊腩煲就熱辣辣上枱，羊腩軟腍得嚟無羶味，暖到入心。最後以香氣四溢嘅生炒臘味糯米飯作結，濃濃節日氣氛即刻湧晒出嚟，最啱一家大細圍住枱食大餐。
供應日期：12月6日至12月21日（午市及晚市）
價錢：每位HKD1,188
溫馨手工潮州菜 潮廳
呢個冬至套餐好貼心，專為4位或12位設計，無論你係小型家庭定大家族都有得揀～以潮州菜為主打，如魚蛋紹菜煲用上手打魚蛋配汕頭紹菜，湯底清甜又暖胃，凍冰冰嘅天氣食一啖即刻暖晒。最後有翻沙芋頭條作結，金黃酥脆、芋香同焦糖味好和諧，用最正宗嘅潮州甜品收尾好滿足。
供應日期：12月限定
價錢：4位HKD3,680、12位HKD9,980
八道菜冬至晚宴 胡同
滿滿北方辛香氣息嘅冬至晚宴，8道菜套餐由涼拌酸辣佛手瓜開場，酸辣醒胃。香煎北海道帶子配雞樅菌醬好鮮甜，而招牌胡同口水雞又麻又香，食到停唔到口。重頭戲有藤椒鮑汁乳鴿釀花膠素翅、牛肝菌燉響螺湯同北園松子魚，每道都好足料。主菜可揀爆炒老虎蝦，想再奢華啲可以加錢升級川式爆炒龍蝦。最後用椰汁紫米紅豆奶凍配芝麻湯圓作結，完美應節又甜甜蜜蜜。
供應日期：12月19日至12月21日
價錢：4位HKD3,888
百年地標下圍爐 中環飯店
呢間新派粵菜開咗喺百年歷史嘅畢打行入面，行入去已經有種時代交錯嘅感覺。菜式食落有熟悉味道又帶少少新意。招牌菜有砂鍋尖椒炒蟹，鑊氣十足蟹肉鮮甜。潮式荷葉翅湯身燉到好濃郁又有陣陣荷香。片皮雞二食就將傳統手法融入現代元素，先片皮配饅頭，再將雞件爆炒成避風塘風味，好惹味！環境方面夠雅緻，有包廂啱晒家庭聚會～
文：Yanica
編：Cathy
