（圖：米芝蓮）

第二屆《米芝蓮指南臺北 2019》啱啱揭曉，一共有24間餐廳獲得星級殊榮，當中五間為新上榜，更有一間首次入榜就奪得二星肯定！其餘四間一星新晉亦有兩間係台灣菜館代表。
 

同上年一樣，位於君品酒店當中嘅傳統粵菜館頤宮維持三星，亦係現時為止台北地區唯一一間米芝蓮三星餐廳！

頤宮（圖：餐廳Facebook）

 
五間二星餐廳當中，有四間係維持二星評價。唯一嘅新面孔係日式Omakase餐廳鮨天本，主廚天本昇吾喺台灣住咗12年，三年前離開高玉日本料理開設自己嘅餐廳。佢嘅哥哥亦即係東京米芝蓮二星餐廳東麻布天本嘅主廚天本正通。鮨天本門口低調，但單靠饕客口耳相傳就已經爆滿。

鮨天本（圖：Cindy - Food Makes Me Happy）

亦有兩間舊年一星嘅餐廳成功「升呢」成為二星！態芮主廚為何順凱，主打創意法國菜，特點係糅合唔少台灣元素，例如招牌菜迷魂香芋泥鴨。被譽為全台北最難訂枱嘅RAW以台灣在地食材同24節氣為概念，再以現代手法呈現，主廚江振誠曾有退還米芝蓮星嘅新聞，但佢嘅餐廳今年更上一層樓，唔知係咪亦代表會更難訂枱呢？

態芮（圖：餐廳Facebook）

RAW（圖：餐廳Facebook）

 
今年共有四間新上榜一星餐廳，Impromptu by Paul Lee由荷里活米芝蓮一星餐廳PATINA前主廚李皞開設，特色係融合美、台、法式等各地風格，再配搭唔同雞尾酒，驚喜十足。logy就由東京米芝蓮二星餐廳前副主廚田原諒悟主理，花上兩個月時間環島，用日本菜方式演繹台灣在地風味。兩間餐廳都開咗唔夠一年，潛力驚人！

Impromptu by Paul Lee（圖：餐廳Facebook）

logy（圖：餐廳Facebook）

正宗台灣菜代表就有山海樓，餐廳宗旨係傳承手工宴席菜，舊年搬店前更特別花時間去搵同研究老台菜食譜，將更多經典台灣味道保留落嚟。另一代表係台南担仔麵，從路邊攤起家到發展成現時嘅海鮮餐廳。

山海樓（圖：餐廳Facebook）

台南担仔麵（圖：Syrena Hung）

文：Cathy