好多人都貪新鮮，見到有新餐廳新嘢食，都會鍾意走去試試。10月嘅十強榜內，就有唔少新開冇耐嘅餐廳上榜呢，例如甜品店、打卡café等，你哋又試咗未呢？
第10位 東京チカラめし（*新上榜）
圖：被譽為日本燒牛丼元祖嘅牛丼店，嚟到香港當然有叫座力。餐廳喺主打逾35款燒牛肉、豚肉丼 等，最平$45就食到，仲要開喺旺角，大把巿場，入到十強好合理。最signature梗係招牌燒牛肉丼，牛肉以鐵板燒方式製作，肉味濃香帶有微焦，淋埋特製醬汁係惹味嘅。
第9位 爆丼屋（*新上榜）
圖：呢間丼飯店，搬咗新舖依然keep住人氣。疊到高一高嘅丼飯，吸睛到爆。唔特別介紹魚生丼飯喇，反而想講下啲牛丼，無論係爆盛慢燒牛肉丼，定係重量級燒牛扒盛丼 ，都係浮誇式嘅presentation。啲牛肉多到瀉，肉質軟腍香口。另外有個三色海膽盛丼，都係好誇張地多，集合咗3款海膽，款款鮮甜。
第8位 甜姨姨私房甜品 
圖：銅鑼灣嘅人氣甜品店，去到一定要試佢哋嘅刨冰系列，口味創新冇乜地方食到。好似醬爆奶醬脆多刨冰咁，幾層刨冰中間都加入咗秘製嘅花生奶同花生碎，出面又再唧滿花生奶，頂頭放埋脆多士、煉奶同花生醬，花生味夠晒濃，係明知邪惡都要破戒嘅嘢。
第7位 申子居酒屋（*新上榜） 
圖：呢間居酒屋最先開喺旺角，而銅鑼灣店嘅光影打卡位絕對係賣點之一。Menu選擇都幾多，特別推介申子和牛燒，店員即席用火槍燒鹿兒島A4和牛，再撈勻蛋黃、捲起啲飯，睇見都吸引。即燒即食有微微和暖，和牛沾埋蛋汁變得更軟滑，滿口都係油脂香呢。
第6位 Sky726（*新上榜） 
圖：高層餐廳但價錢平民係幾難得，又落地玻璃又藍色小燈，幾浪漫幾好feel，慶祝紀念日實有分加。厚切西冷牛扒油脂分佈平均，肉味香濃，配香蔥乾干邑汁層次再豐富咗。火焰朱古力球係必食嘅甜品，倒酒後，朱古力波開始溶，一啖入口有冰火交融嘅感覺，外層暖脆朱古力，入面係雪糕同brownie朱古力蛋糕，甜得嚟帶有酒香。
訂座優惠：正價7折 主菜餐牌 午餐
訂座+預付套餐優惠：豪華五道菜1人晚餐
第5位 八木橋日式燒肉（*新上榜）
圖：每個月都總會有啲燒肉餐廳上榜，今個月有多樣放題食品，海鮮、刺身、豬牛羊雞肉、甜品、雪糕等全部都任食！最特別係佢哋有款Mozzarella芝士雞腿肉，可以成兜芝士放上爐燒，熱溶後點雞，做到真‧拉絲效果。
訂座優惠： (買一送一) 霞餐：熟成M5和牛燒肉放題、經OpenRice訂座即享"霞"或"雨"餐85折優惠
第4位 豐信餃子店
圖：太子餃子小店再度上榜，足以證明佢深得大家嘅熱愛。呢度嘅餃子皮薄餡多，又夠大隻，係幾抵食嘅。芫荽黨會專誠嚟拜會佢哋嘅芫荽鮮肉餃，味道濃郁突出。而家叫煎餃加$15，更可試到金沙版，喺餃子上灑滿粒粒鹹蛋黃，多咗份沙沙地嘅口感同鹹香，仲惹味。
第3位 Purple Café（*新上榜）
圖：太子呢間café開咗唔係好耐，點解咁快入到十強？你一睇佢設計就明，成間café都係粉紫色，天花掛滿薰衣草，仲要有張半圓吊椅，全部都係打卡嘅最強元素。雖然話大家對打卡café嘅食物要求比較寬鬆，但都要有返咁上下水準嘅。差唔多枱枱都會叫蟹柳明太子意粉，口感creamy，醬又夠香，加多杯主題紫色嘅紫薯波波鮮奶，成個package的確做得唔錯。
第2位 Almond Dessert（*新上榜）
圖：以杏仁為主題嘅甜品店，同樣都唔係開咗好耐，但可能主題夠特別，又唔太多同類舖頭，吸引咗唔少杏仁迷去朝聖。試過嘅朋友好多都大讚杏仁茶燉蛋白，口感幼滑，兩者味道平衡得宜。除咗多款杏仁甜品，芒果奶昔雙皮奶亦值得一試，奶滑香甜。
第1位 Boy n Burger（*新上榜）
第一位係今年先至創立嘅本土漢堡品牌，一出已經好受歡迎。招牌雙層牛肉Bobby Burger肉味香濃，漢堡扒更有微微燶邊嘅香脆口感，加埋芝士生菜番茄等等，夠晒豐富。炸雞堡Chicken Signature係另一推介之選，juicy爆汁啊。最緊要係，價錢夠親民嘛。