之前帶大家「跳出香港」嘅前主播黃婉曼（Icy）最近喺將軍澳開餐廳，供應多款健康手工麵包，包括流心牛角包、酸種法包、鬆軟日式方包等。仲有唔同小食、主菜、甜品、咖啡等選擇，加上定期請世界冠軍級大師親授課程，美食體驗多元化！
 

Icy之前喺法國廚藝學院Le Cordon Bleu修讀麵包相關課程，開餐廳當然唔少得手工麵包

RISE Kitchen位於將軍澳，集手工麵包甜品店、家庭式Cafe，同烘焙工作室三大概念於一身。Icy笑稱自己係一位媽媽，所以店裡面售賣嘅麵包都堅守健康同新鮮兩大原則。採用自家天然酵母麵種，由師傅手工製作，部分經過長達18小時低溫發酵，唔使加任何膨脹劑都夠鬆軟。而且喺店裡面新鮮烘焙，每日都有唔同款式。
 

流心宇治抹茶紅豆牛角包（$28）

流心朱古力牛角包（$34）

牛角包都係用咗法國T45麵粉，同AOP認證Isigny牛油製作。抹茶口味裡面係用日本宇治丸久小山園抹茶粉同十勝紅豆自家製作嘅忌廉餡，朱古力口味就有黑朱古力同朱古力脆脆。兩款都做到流心爆漿嘅效果，同香脆嘅牛角包非常夾。
 

原片芝士酸種法包（$88）

採用前法國藍帶技術總監，麵包大師Stephane Reinat嘅食譜，選用法國T80麵粉、新鮮天然酵母製作，裡面有大片奶香濃郁嘅Camembert芝士，令麵包食落更濕潤，當早餐或者配紅酒最啱。
 

金寶脆脆原粒栗子方包（$32）

採用日本麵粉，經18小時發酵，令法包鬆軟得嚟又唔會好似空氣麵包咁空虛。裡面用原粒栗子同師傅自家手工製作嘅栗子醬，法包外面就加咗金寶脆脆，口感層次豐富。另外仲有宇治抹茶十勝紅豆法包（$32），選用丸久小山園抹茶粉配十勝紅豆同自家製朱古力醬。
 

班尼迪蛋配荷蘭汁（$118/2件）

一份兩件唔同口味，有菠菜配煙燻三文魚嘅經典配搭，亦有牛油果海蝦配Parma Ham嘅創意配搭，Icy話喺日本食過牛油果、蝦加Parma Ham嘅組合覺得幾得意，就將呢個Idea帶返嚟自己餐廳裡面。另一亮點係唔用英式鬆餅，改為自家製牛油麵包，富牛油香之餘口感Spongy。
 

豪華全日早餐（$168）

有煎刺身級帶子、煎雞扒、炒蛋、牛油果、沙律，配自選法包或牛角包。帶子煎至啱啱熟，口感彈牙味道鮮甜。牛油果蓉同紫薯蓉柔滑得嚟保留少少咬口，味道自然唔會太甜太膩。
 

 

金箔柑橘蛋卷（$48，配任何飲品$68）

甜品櫃每日都會有唔同甜品供應，皆因餐廳定期會同唔同得獎廚師合作。好似呢款金箔柑橘蛋卷就係用世界甜品冠軍、兼獲法國政府認可嘅MOF最佳工藝師Alexis Bouillet嘅食譜，用白乳酪配搭鮮忌廉同柑橘，奶香同柑橘清香營造甜而不膩嘅層次感。
 

天鵝泡芙（$34）

優雅天鵝賣相非常搶鏡，曲奇泡芙當中係覆盆子果醬，同天然帶莓果味嘅紅寶石朱古力（Ruby Chocolate）好夾。泡芙口感外酥脆內軟滑，味道酸酸甜甜，做飯後甜品就最啱。
 

百利酒鮮奶咖啡（$42/熱，$46/凍）

咖啡等飲品亦非常用心，品牌House Blend咖啡糅合五種咖啡豆，中淺度烘焙，帶少少橙香、西柚香，酸味同苦味平衡。呢杯百利酒鮮奶咖啡就加咗Baileys甜酒，酒香突出味道香醇。
 

蝶豆花柚子芒果梳打（$42）

夏日炎炎，要消暑呢度亦有唔少特飲，例如呢杯蝶豆花柚子芒果梳打就以蝶豆花茶配搭柚子嘅清香同芒果嘅甜味，唔單止營造出夢幻漸層，飲落味道亦帶水果甜香。
 

餐廳會定期邀請世界知名麵包師同甜品師，親自教授課程。另外亦有唔同程度嘅烘焙班，適合一家大細嘅親子班，詳情可以到餐廳官網瀏覽。
 

原味牛角包（$24）

RISE Kitchen
地址：將軍澳唐賢街29號藍塘傲地下4號舖

文：Cathy
相、片：Tom Li