香港邊度有葡國菜食？ | OpenRice Hong Kong

成日都話香港好多嘢食，咩國嘅菜都食到，西餐廳成條街都係。但原來認真數一數，想喺度搵間正宗嘅葡國菜餐廳，又唔係真係咁容易。不過跟住我開飯仔開飯嘅，就唔使煩嘞，我幫你哋搵咗幾間喇。

Casa Lisboa Portuguese Restaurant & Bar

Photos by 美食焚化爐 & KelvinYFL
喺中環蘭桂坊芸芸咁多食肆之中，有一間葡國菜餐廳，環境高雅，仲有好多款菜式揀。葡萄牙係沿海城巿，盛產海鮮，呢間餐廳當然都有大量海鮮供應啦，仲要係由葡萄牙直運落嚟㗎，其中虎蝦雖然細細隻，但就好好肉，啲肉爽口彈牙，好鮮甜。而鹽烤嘅紅蝦蝦味同樣夠晒鮮，啜下個蝦頭仲分分鐘啜到一大啖蝦膏添！

食葡國菜點少得馬介休？呢度有道「焗馬介休伴菜粟米碎薯蓉」，魚肉混入粟米同薯蓉一齊焗香，面層有少少脆，比起平時就咁食碟炸馬介休，層次即刻多咗幾層，冇咁齋之餘更加係好豐富。

澳瑪葡國菜

Photos by A.Big.Bite & edotsui
呢間位於尖咀嘅葡國菜餐廳，上年季尾先新開張，望住海景嚟食飯，淨係食個景都飽咗一半。餐廳有幾款葡式焗飯，其中一個推介係葡式肉腸焗鴨肉飯。條腸夠晒香口，而啲飯中間亦都夾雜咗好多鴨肉絲，鴨油滲埋飯香，絕冇欺場。

另一道必食嘅應該係招牌炭燒霹靂春雞，原隻雞咁上，都頗大隻下。燒完出嚟啲雞皮好脆，平時唔食雞皮嘅朋友都應該要試少少，而啲肉依然保持到嫩滑嘅感覺，配埋秘製小辣帶酸嘅霹靂醬一齊食，幾開胃。呢度仲有葡撻食添呀，可以選擇堂食定外賣，葡撻係用法國牛油同意大利新鮮雞蛋製成，蛋漿都幾多幾滿，食完成餐食多個都唔係好過份啫。

咪走雞正宗葡國餐廳

Photos by fussyeater0713

呢間葡國菜餐廳就遠少少，要入到去西貢先有得食，如果遲下放假行開山、去開沙灘嘅咪去試下囉。同樣都有霹靂非洲燒春雞食，有小辣大辣揀，聽講老闆用咗成5種辣椒去炮製個醬汁㗎，辣到噴火都要試啦。葡式烤乳豬係葡國菜另一道特色菜，隻豬燒到啱啱好到火喉，皮脆肉滑，配埋個炒飯墊底都幾夾。

漢堡包就食得多，但原來漢堡包都有葡式之分。葡式漢堡包有咩料？哦，一底一面豬仔包，中間夾住免治牛同葡國腸，仲有其他沙律配菜等，擘大啲個口食啦，睇住漏汁。想要啲特別啲嘅甜品可以試埋牛油果燉蛋，我未見過，我真係未見過，我都係聽啲食過嘅朋友講，話好香好滑，食過就一定會好掛住嗰陣味喎。

BOM Cuisine

Photos by 美食花花

呢間喺長沙灣嘅葡國菜餐廳，可以話係工廈區中嘅小驚喜。呢度嘅蘑菇湯，笨唔係普通嘅蘑菇湯，而係真係有好多蘑菇肉喺裡面嘅蘑菇湯，啖啖都有咬口，可惜係略嫌多咗些少水，沖淡咗少少味。主菜選擇唔算話好多，可以諗諗葡式烤乳豬配薯蓉。燒乳豬最重要就係燒脆晒塊乳豬皮，但仍然可以鎖住肉汁，保持鮮嫩感覺。

甜品方面，呢度有好多傳統嘅葡式甜品，包括菠蘿撻、香蕉撻呀、薑汁檸檬香茅燉蛋呀等等，都係香港比較少地方食到嘅，個菠蘿撻酸酸甜甜、香蕉糕都係微甜，一場嚟到記得要留肚試呀。

澳門氹仔葡式餐館

Photos by Kason Chan

最後要介紹呢間就喺元朗錦繡花園入面，交通係有少少唔方便嘅，但就貪佢夠靜嘛。而且佢唔係啲咩高級餐廳，係舊式少少嘅餐館，價錢亦都相對平啲。嚟到食就記得要食豬扒包，事關呢度啲豬扒包好巨㗎……塊豬扒，仲大過個包呀！又有肉汁又夠腍，醃到好入味。而個豬仔包亦都相當有水準，烘到脆卜卜，上碟仲有微溫。要挑剔下嘅就係塊豬扒有時會連骨囉，食落冇咁方便。

嗱，如果下次心血來潮想食葡國菜，唔使坐船過大海，都唔使搭飛機去葡萄牙，就可以喺香港搵住間嚟食，頂一頂住癮！

文：Kar

隨時接收最新資訊
讚好OpenRice專頁！