香港綠色主題咖啡店/餐廳集合 淡湖水綠文青咖啡店、腐乳主題創意餐廳

成日都話望多啲綠色嘢會令眼睛舒服啲～今次一於介紹幾間以淡湖水綠、墨綠同碧綠色主題嘅餐廳畀大家，有文青cafe、西餐廳同埋腐乳主題餐廳，快啲約埋朋友一齊去打卡啦！

目錄

森林風西餐廳 Second Bite Bar & Cafe 

圖：say_eatfatfat

裝潢以湖水綠配木系，令人有一種置身於森林嘅感覺，食飯都食得零舍chill！兩個人去可以試下dinner set，包餐湯、牛角包、前菜白酒忌廉青口、一份扒及一份意粉，兩個人食一定捧住個胃走～推介香煎紐西蘭頂級肉眼扒，肉質軟腍又juicy，有蜜糖芥末及蘑菇汁可以揀。白酒蟹肉扁意粉都唔錯，淡淡酒味加埋份量超多嘅蟹肉，每一啖都係蟹肉嘅鮮甜呀～

淡湖水綠咖啡店 A CUP THING

圖：skfoodtravelhk

一間店舖細細，好有文青feel嘅淡湖水綠咖啡店。Cafe最出名係多款日式抺茶甜品，招牌日式手工蕨餅，質感彈牙煙靭又軟糯，面層灑上大量抺茶粉，配有濃郁抹茶醬，抹茶味好濃郁呀。抺茶紅豆卷嘅蛋糕香軟濕潤，抹茶忌廉配埋紅豆一啲都唔膩，最重要係唔太甜呀。另外仲有日式抺茶窩夫同抹茶士多啤梨梳打，啱晒抺茶控。

墨綠色轉角咖啡店 The Third

圖：mageatallday

呢間就走型格啲嘅墨綠色路線，主打精品咖啡同漢堡，用自家烘焙咖啡豆沖調出多款特色飲品，有室內同室外座位，啱晒放假過嚟chill～招牌咖啡Ying Yang靈感嚟自香港茶餐廳嘅鴛鴦，以Earl Grey配Espresso，然後用冰搖咖啡嘅方法搖出一層細緻嘅泡沫，口感柔滑。主食嘅話必試和牛漢堡，包外脆內軟，和牛juicy肉味又濃郁，出色！

工業風cafe Colour Brown x PHVLO HATCH

圖：沈默的雙魚

裝修以工業風為主題，綠色為主色調，通往二樓嘅綠色旋轉樓梯係全店嘅焦點，一定要mark實呢個打卡位！食物方面主要供應All Day Breakfast、Egg Benedict及甜品等，佢嘅甜品都幾有特色，如鹹味焦糖芝士蛋糕好有驚喜，鹹味同焦糖好夾，鹹鹹甜甜食晒成件都無問題。 

碧綠色腐乳主題餐廳 Lau Bistro

圖：vanessafoodiary

裝潢隱約有淡淡港式風味，牆身嘅碧綠色及黑白色瓷磚，有舊式冰室感覺，唔單止裝修，連食物都好有特色，因為餐廳係以腐乳為主題！有冇諗過味道比較霸道嘅腐乳都可以搭配落唔同食物度呢？好似呢個椒絲腐乳卡邦尼意粉，完全唔會格格不入，腐乳嘅鹹香反而減少咗卡邦尼汁嘅膩感。腐乳慢煮雞卷配白飯肉質嫩滑軟稔，送飯一流～

文: Yanica
編：Kar