香港米芝蓮2019!新上榜餐廳逐間睇
2018-12-11

香港米芝蓮2019啱啱新鮮出爐,今年名單都無咩特別大驚喜,一星就有六間餐廳新上榜,二星就有兩間係首次奪星添,而車胎人推介同街頭小食就分別各有4間同5間新上榜,一於同大家逐間介紹下先!


新上榜一星餐廳!


清新創意法式料理  Arbor


呢間中環嘅法國菜餐廳由芬蘭主廚Eric Räty主理,雖然係法國菜,但主廚好擅長利用日本時令嘅食材加入菜式中,如前菜Sea Urchin、主菜Wagyu Beef A4等等,味道令人驚喜之餘仲好清新。難怪餐廳開業未滿一年就成功奪星。

圖:Joy_cce


時尚法國菜館 Belon


Belon今年先啱啱上咗Asia’s 50 Best,呢間同樣都係法國菜,菜單選擇唔算多,但就係貴精不貴多。主廚James Henry擅長突出食材本來嘅風味,而且挑選當季新鮮食材,因此餐牌大部分菜式會每星期更換一次,令食客每次光臨都有驚喜。而餐廳供應嘅酒大部分亦係嚟自法國,環境亦優雅舒適。

圖:mercurykwok


連續奪星 國福樓(中環)


國福樓已經連續幾年得到米芝蓮推介,仲已經連續兩年奪星,就算搬咗新舖去中環,今年都不負眾望繼續留守喺一星位置!想喺一個優雅清靜嘅環境食粵菜飲杯茶,國福樓絕對係唔錯嘅選擇。

圖:為 食 龍 少 爺 SiuYeah、shirleyymf


高質印巴菜 New Punjab club


New Punjab Club係第一間亦都係唯一一間擁有米芝蓮一星嘅巴基斯坦餐廳。創辦人Syed Asim Hussain就話,南亞菜喺香港嘅地位已經越來越重要。餐廳裝潢行低調奢華路線,有前菜、燒烤、肉類咖哩、菜/豆類、沙律,唔少人都話佢係香港最好嘅印巴菜,睇嚟真係所言非虛。

圖:adrianang


名廚私房菜 Octavium


呢間意大利餐廳都係由名廚 Umberto Bombana開設,而名廚旗下已經有一間三星意大利餐廳8 ½ Otto e Mezzo BOMBANA,所以話今次成功奪星一啲都唔奇。Octavium係佢私下開嘅私房菜,可以畀佢用心製作菜式或加入唔同新元素。特別推薦名廚拿手嘅手工意粉,食落好好咬口。

圖:adrianang


富豪飯堂 新榮記


餐廳已經係上海米芝蓮一星名店,果然香港都成功奪星!主要食江浙菜,北京烤鴨、燒BB 乳鴿、蜜糖番薯、醬蘿蔔、沙蒜燒豆麵同鯧魚焗飯等都係招牌,醬蘿蔔採取高山蘿蔔、入味之餘仲好清甜,值得一試。

圖:Reneedaone


新上榜二星餐廳!


東京三星壽司名店 鮨.齋藤


總店連續多年得到東京米芝蓮三星,世紀主廚Joël Robuchon亦曾大讚係全球最佳壽司餐廳!香港店由大廚齋藤考司嘅得意門徒小林郁哉主理,齋藤考司亦會親自挑選魚獲然後即日空運到港,由海鮮、醬油到壽司飯都確保香港店食到嘅同日本店嘅一樣。


圖:吃吃君Reneedaone


創新法日料理 Ecriture


由法籍總廚 Maxime Gilbert主理,主打糅合日本烹調方式嘅法國菜,而且集日本同法國兩地嘅當季優質新鮮食材,創作出精緻特別嘅菜式。位於中環一座大廈頂樓,可以一覽中環景色,而開放式廚房亦係一大重點。
 


圖:餐廳網站


新上榜車胎人美食!


第三代麵店 劉森記麵家(福榮街)


劉森記麵家已經傳到第三代。店內所有竹昇麵同雲吞都係人手製造,雲吞包入原隻鮮蝦同豬肉,飽滿爽口。招牌係雲吞麵、蝦籽撈麵同豬手撈麵,配料自製醃蘿白爽、脆、香,值得一試。

圖:ChloeLeung9775


蘇豪區內的中東風味 Le Souk


位於蘇豪區內嘅中東菜,由兩位埃及兄弟開設,餐廳內嘅裝修色彩繽紛,無論食物定氣氛都好有中東味道。店內以摩洛哥同中東美食為主,推薦羊肉煲,嫩滑之餘仲好香,無花果中東沙律亦係另一味受歡迎菜式。


圖:siuposiupocrlrgrs


傳統中式糖水 佳佳甜品


佳佳甜品今年同時被列為車胎人美食同街頭小食推介,呢間中式傳統糖水店相信大家都唔陌生,必試有寧波薑汁湯丸、濃薑番薯糖水、芝麻糊同白果薏米腐竹糖水等。

圖:soya1314piggy16


台灣媽媽主理 吃什麼


之前經營請坐嘅兩位台灣媽媽,經過一番波折後,成功喺中環重新出發,開設吃什麼。食材同手法依然不變,肉鬆蛋餅嘅肉鬆同蛋皮都由台灣進口,仲有多款台式傳統食物滷肉飯、鹹酥雞、滷味拼盤同牛肉麵等,感受到濃濃嘅台灣味。


新上榜街頭小食!


榴槤主題店 榴槤樂園


一年四季都供應嚟自馬來西亞自置果園嘅榴槤,品種有貓山王、D24等,可以食到原個榴槤同多款榴槤甜品,如榴槤Bingo、榴槤芝士撻、榴槤芝士蛋糕同啖啖貓山王奶蓋等。店主話希望呢度可以成為香港各位榴槤迷嘅樂園!



早餐之選 豆漿大王(新蒲崗)


招牌即叫即包粢飯,香軟嘅糯米配埋自家製炸菜,仲有肉鬆同脆卜卜嘅油條,口感豐富。放入砂糖同油條嘅甜粢飯、鹹豆漿同其他豆類製品都不可錯過。

圖:heiheimonaeatingtwins


獨沽一味 蘇記燉蛋


呢間專食燉蛋嘅小店,獨沽一味只賣牛奶燉蛋白,口味都只係得一款,不過高峰期可以日賣300碗。舖頭標榜每碗燉蛋白都係純牛奶加蛋加糖去製作,完全冇加水,牛奶味同蛋味香濃。

圖:冰糧派出所


無味精車仔麵 蜜斗


呢間主打冇味精嘅車仔麵店,開業短短8個月就極速上榜,除咗主打健康無味精外,招牌菜可以話係佢哋嘅醬汁,有石磨芝麻花生醬、四川麻辣醬、擔擔醬、XO醬等十幾款醬汁,大部份都惹味香口。

圖:ericjojo


豆製品專門店 公和荳品廠


公和係大家都好熟悉嘅豆製品專門店,呢間荳品廠日日都好多人專程去食佢嘅豆腐花同煎釀豆腐,仲會買佢嘅豆卜豆皮自己返去煮餸。而且重新裝修後,都仲保持到過往水準。

圖:adrianangKent-CEO


文:Yanica、Cathy

Keyword
米芝蓮
香港
2019
奪星餐廳
開飯專題
開飯仔為你提供各類型最新飲食情報及優惠,全面照顧你的飲食喜好。
Restaurant Info
Show More
Show Less
Monthly chart
Delicious USA Introduces Spectacular Dishes across 25 Restaurants
2020-07-22