喺全球擁有過千分店嘅重慶劉一手火鍋舊年插旗銅鑼灣，而佢嘅第1088間分店將會登陸旺角！旺角分店有12000 呎，比起銅鑼灣店大足三倍。而食物比起舊店多咗72款，包括新增設嘅刺身吧同串燒吧，選擇多到你唔知點揀！

新分店新增刺身吧，除咗基本魚類外，仲有加拿大海膽($480)、象拔蚌($1680)同龍蝦刺身($880)，貪心啲可以叫個刺身盛同人Share就最好。而重慶地道串燒部有超過20款串燒，有齊肉類、菇類、海鮮同蔬菜，仲可以自選味道，如麻辣、川辣、籽然，牛油同芝士。

湯底方面就有四個新味，包括70年代港式特濃沙嗲鍋、皮蛋芫茜鍋、花膠響螺雞鍋同番茄牛尾鍋，招牌麻辣湯底保持一貫水準，食落又香又麻。揀兩隻味拼個鴛鴦鍋又得～

老闆私心推介70年代港式特濃沙嗲鍋(半鍋$84，全鍋$168)，佢話而家係香港市面已經食唔到舊時沙嗲香濃嘅味道，而佢地嘅沙嗲湯底濃郁杰身，有好香花生味，全部食材都會吸哂沙嗲嘅味道，值得一試。

花膠響螺雞鍋(半鍋$238，全鍋$468)好足料，有半隻雞同幾片大花膠，建議食之前可以飲啖湯先。

想試唔同部位嘅牛肉可以叫set，除咗澳洲、美國牛，新店有埋日本A4和牛特選($1488)，包括A4熊本牛肩腩位，A4熊本西冷、A4熊本肉眼、A4鹿兒島和牛西冷、A4鹿兒島肉眼等，油花豐富，入口即融！

食火鍋又點可以無海鮮呢！超過30款海鮮，全部都大大隻，都係游水貨，好新鮮！新menu加咗新鮮游水老虎班原條切片上盤、石蚌、象拔蚌同松葉蟹鉗。

丸類大部份都係自家製，出面係食唔到，如牛骨濃汁牛丸、飛魚子魚蛋腸、薑汁皮蛋貢丸同香辣粉絲豆腐丸等。可以叫呢個極上老闆天梯($238)，咁就可以一次過試哂咁多款啦～

牛脷酥平時配粥食就食得多，用嚟打邊爐又試過未？牛脷酥蝦滑($78)味道鹹鹹甜甜，估唔到打邊爐味道又幾夾。

仲有為素食者而設嘅新豬肉丸同豆卜新豬肉丸($88)，用Omnipork 新豬肉製成，無論味道定外表都同真豬肉好似，咁素食者又多個選擇。

劉一手手工啤($48)係同香港少爺啤合作，調製咗為劉一手而設嘅獨家手工啤，味道容易入口，帶有小小甜味。另外仲有超過20款特色飲品，如原隻鮮果沙冰，打邊爐飲就最啱啦！

嚟緊12月劉一手會喺屯門開香港第3間分店，到時仲會有出名中意食麻辣火鍋嘅郭富城城城嚟剪綵！

重慶劉一手火鍋店

地址: 旺角亞皆老街16號旺角商業大廈2-4樓

文、片、相：Yanica