掃街係唔少香港人都好喜愛嘅動作。未夠鐘食飯又掃一掃，食飽飽又要掃一掃，總之，行喺條街度見到一間間嘅小食店就會忍唔住，乜都想食！至於掃街熱點，多到接近區區都有，一於逐區去睇下。今次就講咗荃灣先。
荃灣呢個區仔，單係掃街嚟講其實都分咗幾個區，有嘆住冷氣嘅翻新商場美食層、幾個連埋一齊嘅連環商場，同埋愈夜愈多人嘅路德圍同士林食區一帶。
路德圍
入味滷水 元朗鬼巴士
本店喺元朗嘅滷水小食店，愈開愈多分舖。荃灣呢間，喺食街嘅角落，但長期排長龍。埋到去，基本上唔使煩，一係大雜錦一係小雜錦，咁就樣樣滷味都可以食啲。甜醬麻醬芥末醬記得要落齊，豬心、豬耳、生腸、牛柏葉等等全部都好爽脆同入味，內臟怪啱晒。
地址：荃灣荃興徑31號地下4A號舖
懷舊炸鮮奶 脆味工坊 咪咁串
圖：餐廳Facebook
呢間主要食串燒同炸嘢，其中，必食嘅係懷舊嘅炸鮮奶，而家唔多地方搵到喇。另外仲有炸軟殼蟹、鐵板薑蔥蠔、鐵板牛油帆立貝等等，全部都係香口嘢，份量唔算多但夠過下口癮。
地址：荃灣荃興徑14B號地舖
大碗芋圓 豪大大雞排
圖：雖然佢哋都幾多分店，但荃灣呢檔要特別介紹下，因為除咗炸雞，仲有好多款糖水，重點係有大家嘅飛佛，芋圓呀！一碗30零蚊，咩都有啲，芋圓地瓜圓仙草紅豆等等，算大碗呀，都有咬口嘅，一解荃灣友想食芋圓之癢。
地址：荃灣大河道22-28號榮安大廈地舖
炸紫薯蓉 大廚巴巴
圖：呢檔細細檔，但有好多新奇嘅款式呀。無骨菠蘿雞翼、炸紫薯餅同埋炸榴槤都幾多人鍾意揀。無骨菠蘿雞翼係將雞翼拆骨後再釀入菠蘿，再用蜜糖燒香，成件事甜甜地都幾fresh。而兩款炸物嘅炸粉唔太厚但就夠脆，食到成啖紫薯蓉或者D24榴槤蓉呀。
地址：荃灣運通街10號運通洋樓地舖
圖：同一條食街，有兩檔豆花舖相連，5、6蚊碗都幾抵食。除咗普通豆花，仲有黑豆花、芝麻糊豆花等款式揀，糖水黃糖自助形式，鍾意幾多加幾多。豆花都幾滑嘅，豆香味就一時時。
地址：荃灣荃興徑6號昌泰大廈地下5B舖、荃灣荃興徑6號昌泰大廈地下5A舖
鱟地坊
行遠多少少，有另一個掃街竇，就係鱟地坊。呢度地方比起荃興徑係窄咗少少，不過美食當前，唔計得咁多。
梳乎厘班戟 SJ Burger
圖：算係呢堆比較新嘅一間，唔好畀佢個名呃咗，唔止有burger，仲有近期人人飛佛嘅梳乎厘班戟。蛋味香，口感軟綿又唔會太空氣，仲可以配雪糕食！
地址：荃灣鱟地坊80-84號華成樓B座地下B4號舖
台式手抓餅 +5ºC 手抓餅專門店
圖：Eric Wan_Station、LeeDixon6265
呢間本店係太安樓嗰邊嘅，最近開埋過嚟荃灣，同樣都係即叫即整嘅，都有幾多款餅餡可以揀下，由「平民版」嘅芝士、火腿去到「豪食版」嘅美國肥牛、鱈場蟹棒都有，當然，芝士控梗要揀芝士，熱溶流心㗎喎。
地址：荃灣鱟地坊84號華成樓B座地下B5號舖
玉子燒 煙燻玉子燒
圖：呢檔可以話係玉子燒專門店，單一賣玉子燒嘅，有鹹有甜，正路嘅有明太子、櫻花蝦，特別啲嘅有黑糖、紫薯，最吸引嘅就應該係限定嘅芝士黑松露同鰻魚！料都幾多下，蛋香味都夠，而重點係煎好放入盒之後，會用條管將啲煙輸入去，焗佢一陣，so that’s 「煙燻玉子燒」。
地址：荃灣鱟地坊80-84號華成樓B座地下B3號舖
爆芝熱狗 齊柏林熱狗店
圖：milkbean
掃街又要掃得飽，熱狗應該係唔錯嘅選擇，麵包幾軟熟，如果你叫芝士嗰幾款，啲芝士直情唧到幾乎見唔到條腸，多到一個點。另外有薯條、薯格等小食。
地址：荃灣鱟地坊80-84號士林食街B7舖
文：Kar