掃街係唔少香港人都好喜愛嘅動作。未夠鐘食飯又掃一掃，食飽飽又要掃一掃，總之，行喺條街度見到一間間嘅小食店就會忍唔住，乜都想食！今次掃街熱點嚟到灣仔區，啱晒係呢頭返工嘅打工仔，放工口痕可以醫肚。
灣仔其實唔係得cafe或者貴價西餐㗎，仲有唔少新開或者係屹立多年嘅小食店~
冠軍茶王即席冲茶 我杯茶
掃街唔一定下下都要飲珍奶嘅，本土奶茶都好鬼正！特別係呢度，你可以搵到金茶王，即係奶茶冠軍－羅德師傅同你冲奶茶，都係十幾蚊杯，同珍奶完全兩個level嚟。開業咁耐依然人龍不絕，每日平均賣過千杯奶茶。呢度仲有菠蘿油或者沙嗲牛治，配埋冠軍奶茶，不得了！
灣仔道搶眼黃色招牌 腸粉皇
圖：Seobin
喺得灣仔讀書、返工、搭車經過都好，實對由朝到晚都咁多人企喺到食腸粉嘅畫面有印象！尤其是佢個黃底紅字招牌非常搶眼～啲腸粉又香又滑，麻醬，豉油，甜醬，全落是常識吧！btw腸粉皇唔係淨得腸粉賣嘅，港式小食砵仔糕、魚蛋等都有！
橫街臭豆腐 泉昌美食
香港好似愈來愈少舖頭整臭豆腐，呢間未轉個彎都聞到陣味。不過佢嘅秘製咖喱魷魚同東風螺更加吸引，夠辣夠入味嘛。而鋪頭側面就係炸煎釀三寶嘅位置啦～新鮮魚漿整嘅大魚蛋，咬落同一般來貨梗係唔同啦！
小清新台飲 T4 清茶達人
聽講呢間新開嘅茶飲店，原來2004年已經喺台灣嘅豐原廟東夜市發跡。大路嘅珍奶、黑糖珍奶就梗係有啦。而且仲有得畀你揀混珠，珍珠有大有細，口感一流。最特別就係坊間少見嘅玫瑰清茶，呢杯係店舖獨創嘅口味，玫瑰幽香，解渴之餘又清新，貪靚又怕肥嘅女士就最啱飲~
特色惹味煎餅 御廚煎餅
呢到嘅開放式廚房可以見住所有食物都係即叫即做。孜然羊肉同北京烤鴨味都好惹味，餅皮仲加咗雞蛋同黑芝麻，真心勁香蛋味。而且仲有幾多生菜、蘿蔔絲同青瓜絲等配菜，夠晒fresh。呢度仲有唔少新派小食，好似呢個蛋包流心芝士薯餅咁，拉到絲啊！
文：Yanny