掃街係唔少香港人都好喜愛嘅動作。未夠鐘食飯又掃一掃，食飽飽又要掃一掃，總之，行喺條街度見到一間間嘅小食店就會忍唔住，乜都想食！今次掃街熱點嚟到大圍，每次喺大圍踩完單車，都好迷茫，唔知食咩呢？咁辛苦做完運動，一定要食好西補充返呀~
辣辣手撕雞 華輝小食
圖﹕呢間手撕雞腸粉一直都深受大圍人歡迎，前嗰排傳出過結業嘅消息大家都好唔捨得，好在佢搵到新位再開過舖咋。佢哋嘅腸粉上鋪滿手撕雞，再淋埋麻醬、芝麻同辣醬，又香又滑。辣醬仲分有8種辣度，嗜辣嘅朋友仔快啲試下第八級嘅地獄辣啦！
呃like必去 Dear Coffee & Bakery
圖﹕邊個話掃街就一定只得魚蛋、腸粉？掃街唔食得包嘅咩？呢間嘅麵包仲要好啱打卡呃like，而紫薯包更加可以話係「呃like神器」。選用無添加紫薯蓉，又香甜又健康。每個麵包都係自家製添呀！
地道港式味 亞婆豆腐花
圖﹕講真，啲豆花嘅豆味就唔算話超重嘅，但就勝在夠凍夠滑，加埋黃糖甜甜地咁食，即時有份滿足感。除咗原味之外，唔怕食到啲牙同個嘴黑麻麻嘅，芝麻豆花都幾推介，即席on top加芝麻粉，又幾香~
大圍人回憶 坤記腸粉
圖﹕一場入到大圍，點都要試返轉經典嘢嘅。呢間老店喺度開咗好多年，腸粉、魚蛋等一直都係附近街坊嘅「零食」，腸粉又滑又薄，點埋甜醬麻醬就最地道啦！即使近年被評水準有啲回落，但都無阻舖頭門口經常大排長龍！
夏日涼浸浸 茶緣
圖﹕掃完街當然要飲返啲嘢啦~ 飲返杯fresh嘅水果茶就啱晒！呢間小店提供各種水果茶，一啜落去仲要食到粒粒果肉，真材實料，又解渴又夠juicy。
文﹕Kiko