開業兩個月就遇上第三波疫情，最近觀塘呢間懶人自轉燒烤放題終於重開喇！今次仲新增咗唔少前菜、炸物及小食，另外仲有得任食近來好Hit嘅芋圓仙草、芋泥冰等台式甜品。價錢方面照舊咁實惠，最平午市$148就可以任食兩小時，晚市7點半前離座$188，星期一至四黃金時段$218更可任食三小時，啱晒同朋友一齊傾計食嘢～
自轉燒烤放題共有34款串燒，餐廳堅持選用靚料，全部肉類都自家醃製，燒嘅時候更配有三款醬汁，包括香甜惹味嘅鰻魚醬、香濃惹味嘅沙嗲醬及泰式辣醬。較受歡迎嘅串燒包括西冷牛肉粒、雞軟骨、牛舌、五花腩、燒菠蘿及台灣腸等！
重開後仲加咗唔少炸物，部份炸物落單後即叫即製，熱辣辣。黑松露菌炸薯條香脆，有陣陣黑松露香；榴槤波波一咬會流心，榴槤味都好濃厚；蝦春卷亦香脆彈牙。
另外仲有得任食台式甜品，係近期好受歡迎嘅台式冰品，包括芋泥冰及仙草冰，仲有得自選四款配料，如芋圓及爆珠波波，芋泥冰嘅芋泥都係自家製作，香濃唔太甜，又幾有誠意。
除咗以上講嘅，一般放題供應嘅前菜、小菜、雪糕、甜品及飲品呢度都有齊，以性價比嚟講算係一間幾高嘅放題嚟～
地址: 觀塘開源道62號駱駝漆大廈1座5樓C號舖
文、相、片: Yanica