夏日炎炎，想嘆住冷氣掃街，葵芳廣場就係一個好選擇。而且呢度不時有新店或者新口味登場，好似今次開飯仔就幫大家搵嚟4間餐廳，由台式甜品食到IG大熱蛋糕，再食香口小食最後飲返杯加咗Super Food嘅花果茶，夠哂消暑！
涼浸浸手工芋圓 甜圓
綜合圓精選（$45）
之前喺三樓賣芋圓，最近搬到一樓重開，可以自己配搭唔同口味，有選擇恐懼症嘅亦可以揀餐廳推介。好似呢份綜合圓精選就有齊芋圓、地瓜圓、紫薯圓、粉圓、紅豆、燕麥薏仁同仙草凍。
大部分配料都係自家製，特別係芋圓、地瓜圓同紫薯圓都係每日手工製作，食落Q彈唔粉唔過腍，咬口唔錯而且甜味自然。紫薯圓同芋圓仲食到少少紫薯同芋頭肉呀。粉圓細細粒幾好咬，紅豆亦唔會死甜。用燕麥配生熟薏仁感覺健康啲，仙草凍都相當滑溜清爽。
甜圓果凍總匯（$30）
真係熱到無哂胃口嘅話，呢份果凍總匯或者幫到你，透明嘅檸檬蒟蒻、桂花凍、紅棗凍再配蘆薈同仙草凍，睇到就覺得透心涼！
檸檬蒟蒻酸味突出，感覺清新自然。桂花凍略甜，食落有桂花香又有一粒粒桂花口感幾得意。紅棗凍唔太甜兼一樣食到紅棗肉。怕唔夠甜嘅話兩款甜品都可以配黑糖水。自己帶盒嚟裝嘅話可以減$1，慳錢兼支持環保嘛。
驚喜芝士流心蛋糕 Miss Marble
海鹽芝士奶蓋流心蛋糕（6吋 $418）（另4吋 $340，8吋 $638）
相信唔少鍾意相機食先嘅Foodie都已經試過佢地嘅雲石流心蛋糕。而最近佢地出咗呢個新口味：海鹽芝士奶蓋！選用新鮮雞蛋、日本低筋麵粉製作嘅戚風蛋糕，上面淋上用澳洲香濃芝士整嘅海鹽芝士奶蓋醬，最後再加榛子粒粒。
一切開，裡面嘅醬就立刻湧出嚟！拍片視覺效果一流。食落戚風蛋糕鬆軟，食得出有彈性，而且甜度得宜。最特別嘅係個海鹽芝士奶蓋醬，富芝士香之餘又唔會太甜太膩，少少鹹味帶起奶香，口感亦算柔滑。加埋榛子粒增加口感層次同果仁香味，值得推介。一個人要食哂係難嘅，建議搵多兩三個朋友食個4吋裝。
更多【掃街熱點】： |
香口炸芝士+鮮奶 潮食閣
（上）極邪惡芝士拉絲棒（$18）（$28/2條），（下）脆味炸鮮奶球（$24/7粒）
三樓新開小食店，最多人嚟邪惡拉絲（嗱跟返個小食名咋），上面係芝士下面係腸仔，芝士炸過之後的確可以拉得好長，食落口感外脆內煙韌。而炸腸仔就不過不失啦，配埋千島醬或者沙律醬一齊食係香口嘅。
而炸鮮奶一樣夠哂脆，裡面嘅牛奶球仲係小店自家製，即叫即炸。難怪食落有奶香得嚟唔死甜，而且都幾滑。可以揀加煉奶或者朱古力醬，細細粒Bite Size方便食，兩三個朋友一齊開心Share就啱哂。
好飲Super Food涼茶 Silence Universe
川貝紫無花果雪梨茶（$26）
食完熱氣嘢不妨飲返杯涼茶？就喺潮食閣斜對面就搵到呢間主打手工涼茶同花茶嘅飲品店，特別推介佢地嘅天然花果茶，都加咗Super Food。呢杯川貝紫無花果雪梨茶非常足料，一杯就有差唔多一個雪梨，加埋川貝就有清潤嘅功效，最啱食完一堆熱氣或者辣嘢嘅朋友仔。
而且店主特別將美國紫無花果打成碎，飲落有一粒粒香糯口感。紫無花果含豐富花青素，可以幫助抗氧化，同時對血管、皮膚都有益處。
奇亞籽洛神花紫貝天葵（$25）
而呢杯紫色嘅洛神花紫貝天葵飲落酸酸甜甜咁，有少少似利賓納嘅味道都幾開胃。而且洛神花有抗氧化功效，紫貝天葵就有助消化，掃街一唔小心食多咗飲返杯就啱啦。
想減肥嘅朋友仔都可以飲，皆因加咗有機奇亞籽，佢嘅纖維特別高，飲咗之後可以增加飽肚感，間接幫到你減肥！而且呢度嘅花果茶同涼茶都係店主每朝煲好再放落雪櫃，凍飲唔洗加冰，嗌返杯慢慢嘆感覺都健康啲啦。
甜圓
葵芳葵富路7號葵涌廣場1樓65A號舖
Miss Marble
葵芳葵富路7號葵涌廣場2樓2015號舖
潮食閣
葵芳葵富路7號葵涌廣場3樓Top世界T23-T25號舖
Silence Universe
葵芳葵富路7號葵涌廣場3樓Top世界3069-T10號舖
文、相、片：Cathy