糧尾打氣!5間尖沙咀平價飯堂推介
2019-06-24
「平時夜晚食好西、飲嘢就話約人去尖咀啫,而且又係遊客區,一定冇平靚正嘅嘢食啦~」不過,尖沙咀嘅打工仔又唔使咁絕望嘅,就算係糧尾都唔使感到孤單,皆因喺尖咀都有唔少平價美食收收埋埋咋,而lunch放飯嘅平價選擇就仲多!

抵食高質漢堡小店 嘉寶漢堡
成日有個錯覺,喺香港地要食個過百蚊嘅漢堡先叫有返啲質素,但原來尖沙咀嘅呢間漢堡小店就打破咗「靚漢堡,高定價」嘅定理,提供性價比超高嘅高質漢堡。店內豬、 牛、羊、雞同蝦都有齊,十幾款都各有特色,就好似烤布利芝士、黑松露之類,大約$40-50左右,套餐小食都係加多十幾蚊,而且薯條部份仲見到連住薯皮,口感厚實,有薯味,仲係即叫即炸㗎!

花多眼亂刁鑽車仔餸 靚靚 不一樣的車仔麵
標榜全店食物不加味精,炸物油每日更換,湯頭呷兩啖都唔口渴。而且呢度無論係湯底、麵底定車仔麵餸,都不時都會有新菜式,選擇真心花多眼亂。特別介紹黑毛豬叉燒,肉質結實、蜜汁夠多,酒槽豆腐,坊間少見。仲有唔少得意小食,例如連分子料理,黑魚子醬提子包都有得食,簡直就係精緻版車仔麵店。

平價大份西餐 I Café
呢度嘅嘢食份量十足,lunch set最平四十零蚊,午餐會經常換款。喺尖沙咀地段,但價錢親民,加上質素唔差,所以都幾多人食。大食一族叫個邪惡特濃芝士鮮茄焗豬扒意粉就最啱,芝士多,豬扒夠大塊!OL或者keep fit人士就可以揀啲輕食嘅bakery food、沙律咁,都係三四十蚊。而且仲有唔少人話呢度嘅咖啡亦有水準,latte仲有拉花㗎!

懷舊碟頭飯 光榮冰室
呢間港式懷舊冰室,雖然夜晚嘅煲仔飯幾出名下,但都驚糧尾緊嘅大家唔捨得食$70蚊嘅煲仔飯,咁就介紹返lunch先啦~月頭先去食煲仔飯!話說呢度嘅快餐都係$50左右,而且味道一啲都唔頹。秘製醬油叉燒煎蛋飯,流心煎蛋,加上叉燒份量多,加埋豉油撈白飯,正!另外蔥油雞扒飯都好正,雞扒一啲都唔鞋,蔥油仲係撈飯神器添。

必食洋蔥豬肉餃 阿芳上海餛飩
溫馨提示,想極端地慳錢嘅話等到下午茶仲抵!呢間餐廳專做餃子、上海小食同麵食。而最多人叫嘅就係洋蔥豬肉餃。推介湯餃,因為個上湯底幾甜,仲有少量櫻花蝦提鮮。細食嘅人可以選擇輕食套餐,細份啲價錢亦平啲。餃子可以配麵、配年糕,仲可以加錢配小食,例如拍青瓜、四喜烤麩、蒜泥白肉等。

文:Yanny

Keyword
尖沙咀
漢堡
車仔麵
冰室
餃子
開飯專題
開飯仔為你提供各類型最新飲食情報及優惠,全面照顧你的飲食喜好。
Restaurant Info
Show More
Show Less
Monthly chart
The Results of OpenRice Best Restaurant Awards 2020
2020-06-30
OpenRice Best Restaurant Awards 2020 - Prestigious Awards Goes to Mamaday
2020-06-30