最近大家都飛唔到日本住，不過唔使怕，呢間來自日本橫濱嘅超人氣蘋果批店Mille Mele Tokyo正式進駐銅鑼灣，香港嘅朋友都有好味蘋果批食啦！餐廳創辦人Marco Paolo Molinari來自意大利北部傳統料理世家，24歲移居日本後獲得多個世界級料理比賽獎項，出品必定有保證！
蘋果批由批皮至吉士忌廉，都遵從意大利傳統製法。多層重疊嘅原創批皮、為咗保留爽脆質感而以大片切法而成嘅蘋果，仲有以牛奶加上鮮濃蛋黃融合而成嘅吉士醬，再配搭清新輕盈嘅豆乳忌廉，甜度適中，就算怕嚐甜嘅朋友都可以一試。
首先講吓個批皮先，烘焙師喺烤焗蘋果批前，會預先將雲呢拿糖漿塗於蘋果批表面，令批皮更香甜鬆脆，而且充滿牛油香氣。蘋果方面選用香料蜜餞富士蘋果，特意採用厚片切法加入多種秘製香料慢煮而成，味道酸甜多層次，口感仲好爽脆。
焗蘋果批後就會用機器唧入吉士醬，吉士醬由日本空運直送，再經過二次烤焗後，唧埋採用豆乳製作而成豆乳忌廉，味道清新，可以中和吉士甜味添～
除咗招牌蘋果批，千層牛油脆粒都值得一試，口感酥脆，好易一粒一粒食上癮！飲品的話有新出嘅接骨木花梳打同蘋果梳打呀～
地址: 銅鑼灣霎東街33號地下4B號舖
文: Yanica
相、片: Calvin Kwok