聖誕節、新年呢啲期間真係好多嘢食，今日開始喺灣仔又有個室內場嘅冬日食の祭，門口佈置到好似日本神社咁，場內又有日本浴衣可以借嚟影相，仲有幾個食品攤檔即製日式小食，同大量日本零食！

一大煲伊勢海老味噌湯入面，真係浸住一隻隻波士頓龍蝦㗎，湯底係赤麵豉湯嚟，再加木魚水、蔥花、海帶等，每碗都有半隻龍蝦，啲龍蝦仲好多膏下。熱熱地飲，暖下手又暖下身都唔錯。

另外隔籬幾個攤檔，分別有即叫即燒嘅帶子海膽燒、燒日式年糕同埋玉子燒。帶子海膽燒，放上海膽之後會再用火槍輕輕燒一燒；日式年糕就有紅豆同紫菜味揀；而玉子燒呢就有原味、明太子同帆立貝三款口味。

行入少少，仲有章魚燒同大阪燒嘅檔位。章魚燒同平時見嘅有少少唔同，唔係得一粒仔喺入面，而係原隻章魚呀，啲爪仲凸出嚟，望落就好似隻大章魚咁。而大阪燒就喺蛋漿上加入豚肉、野菜等材料，正反兩面翻幾翻，師傅會拋鑊翻㗎，最後唧埋豬扒汁、蛋黃醬，灑埋木魚花、紫菜粉就大功告成。

呢啲小食，買走食又得，拎出去場外，望住個無敵大海景悠悠閒咁食都得。

講多樣嘢你哋知，日本新年咪好興賣福袋嘅，呢度都有呀，仲提早到12月25號聖誕當日就開始有得賣，限量100個。福袋裡面有各款嘅日式零食、飲品，幸運仔嘅話，仲有機會抽中新年限定版可口可樂、日本卡樂B特別口味薯片之類！

詳情
築地・山貴水產冬日食の祭
地址：築地・山貴水產 – 灣仔碼頭二樓
日期：12月22日至2018年1月21日
時間：中午12:00 – 晚上10:30

文、相：Kar