食物嘅味道同營養健康，絕對可以並存！有唔少西餐廳喺食材選擇方面落足心機，即使成本可能要貴少少，仍然堅持選用各種有機食物、純天然食材等，再精心配搭自家製醬料，食得健康之餘亦可滿足味蕾！

Boire et Manger （灣仔）

主打法國菜嘅Boire et Manger，環境寬敞又夠光猛，以原木為主調，坐得幾舒服。加上菜式份量夠大，好適合一班朋友去聚餐，特別係注重健康嘅朋友，因為呢度大部分嘅食材都選用有機食物，意粉更係自家製嘅添。

藜麥牛油果沙律

大大碟嘅沙律擺碟精美，色彩繽紛，一望全部都係健康嘅蔬果同superfood（超級食物），包括牛油果、柚子、蕃茄、石榴、沙律菜等，仲有海量嘅藜麥托底。牛油果嚟自墨西哥，果肉軟綿，口感creamy，連埋酸酸地嘅柚子、軟身嘅水牛芝士同粒粒韌度適中嘅藜麥一齊食，口感非常豐富。

日本黑豚腰肉（350 gram）

350 gram 嘅黑豚肉絕冇欺場，外層燒至脆口，內裡肉質依然軟腍，仲好有肉汁。大廚更特地調配咗個自家製芒果莎莎醬配輕輕燒過嘅香梨伴碟，以其酸酸甜甜嘅味道中和返啖啖肉嘅膩感，好有心思。

烤法國雞 （半隻）

半份嘅烤雞甫上枱，已經傳出陣陣香味。師傅嚴格挑選嚟自法國農場嘅有機雞隻，用多種香料醃製同烤焗半個鐘，令到各種香料完全滲入雞肉當中，鹹香惹味。而如果你有留意到，呢度嘅菜式，好多時都會有多種蔬食做伴碟呢，記住食肉之餘都要食埋菜先至夠健康=)

格陵蘭鱈魚配雜錦海鮮

海鮮控必點菜式，呢度一碟就有5種海鮮啦，主角當然係嚟自格陵蘭寒帶海域嘅鱈魚，厚厚嘅魚肉既鮮且甜，師傅仲預先起晒骨添，夠貼心呢。另外仲有青口、帶子、大蝦同埋蜆肉，款款新鮮。而全碟最有驚喜嘅，係自家製嘅海鮮醬汁啊，魚鮮甜味突出，絕對係錦上添花！

日本板腱和牛排（250 gram）

板腱和牛排嘅肉質一般較為實淨，但同時肉味香濃，大廚炮製嘅燒汁令佢更為香口。切開時見肉色仍然粉嫩，食落仲好juicy添~ 

Kinship（中環）

上年開業嘅西餐廳Kinship來頭唔細，由美國、英國名廚Chris Grare、Arron Rhodes主理，Arron Rhodes更喺多間米芝蓮星級餐廳做過主廚添。兩人皆重視食材來源同食物質素，以Farm-to-table嘅理念，盡力選用由農場直送到餐廳嘅純天然食材。

橄欖油煮銀鱈魚配芫荽薑蓉、檸檬非洲小米及薯仔慕斯

以橄欖油煮過嘅銀鱈魚，肉質緊緻，味道香甜，放喺檸檬非洲小米（cous cous）上，增加口感之餘亦有種小清新。旁邊嘅綠色醬汁則以芫荽同薑蓉混製而成，微辣滲香。

香燒西班牙八爪魚配油醋培根及苦苣杏仁沙律

至於西班牙八爪魚，製作功夫都唔少，又烤又煎，面層帶有微微嘅焦，令人食指大動！橘黃色嘅醬料係源自西班牙加泰隆尼亞區嘅romesco醬，甜中帶微辣，有層次感。

挪威三文魚伴薯仔、焦糖洋蔥及新鮮豌豆

三文魚皮煎至香脆，咬落卜卜聲，而魚肉保持鮮嫩，兼且帶有油香。底層嘅泡沫係帶有甜香嘅茴香汁，無論喺視覺效果定味道層次上都為整道菜式加分！

沖繩豬柳配炭烤蕃茄醬、粟米沙律及濃縮羅望子醬

一片片嘅沖繩豚肉肉色粉嫩，肉質軟腍，仲保留大部分肉汁，好juicy。師傅喺配搭嘅配菜同醬料方面亦落咗唔少功夫，酸酸甜甜嘅醬汁，有助減輕膩感，做到香而不膩。

Mr. whippy 雪糕

完美嘅一餐當然要以甜品作結，Mr. whippy 雪糕幾乎係每枱必食嘅甜品，喺自家製嘅雲呢嗱雪糕上，淋上酸咪咪嘅莓果醬，仲有幾塊脆口窩夫同白蘭地脆餅，一啖食盡甜、酸、軟、脆，口感豐富。

心動不如行動！有興趣就快啲約埋三五知己去嘆下美食！快啲bookmark定啦！

*以上圖片只供參考，所有食品以實物為準. 食品供應因餐廳而異