唔少人都鍾意去東南亞旅行，泰國曼谷就係其中一個熱門旅遊點，每日瘋狂Shopping、做massage、食好西是常識吧。開飯仔專誠搵咗泰國當地嘅同事為大家搜羅在地人最推介嘅美食！

曼谷喺前年終於登上米芝蓮嘅推介榜內，而喺上年就有4間二星餐廳同21間一星餐廳，今次就帶大家去其中6間睇下。

傳統泰菜  Bo.lan
米芝蓮一星餐廳(2018-2019)
價錢：晚巿套餐，由THB 3280到THB3680都有

呢間傳統泰菜係由一對夫妻主理，Bo.lan喺泰文有「古早」嘅意思。餐廳同當地農民合作，使用多款原材料，上年仲係零碳餐廳之一。招牌菜有醬料拌麵、海南雞等，而佢哋亦會按照時令不定期咁更換menu，食之前如果想睇定個menu，可以上官網啊。

Fine Dining   Le Du
米芝蓮一星餐廳(2019)
招牌菜：河蝦配蝦醬糙米飯
價錢：THB 3,590(六道菜)、THB 2,990(4道菜)

上年首次晉身米芝蓮，餐廳一向使用當地農夫嘅產物作食材，以現代烹煮技術呈現傳統泰菜。招牌菜河蝦配蝦醬糙米飯肉質爽嫩彈牙，好鮮甜，配埋特製咖喱汁，帶有微辣係幾開胃。

泰國南方菜 Sorn
米芝蓮一星餐廳(2019)
招牌菜：黃咖喱蟹棒 (The Forest meets the Sea, Gems on Crab Stick, Fresh Yellow Curry)
價錢：THB 2,700 (22道菜)

 圖：餐廳網站

 新摘星餐廳，食材嚟自泰國南部14個省份，辣度較平時食開嘅泰菜強。Menu會按時令更換，其中黃咖喱魚配山竹果係幾惹味嘅一道菜，辛辣中帶絲絲果甜。想試嘅話記得要提早卜位，而且佢哋淨係接受電話（+6699-081-1119）預訂咋。

高級泰國料理 Saawaan
米芝蓮一星餐廳(2019)
價錢：約THB 2,450 (十道菜)

 圖：餐廳網站

呢間位於曼谷中心地帶嘅高級泰菜料理，只得24個座位，晚餐提供十道菜menu，每道菜都係使用傳統泰國料理嘅技巧/概念去製作，例如炒、燒、蒸等，而且一直堅持只會用當地出產嘅食材。餐廳更設有wine pairing同tea pairing，一眾酒迷同茶迷不妨去試試。

高級正宗泰菜   R.Haan
米芝蓮一星餐廳(2019)
價錢：THB 2,512 - THB 2,912不等

 圖：餐廳網站

餐廳主廚有30幾年料理經驗，仲曾多次擔任泰國廚藝比賽節目嘅評審，有唔少人都會慕名前來，一嚐佢哋主打嘅正宗泰菜，包括有皇室菜、經典菜等，而且擺碟仲好靚，用泰國傳統瓷器裝盤盛載，完美咁融合食物同藝術。

摩登泰菜  Issaya Siamese Club
米芝蓮The Plate推薦(2018-2019)
招牌菜：黃咖喱羊腿肉

呢間泰菜餐廳，由內到外到返內都係充滿打卡位。一行入去已經好有森林嘅感覺，設有室內同室外用餐區，有種好似置身大自然嘅感覺，好relax。呢間餐廳附近仲有個自家種植嘅香草園，啲香草可以用返嚟為菜式調味！除此以外，佢哋亦會喺傳統泰菜基礎上加以創造，例如沙律就砌到成個塔咁，仲加入酥炸香蕉花，使之口感更豐富；而慢煮羊脾肉質軟腍，淋上黃咖喱更加香口。