平時講到養生通常都係中菜多，原來日本菜都可以加入養生元素！呢間新開嘅串燒居酒屋就主打一系列以水果入饌嘅定食同小食，酸酸甜甜夠開胃而且可以減少使用砂糖。串燒都好有特色，招牌釀雞翼先拆骨再釀入雞髀肉，皮脆肉彈！
 

夜館位於深水埗，老闆請嚟有多年日本餐廳經驗嘅大廚坐陣，供應全日定食、小食、串燒等。選擇唔算非常多，但大部分都加入創新元素，好似用蘋果同橙調味，減少用糖同日本調味料，更健康之餘亦可以降低成本，盡量以街坊價吸引大家嚟食！
 

農家蟹皇撈飯配蘋果叉燒（$98）

廚師介紹嘅係呢份農家蟹皇撈飯配蘋果叉燒全日定食，農家蟹皇其實係用農作物，好似甘筍或者南瓜加上薯仔，加上蟹汁等調味再壓成泥，蔬菜嘅甜味加上蟹汁嘅鹹鮮，撈飯食的確一流。
 

而叉燒就用梅頭肉，以餐廳自家調配嘅醬油加新鮮蘋果片熬煮，中間一滴水都無加到。叉燒軟腍鬆化，帶蘋果香所以完全唔膩。而且全日定食包埋味噌湯、前菜、沙律/水果，好似拍攝當日係橙，廚師會剝埋果肉出嚟，好細心。
 

果味雞扒丼（$55）

另一推介係果味雞扒丼，叫就叫雞扒丼，其實有兩隻雞翼加雞扒，加自家製蘋果醬油煎煮後再加入橙肉。秘訣係加咗少少蔗糖，咁就完全唔使加任何雞粉或者味精。雞扒肉嫩多汁，加埋甜甜地嘅醬油又係最啱送飯。
 

十勝豚丼（$58）

小店最受歡迎嘅定食之一，選用十勝豚肉煎至金黃色，再加入秘製燒汁：裡面有醬油、麥芽糖同水果，食落多咗一分豬肉嘅脂香，配埋燒汁香而唔膩。
 

 

夜館特色釀雞翼（$38）

居酒屋另一主打係串燒，呢款釀雞翼就先拆咗雞翼一邊骨，再釀混合咗山藥同杞子嘅雞髀肉！廚師特別加入藥膳元素，山藥有助補陰生津，杞子就可以養肝明目。燒嘅時候亦係用無防腐劑嘅醬油，食起嚟皮脆肉彈，而且仲有肉汁啊。
 

迷你雞春卷（$38）

同樣係混合咗山藥同杞子嘅雞髀肉，今次拍檔改為蔥同春卷皮，炸成金黃香脆嘅迷你雞春卷。特別配搭沙律菜同沙律醬畀大家點埋一齊食，少肉多菜，咁就算係炸物都可以食得健康啲啦。
 

鹽燒牛舌（$38）

鹽燒牛舌就唔少居酒屋或者燒肉店都會有，呢度嘅牛舌燒過亦的確相當彈牙富牛香。不過重點其實係加入用攪拌機打碎嘅橙肉嘅醬汁，酸味清新解膩又唔會蓋過肉香，值得一試。
 

燒焦糖菠蘿（$58）

最後講到串燒同水果，又點少得燒菠蘿？菠蘿Juicy微酸，加上焦糖嘅甜味，無論做開胃小食，定最後清一清味蕾嘅甜點都咁啱。
 

夜館
地址：深水埗長沙灣道54號地下4號舖

文、相、片：Cathy