香港有唔少日式串燒居酒屋，北角呢間新開嘅就主打使用香港比較少見嘅正宗明火炭爐，採用日本備長炭，特點係耐燒而且溫度穩定，可以鎖住肉汁，令串燒外脆內Juicy。加上選用日本各地時令食材，例如靜岡野生鰻魚、北海道豚肉等，風味地道。
 

Koji Charcoal Grill位於北角，餐廳中間係半開放式廚房，裡面有電爐，同請日本工匠特別設計定制嘅炭爐。主要由總廚Kenji同兩位日籍師傅主理，從選擇食材、烹調方法到醬汁製作都一絲不苟。
 

燒和牛肩沙律（$135）

品嘗串燒之前先嚟一道沙律，柔軟嫩滑嘅慢煮和牛片上面係一絲絲香蔥，同酸爽清新嘅柑橘醋啫喱。令脂肪較多嘅和牛食落毫無油膩感，口感層次豐富，酸味亦喚醒味蕾準備迎接之後嘅盛宴。
 

免治雞肉丸（$35/串）

鹽燒雞翼（$30/串）

日式串燒當中唔少得雞肉，免治雞肉丸選用四國嘅雞肉，手打雞肉混入雞軟骨增加香脆口感，以電爐燒製後配搭餐廳自家製嘅濃厚醬油，味道香甜。而鹽燒雞翼就用炭爐慢烤，唔單止可以燒出雞油，亦達至皮脆肉嫩嘅效果，只要簡單加少少鹽就夠香口。如果怕雞皮食落太油嘅話，可以加少少青檸汁平衡返。
 

豚肉包流心蛋（$42/串）

豬柳片包明太子（$48/串）

豚肉包流心蛋選用油脂豐富嘅北海道豚肉，包裹日本流心蛋燒至外面微焦，令豚肉嘅脂香同半熟蛋黃嘅蛋香喺口腔融合一齊，口感層次亦相當討喜。而豬柳片包明太子係新鮮嘅配搭，福岡豬柳片裡面係紫蘇葉用北海道明太子，先聞到紫蘇葉嘅獨特清香，然後係明太子嘅微辣惹味同一粒粒口感，細細份但滋味十足。
 

燒和牛橫隔肉（$60/串）

餐廳有唔少醬汁都係自家製作，例如呢份燒和牛橫隔肉就用蘋果、蕃茄等調配秘製牛肉醬汁，味道香甜濃郁。配搭肉味香濃、口感爽彈嘅澳洲和牛橫隔肉就啱啱好。
 

 

炸蝦卷（$75）

呢個嘅醬汁更有驚喜！用杯裝住嘅白色醬汁其實係非常輕盈嘅忌廉蜆汁泡沫，鮮甜香滑。當然主角炸蝦卷亦唔普通，以酥皮幼絲包上鮮蝦再油炸，保留蝦肉嘅彈牙，亦增加一層蓬鬆香脆嘅口感，所以點埋忌廉蜆汁一齊食，增添鮮味同濕潤口感，係一道令人難忘嘅菜式。
 

炭火燒鮪魚面頰（$150）

鮪魚面頰肉相當珍貴，特色係睇落有啲似肉扒，油脂豐腴、肉質軟嫩。餐廳用炭爐將鮪魚面頰肉燒至外面微焦，烹調時間到生熟度都適當拿捏得唔錯。可以先試一件原味，然後按自己口味點柚子胡椒醬或者加青檸汁減低油膩度。
 

日本蒲燒野生鰻魚（$480）

同炭火香夾嘅當然唔少得鰻魚，總廚Kenji特別選用靜岡嘅優質野生鰻魚，當地水源清澈，魚肉自然無泥腥味。而且野生鰻魚比養殖鰻魚口感更彈牙。加上蒲燒醬汁後燒至兩面香脆，色澤香氣誘人，肉厚得嚟又夠肥美。
 

炭火燒穴子（$210）

穴子又叫星鰻，外形同鰻魚相似，但其實穴子係海鰻，脂肪較少。呢度總廚Kenji用嘅係東京灣嘅穴子，用秘方處理以去除魚腥味，再用炭火烤至外皮香脆。唔需要加任何調味，可以突顯出穴子淡雅嘅香氣、細膩嘅魚肉同淡淡嘅炭香，當然亦可以選擇點少少海鹽或青檸汁提鮮。
 

炭火燒鮑魚（$220）

鮑魚亦用炭爐燒烤，口感彈牙而且成功鎖住肉汁，彰顯三位日籍師傅功架。鮑魚搭配香草牛油增加香氣，略嫌蒜蓉太多，蓋過鮑魚本身嘅鮮味。
 

金目鯛土鍋飯（$330）

最後一定要試呢個金目鯛土鍋飯，土鍋耐熱而且傳熱平均，令裡面每粒日本珍珠米都煮至晶瑩飽滿，粒粒分明而且口感煙韌。一開蓋就聞到柚子清香，然後店員會即席將炭燒金目鯛同飯一齊攪拌。飯本身用日式高湯同柚子皮去煮已經有幽幽清香，日本直送嘅金目鯛更加先用秘製醬油醃製，炭燒時會再重複刷上醬汁，味道香甜濃郁。建議大家一定要「留肚」享用！
 

Koji Charcoal Grill
地址：北角馬寶道28號華匯中心地下6號舖

文、相、片：Cathy