又有日本大師嚟香港開店啦！嚟自日本大阪嘅著名冠軍級拉麵大師林隆臣，曾經贏過三個全國拉麵冠軍嘅頭銜。今次夥拍擅長以美藝形態展現日本人氣拉麵嘅廚藝界領袖人物松村貴大，喺中環推出拉麵品牌立体派。大師話希望同香港食客分享日本地道拉麵文化，同埋展現佢地對創作拉麵嘅熱情同創意。

立体派位於中環威靈頓街一條小巷地庫，位置雖然隱蔽咗少少，但店舖外牆畫滿咗以日式拉麵為主題嘅壁畫，仲有林隆臣大師同松村貴大嘅樣，嚟食麵可以順便打埋個卡！

特級白湯拉麵($118)

湯底以日本米鴨、有機飼養嘅京都丹波地雞同埋籠目昆布熬製六小時而成，味道濃而不油膩。普通版天方白湯就有一舊簿切叉燒，食肉獸可以叫升級版特級白湯拉麵，足足有成三大塊，好滿足！另外拉麵以百分百優質小麥粉、雞湯同雞蛋自家手造，夠哂彈牙。

地立濃湯拉麵($88)

呢款湯熬湯嘅材料就同白湯係一樣，不過煮法就唔同，所以出嚟嘅味道都完全唔同架。地立濃湯嘅湯頭相對就清啲。

天方辣味白湯($88)

用白湯做基底，再加咗唔同嘅香料同肉碎，味道香而不辣，想食惹味少少可以試下呢款。

海體醬油湯($88)

呢款係大師特意從日本帶嚟香港嘅湯底，以日本醬油為主，用咗九款唔同醬油調配，有濃濃嘅醬油味之餘又唔會太鹹，啱哂香港人口味。另外配有嘅厚切叉燒炆煮多個小時，大舊又入味！

松林餃子($35)

餃子係自家製，熱辣辣配埋秘製辣椒油，辣椒油同樣都係香得嚟唔會太辣～

手工啤酒($48)

食拉麵其實都可以飲返杯！鍾意啤一啤嘅唔可以錯過呢款特別由日本引入嘅手工啤酒，仲有三款口味包括漆黑、白同瑠璃。

立体派

地址: 中環威靈頓街27-29號元益大廈地庫

文：Yanica

相、片：Tom Li