又有一間日本人氣手信店過咗嚟香港開分店呀，呢排返鄉下嘅朋友，可以買少幾份手信啦（誤）。呢間以朱古力起家嘅舖頭，佢嗰4盒士多啤梨朱古力，日本通應該好熟悉，今次香港都買到之餘，另外仲有其他幾款甜品呀。

細細件嘅半熟芝士蛋糕，一盒5件，解凍後蛋糕中間呈半熟狀態，有淡淡嘅芝士香，口感綿密，感覺唔會太膩。

呢個陶瓷罐超靚啦，食完個罐一定要儲返低！講返裡面先，罐內裝住嘅係神戶魔法之壺布甸，有3層嘅，分別係鮮奶油、布甸同焦糖醬，記得要一嗶嗶到底，咁先可以一啖食晒3種味道呀，奶香唔錯，焦糖偏甜。

人多少少嘅就可以share呢條魔法生朱古力卷蛋，都有返咁上下份量㗎。唔使怕好甜，啲朱古力反而仲有些少dark dark 地，微苦嗰隻。

朱古力嚟講，有款工具朱古力套裝，造型又真係好鬼似啲螺絲批呀、鉗呀咁，直接食當然冇問題啦，但咁大嚿，建議可以考慮預備多杯熱牛奶，將啲螺絲批嗰啲浸落去，攪呀攪，變做熱朱古力奶咁亦得。

另外呢幾款朱古力，同樣都係朱古力外層，包住粒士多啤梨脆粒，但就有唔同口味啦。綠色梗係抹茶、紅色係白朱古力、粉紅色係士多啤梨，而黑色就係可可朱古力啦。

Frantz
地址：尖沙咀河內道18號K11購物藝術館B1樓Kiosk 49
期間限定：即日至11月中旬

文、相：Kar