甜品界好消息～喺日本有多間分店，尤其以關東地區為重心嘅人氣可麗餅專門店「MOMI＆TOY'S」，近日喺太古開設香港首店，暫時引入29款可麗餅，即睇邊款俘虜你嘅甜品胃啦！
花捲造型可麗餅
可麗餅按鮮忌廉、吉士、吉士鮮忌廉以及基本款分為4個系列($36起)，再搭配各種水果、配料或醬料，例如白桃、焦糖芝士曲奇、雙重朱古力等。而日本甜品出名造型靚，呢間專門店就將可麗餅細心做成花捲造型，令人未食先興奮！人氣推薦「炙燒焦糖吉士鮮忌廉可麗餅」，喺吉士餡料上面撒上砂糖，再用火槍輕輕燒出一層香脆焦糖，內裡包住濃郁香甜嘅吉士同幼滑鮮忌廉，一啖入口令人大滿足！
人氣炙燒焦糖吉士鮮忌廉可麗餅($49)｜招牌之一草莓香蕉朱古力鮮忌廉可麗餅($53)
橙酒調配鮮忌廉
出色嘅甜品唔會死甜，店家喺餅皮同鮮忌廉都落足功夫！日式可麗餅皮即叫即製，選用高比例高級杏仁粉取代傳統小麥麵粉，烤至金黃色都依然軟綿鬆化。另外不可或缺嘅鮮忌廉每日新鮮製作，仲會根據可麗餅皮嘅口感，特別加入微量橙酒調配，令鮮忌廉更加輕盈滑順，無論掃街時食或做飯後甜品都咁正～
薄薄嘅餅皮同鮮忌廉係可麗餅嘅靈魂｜圖：店舖(IG)
圖：店舖(IG)
MOMI＆TOY'S
地址: 香港太古太古城道18號太古城中心2樓202號舖
文：Cathy
