新界同九龍嘅朋友，終於唔洗過海都食到呢個從台灣過江嘅可頌（Croissant）啦！品牌繼上年進駐太古後，聽日將會喺將軍澳開第二間香港分店！新店限定嘅焦糖布丁可頌、期間限定嘅榛果馬卡龍可頌、新出嘅黃金鹽羅頌等都等緊大家去試呀。
 

八月堂香港第二分店位於將軍澳坑口東港城，半開放式唔單止可以清楚見到可頌款式，後面焗爐不時亦有可頌新鮮出爐，香氣環繞非常誘人！品牌秉持日本職人理念，嚴選頂級食材：歐洲頂級天然牛油、日本百年品牌麵粉，同ISO認證雞蛋。
 

新店必試口味！

焦糖布丁（$23）

喺品牌熱賣原味蜂巢可頌當中加入幼滑卡士達醬，放上Q彈布丁後再唧上太妃焦糖醬。香甜十足，口感層次豐富。
 

榛果馬卡龍（$22）（9/3-9/5限定）

最新期間限定口味，會先喺將軍澳新店發售，稍後太古店都會有嘅。可頌上有榛果醬、榛果粒、馬卡龍粉，焗香後再撒上糖霜點綴。可頌牛油香同榛子果仁香相當夾。
 

黃金鹽羅頌（$38）

品牌之前都係主打可頌比較多，新店特別引入台灣舊年年底新推嘅黃金鹽羅頌！同切面呈蜂巢狀嘅可頌唔同，羅頌唔單止比較大，切開亦係比較實心，口感比較濕潤富彈性。嚴選法國奶油、石安牧場雞蛋、新鮮酵母、美國海鹽等食材，外面帶鹹味，而裡面微甜富奶油香。
 

常設口味簡介

蜂巢可頌（$15）

無任何配料，原味最簡單，亦係最能夠突顯其蜂巢狀組織嘅可頌，富天然奶油香。
 

朱古力可頌（$18）

可頌麵團亦特別加入朱古力，加埋朱古力餡係雙重朱古力滋味。
 

白色莊園（$16）

蜂巢可頌搭配白朱古力脆面，最後以抹茶粉點綴。
 

皇家爵士（$18）

黑朱古力甜中帶少少可可苦味，再加上杏仁，台灣熱賣口味之一。
 

紅粉戀人（$18）

粉紅色賣相相當有少女心，可頌表面係士多啤梨朱古力同士多啤梨果乾。
 

雪花檸檬（$18）

一點點白色雪花其實係加入新鮮檸檬汁嘅糖霜，酸香清新。
 

炙燒明太子（$18）

人氣鹹味可頌，可頌外面同中間都加入鹹香明太子醬。
 

香濃起司（$19）

可頌上面係芝士片，裡面亦有芝士餡，趁熱食會有熔岩效果！
 

香蔥味噌（$19）

創新搭配之一，可頌裡面放入蔥花、味噌同芝士粉，上面再以芝麻點綴。蔥花嘅爽脆同可頌嘅酥脆意想唔到又幾夾。
 

迷戀卡士達（$20）

可頌中灌入混有天然香草籽嘅卡士達醬，口感柔滑，增加口感層次之餘又有爆漿口感。
 

曜黑胡麻（$20）

可頌麵團加咗竹炭粉同黑芝麻，而裡面就係手工黑芝麻餡，所以芝麻香十足。
 

法式莓果（$19）

可頌掃上一層用新鮮覆盤子同檸檬汁調製嘅淋醬再烤焗，脆面酸甜有致。
 

八月堂
地址：將軍澳坑口重華路8號東港城商場1樓162號舖
^2019年3月9日14:30開張

文、相、片：Cathy