新年要養生!健康主題餐廳6大推介(有片)
2020-01-29

農曆新年食咗唔少大餐,加上最近又有武漢肺炎、冬季流感等個案,係時候提提自己要食得健康啲啦!出街食飯唔一定就係多肉少菜或者唔健康嘅。除咗滋潤燉湯,開飯仔再介紹多6間以健康同養生做主題嘅餐廳畀大家,記得Bookmark定啦。
 

純天然養生茶 好茶養生


圖:Purple RabbitKikivicki

有時想飲杯養生花茶,但搞唔清楚功效又或者忙到無時間買材料?呢個品牌喺旺角嘅實體店可以幫你揀返啱心水嘅養生茶再沖埋畀你!例如最近大家想預防肺炎感染,就可以飲清肺養肺、止咳化痰嘅桂花雪梨茶。所有食材純天然零添加,無人造色素亦唔加防腐劑。
 

一汁三菜定食+甘酒雪糕 蜜庵本膳


日本飲食文化嘅「一汁三菜」即係一碗湯同三道菜配飯,講究營養均衡、味道同食材多樣化。呢間餐廳就有供應午市自選三主菜定食,主菜會不定期更換。另一推介係甘酒美人軟雪糕,餐廳用北海道直送生麹自家發酵,無酒精而有多種營養,包括維他命B、氨基酸、酵素等。
 

新鮮本地食材美食 Asaya Kitchen


呢間餐廳位於酒店嘅都市康體概念中心裡面,供應一系列以地中海健康飲食文化為靈感嘅菜式,而且盡量選用遵循有機耕種原則嘅本地農場嘅蔬菜、水果。精選推介包括自家製乳酪、烤大蝦法式三文治配壓碎牛油果、原條烤魚等,仲可以配返杯有機雞尾酒。
 

更多【開飯專題】:
1. 冬天滋潤靚湯 5大燉湯店推介
2. 最chill假日 6間Brunch推介
3. 迎接全新2020 1-2月下午茶推介

 
有機蕃茄沾麵 The Tomatoman


呢間東京過江龍主打蕃茄沾麵,沾湯用雞、豬、野菜、蕃茄分別熬煮,混合再加上有機意大利蕃茄肉煮成。蕃茄有豐富嘅茄紅素可以幫助抗氧化同預防心血管疾病。香港限定嘅香菜蕃茄汁撈麵仲加上本地新鮮芫荽,芫荽有豐富膳食纖維、維生素A同C呀。
 

暖笠笠穀物碗/薄餅卷 SaladStop!


香港其實都有唔少沙律店,呢間嚟自新加坡嘅過江龍唔單止可以畀大家自由配搭心水沙律,仲有熱食嘅有營穀物碗!畀大家冬天嘅時候都食到唔同蔬菜同蛋白質,以藜麥為主,有三款招牌口味選擇,亦可以自己挑選五款配料。而且可以轉做薄餅卷,暖笠笠之餘仲方便單手食。
 

純素軟雪糕+蔬菜捲 DAMA


呢間輕食飲品店最受歡迎嘅就係佢哋嘅純素軟雪糕!每日都有唔同口味選擇例如80%紅肉火龍果、馬來西亞貓山王榴槤、頂級西西里島開心果等,最抵讃嘅係軟雪糕同雪糕筒都無牛奶或雞蛋成分。蔬菜捲都係即叫即製,包好壓至微熱,配搭裡面嘅亞洲風味醬汁好滋味。
 




文、片:Cathy

Keyword
養生茶
定食
蕃茄沾麵
穀物碗
純素雪糕
養生
尖沙咀
開飯專題
開飯仔為你提供各類型最新飲食情報及優惠,全面照顧你的飲食喜好。
Restaurant Info
Show More
Show Less
Monthly chart
Delicious USA Introduces Spectacular Dishes across 25 Restaurants
2020-07-22