Bagel低糖、低脂、低膽固醇，口感煙韌又夠飽肚，絕對可以稱得上係健康之選；佢嘅身影成日都出現喺美劇中，台灣近年更掀起過一陣「貝果風」，bagel被視為「文青必食」、「生活態度」，令唔少香港人都大為心動，開始愛上呢種美食，話說香港都開咗唔少Bagel店，就等開飯仔帶大家試下啦！
足料天然Bagel R&R Bagels
圖﹕返工之前想為自己打打氣？咁不如食返個豐富嘅bagel啦！呢間專門店共提供8種口味嘅bagel，包括芝麻、全麥、桂皮提子、風乾番茄等，食落好fresh，口感紮實。餡料有煙三文魚、雞胸肉等，推介牛油果加feta cheese，牛油果香非常濃郁，配埋芝士，個味就更有層次啦！
嘆啡食Bagel Polygon
圖﹕Blackcanary、Polygon Instagram專頁
港島出名多隱世coffee shop，呢間望落簡單，但除咗賣咖啡之外，仲有bagel添呀！呢度嘅bagel走簡單健康風，可選擇牛油果、煙三文魚等，加入嘅材料比較少，但反而更突出到bagel嘅原味，烘得脆卜卜，帶著淡淡嘅麥香，嘆埋杯咖啡就fit晒啦~
牛油果蛋Bagel 梔子
圖﹕呢間餐廳走簡約文青風，成個環境都相當舒服，啱晒同friends慢慢傾偈~介紹返佢哋嘅bagel，有牛油果蛋、煙三文魚、燻牛肉3種口味，當中以牛油果蛋最受歡迎，清香嘅牛油果，中間夾隻太陽蛋，一切落去少少蛋漿流出嚟，好治癒呢~
共14種口味 T.H.E Deli Blendit
圖﹕soya1314
呢間舖頭主打「健康飲食」，提供唔少健康食品，當然唔少得bagel啦！全手工製，口味相當多元，例如紅菜頭、焙茶、罌粟籽、墨西哥辣椒等，共14種口味，唔係度度都可以食到呀！如果想帶返屋企整早餐食嘅話，佢哋仲提供急凍bagel添，可以放2-6個月~
本地人手製 Bagels Alley
圖﹕怕食Bagel唔夠飽？！呢間專門店嘅份量認真多呀！由本地人手製造，無油少糖，保證健康！佢哋嘅招牌煙燻牛肉bagel，有牛肉、酸瓜、蕃茄、芝士等，有三大塊厚切牛肉，煮得夠腍身，再配上清新嘅蔬菜、芝士，食落一啲都唔膩！
慢煮雞胸Bagel 留白
圖﹕呢間餐廳嘅bagel連食肉獸都可以滿足到！提供煙燻三文魚、慢煮牛、慢煮雞胸等口味，配埋蕃茄、沙律菜等，特別推介慢煮雞胸bagel，嫩滑嘅雞胸肉，簡單咁用黑椒調味，夾埋鹹忌廉、蔬菜咁食，口感同味道都會唔dry~
文﹕Kiko