生日或紀念日呢啲日子，最煩惱就係去邊間餐廳食好呢～開飯仔搜羅全港最啱慶祝特別日子嘅餐廳畀大家，亦有部分係特色限定套餐，記得要留意返供應嘅日子呀。
12月23日更新
江戶前天婦羅×鐵板燒料理 鉄板焼．天ぷら 旬
落戶四季酒店嘅日本高級餐廳，由逾30年經驗嘅鐵板燒主廚神子仲康主理，聯同天婦羅匠人本鄉雅志聯手供應融合日本江戶前天婦羅同精緻鐵板燒料理。午市設有個別套餐，以及二合為一嘅晚市廚師發辦。神子師傅最有名嘅靈魂菜式鐵板燒和牛，嚴選日本熊本和牛製作，配上鐵板炒過嘅脆蒜片，肉汁豐富好香口。的江戶前風味天婦羅料理以日本海鮮為主，當中海膽、當季車海老同甘鯛都係本鄉師傅嘅招牌菜啊。
高質私房菜新貴 大宅
全新中式食府近日開業，唐述總廚周世韜師傅擔當顧問，夥拍擁有超過30年中菜經驗嘅吳震霈師傅掌舵，以保留食材原汁原味為宗旨，將中華美食結合家嘅溫暖感覺。現時特別推出嘅「耀」嚐味餐單包括9道菜，如佛跳牆、花膠海參黃魚羹、蟹黃銀針燴蟹鉗、乾燒麻香鮮鮑魚等鮮味菜式。開業期間凡4位或以上預約午市時段，即送糟鹵花雕生醃蝦、享免茶芥同加一服務費；凡8位或以上預約午巿或晚市時段，則送「大宅追月」（即特大煎堆）、享免茶芥同加一服務費。
高級食府×經典菜餚 國金軒
秋冬菜式：由即日起供應至12月31日
龍皇吉品鮑魚燕：由即日起供應至2025年1月下旬
冬天有咩傳統中菜？蛇羹絕對係不二之選！中環店「秋風起，三蛇肥」，推出傳奇名廚、江太史家廚傳人李煜霖主廚嘅太史五蛇羹、古法雙冬羊腩煲等滋補暖胃秋冬菜式。另外2位起嘅「龍皇吉品鮑魚燕」套餐，則以鮮甜龍蝦、溏心南非吉品鮑以及名貴官燕等上乘食材入饌，帶嚟高級嘅經典風味。
10月23日更新
天台變身意式戶外電影院 Sophia Loren - Pellicola Theatre Lounge
灣仔地標和昌大押天台，由2024年10月至2025年3月，逢星期三、星期六同星期日8:15pm，天台會變身為電影放映空間，播放經典電影配埋套餐～門票有兩種，都會包括入場觀影、租借耳機、一杯自選有酒精或無酒精飲料，以及享用無限量供應爆谷；而升級套票就有埋即叫即整薄餅一份，提供Margherita番茄羅勒水牛芝士薄餅、Capricciosa意大利火腿薄餅、香辣Piccante辣肉腸薄餅畀大家揀，要揾節目嘅朋友不妨一試。
夜間早午餐體驗回歸 都爹利會館
中環店嘅夜間早午餐體驗返嚟喇～除咗客廳用餐區，你亦可以選擇喺好chill嘅花園露台享用無限量供應嘅粵式點心、鮮果汁同汽水。招牌創意點心包括筍尖蝦餃皇、北京烤鴨、海鮮酸辣羹、香芒楊枝甘露等，款式好豐富。
四手聯乘限定餐單 WAKARAN
圖：餐廳（FB）
主打創新Fusion菜式嘅WAKARAN餐廳主廚Tommy，聯同Mangia嘅主廚Ray，將超過20年嘅經驗，打造「一晚限定四手創意美食」，當中融合法式烹飪技術，以及精巧嘅現代亞洲美食。留意只限11月4日，6pm或8:30pm入席，想試就提前訂座喇。
9月3日更新
9道西班牙菜Weekend Brunch Olé 
供應日期：由即日起至2024年10月27日，逢週末及公眾假期
西班牙菜老字號慶祝開業26週年推出Weekend Brunch，套餐包括6款前菜、1款自選主菜、無限量供應嘅每日精選西班牙Paella飯以及1款甜品，每位只需$498。前菜包括風乾火腿配新鮮番茄醬包、酥炸西班牙Padron小青椒、安達盧西亞番茄凍湯等。主菜有地中海風味八爪魚、塞哥維亞式烤乳豬等可供選擇。餐廳仲提供多種飲品嘅free flow選項，並有現場結他演奏，增添用餐情趣。
La Terrace by Louise體驗法式休閒餐飲 LOUISE
由米芝蓮一星餐廳打造嘅全新花園酒廊概念La Terrace by Louise，豪華優雅酒廊加上翠綠嘅戶外庭園，好有法式風情。同樓上嘅米芝蓮一星餐廳唔同，La Terrace by Louise以休閒為主，客人可以品嘗法式風味小食、雞尾酒、無酒精雞尾酒同葡萄酒。如酥脆嘅Mimolette芝士「炸飯糰」、主廚Loïc嘅創意之作檸檬魚子醬蝦多士及洋蔥意大利餃子搭配Comté芝士及核桃等。
「Tearoom Collection」餐飲系列 Dim Sum Library
供應日期：由即日起至10月31日期間全日供應
創新嘅點心專門店，今次呢個新系列以唔同特色茶葉入饌，愛茶嘅朋友一定鍾意。龍井蝦餃外皮呈半透明綠色並以茶葉作為點綴，散發龍井茶甜美醇厚同甘香味道。普洱茶燻本地農場雞以秘製香料滷水同慢煮，再加入普洱、龍井、紅糖同大米，將其炮製至幽香撲鼻，肉質柔嫩。甜品幾推伯爵茶流心包，伯爵茶獨有嘅柑橘香味緩緩融入內層嘅牛奶忌廉餡料之中，令人驚喜。
全新夏季糕點系列 Butterfly Patisserie
今季嘅糕點包括呢個精緻嘅雲狀草莓烘培芝士蛋糕，搭配布列塔尼芝士芝味好香濃。黑芝麻巴黎布雷斯特泡芙脆皮外層配上幼滑香濃嘅黑芝麻忌廉餡料，芝麻味突出又唔太甜。另有雲呢拿朱古力與鹽味焦糖蛋糕、椰子菠蘿蛋糕及北海道吉士撻等，甜品控必食～
文：Yanica、Cathy
