帝苑餅店嘅蝴蝶酥出晒名好食，勁鬆脆牛油味又香，最近仲推出全新口味朱古力蝴蝶酥！成塊蝴蝶酥都係深啡色，選用厄瓜多爾唂咕粉同55%法國黑朱古力粒製成，食落有朱古力碎，味濃又唔會過甜。開飯仔仲深入酒店餅房，直擊蝴蝶酥製作過程。
蝴蝶酥由助理行政糕餅總廚Don研發，成個過程大部分工序都係以人手製作。師傅話要做朱古力蝴蝶酥唔係咁容易。首先唂咕粉有油份，係會影響麵糰，所以比原味要更加嚴格控制，稍有差池都會影響口感！
用機器將高筋麵粉、唂咕粉、麥芽、牛油、奶粉、鹽糖、酵母及水拌勻
要監控住筋性，時間太短太耐亦會影響口感
其次選料亦相當花時間，唂咕粉比例同朱古力濃度夾埋一齊要剛好，份量同味道都調校咗好耐先至有完美效果。新西蘭小麥粉及特級牛油製做酥皮，仲要留意埋天氣，濕度都好影響製作。
厄瓜多爾唂咕粉同55%法國黑朱古力粒製作，朱古力會打碎成粉狀
更多飲食潮流： |
師傅即席示範製作過程，打皮、摺皮都要小心翼翼咁check住，用機器將皮壓平再摺，重覆多次之後就會做到大約192層酥皮。
將酥皮對摺成心型再切割成塊塊一模一樣嘅size，厚度約1.5cm，相當之考功夫同經驗。
入爐溫度又係要計算準確，師傅話爭十零度分別，效果已經完全唔同，要做到鬆脆唔硬身，就要因應件數、天氣等因素去控制溫度同烘焙時間。
法國朱古力蝴蝶酥食落同原味一樣咁鬆，朱古力味夠濃，中心位特別多朱古力碎，做到好似有少少夾心效果。難得唔算好甜，砂糖外層更添脆身。鐵罐裝售價$278/260g，約有24塊，想盡早試新口味就要去買喇！
地址：尖沙咀麼地道69號帝苑酒店大堂
文、相、片： Perrins