真係估你唔到，香港本身都有好多主打台灣菜嘅餐廳、cafe，估唔到繼續長開長有，最新嘅有呢間位於天后嘅餐廳，主打肉燥飯、牛肉麵等多款經典台菜，即刻睇睇賣相先！

首先呢款店子必食推介嘅大滿足肉燥飯($45起)，以肉燥飯做底，再自選各款配料。開飯仔就揀咗鹽酥雞扒、滷水蛋及時蔬。

肉燥（左）由店子自家製，買入新鮮肥瘦平均嘅豬腩肉再切成細粒，然後加入台灣醬油、乾蔥、蒜蓉等配料煮約1小時，等待收汁並煮至濃稠後完成。至於鹽酥雞扒（右），廚師會收到柯打後放入炸爐度炸，炸幾分鐘後再放涼、瀝乾油分，再切條就完成。雞扒外層香脆，入面雞肉依然嫩滑，不會炸得過乾。

而呢款招牌紅燒牛肉麵($55)，有陽春麵、牛腱、牛腩、蘿蔔及配菜，一碗麵可食到牛腱牛腩，好豐富。

湯底以牛腩、牛骨、番茄、洋蔥、西芹等熬煮3-4個鐘頭，味道好濃郁，牛味亦覺突出。連埋麵質粗身嘅陽春麵，口感好惹味。

當然唔少得筋肉分明嘅牛腱（左），以及牛腩（右）啦！牛腩事前更經過特別處理，師傅以台灣豆瓣醬、番茄膏去煨牛腩、蘿蔔，令味道更香更濃。

炸蠔餅聽落以為係潮州菜？其實台灣菜除咗蚵仔煎之外，仲有炸蠔餅架，而且做法同潮洲式不太相同。師傅先將雞蛋、蠔仔、菜甫、芫荽及蔥拌勻，並倒油去熱鑊，再倒入蛋漿，然後不斷用勺以油撞開蛋漿，從而形成鬆脆兼形式不一嘅蠔餅。

呢款口水雞($35)嘅重點梗係紅卜卜嘅醬汁啦，醬汁以花椒粉、紅椒粉、花椒油、乾蔥、蒜蓉等等製成，一入口，辣味會慢慢滲出至整個，後勁相當凌厲。

飲品方面有呢杯經典珍珠奶茶($16)，茶膽係用咗花茶去浸泡，再加糖漿、奶粉、珍珠等等，珍珠煙韌之餘，奶茶仲帶少許花香添！

餐廳樓高兩層，裝潢並非走傳統中式路線，反而有少少似感覺舒適嘅cafe：淺綠色皮梳化、木系餐桌，以及三幾個顏色鮮艷嘅cushion。

牆上仲有文青味濃嘅壁畫，為餐廳其中一個影相位。

臺茶•薈
地址：天后永興街21號地舖

文：Joy