聽日開始又有限聚新法，所有餐廳晚巿都要暫停堂食，只可以做外賣。對於各個「無飯」家庭嚟講，可能有啲頭痕？唔怕，而家有好多餐廳都有做外賣自取啦。今次更特別揀咗幾間喺港島區嘅餐廳，有素食選擇，部分更同OpenRice合作，提供獨家限定優惠添！無論lunch定晚飯，都有著落啦。
最新純素午餐肉 Kind Kitchen
呢間主打純素嘅餐廳，一直以Omnipork新豬肉入饌，最近仲最新推出咗純素嘅植物午餐肉！非基因改造嘅OmniPork Luncheon新餐肉並無添加色素、抗生素同味精，而且熱量同脂肪都大大低過傳統嘅午餐肉，健康好多，啱晒一班注重健康嘅OL。
驟眼望落去，新餐肉同傳統餐肉個樣都幾似，都係粉紅色又有少少燶邊咁。食落會食到淡淡嘅豆香，而且口感比一般餐廳實淨少少。用嚟整茶記嘅經典餐蛋治或者辛辣麵都唔錯。
OmniPork Strip 新肉絲係另一款同時推出嘅新品，成分 主要包括大豆蛋白同葵花籽油， 含高蛋白質。餐廳以此製作新肉絲香江炸醬麵，酸辣香口，還原度高。
餐廳另外仲提供外賣自取，其中沙嗲韓國植物牛炒米粉香氣十足，沙嗲惹味。
新鮮健康poke bowl Poke
圖：Poke bowl喺香港愈嚟愈流行，呢間嘅bowl碗碗都咁足料，可以揀沙律或者糙米底等，夠晒健康。而面頭嘅配料亦可以完全自選，有各款刺身、香菇等選擇，另外亦有幾款官配設定，最受歡迎嘅係有吞拿魚刺身、 蟹籽、新鮮海帶等嘅POH-KEH，同埋The Vegan素食bowl！
特色咖啡輕食 sensory ZERO
圖：佢哋杯痴_線朱古力一向都非常受歡迎，啲朱古力多到滿瀉。外賣自取雖然就試唔到，但都仲有多款吸引嘅輕食同素食選擇。必食之選有日本滑蛋牛角包，口感酥脆，陣陣牛油香，中間夾住芝士滑蛋加牛油果芥末醬，而家仲有限定買一送一優惠添！另外推介素食朋友可以試「我唔_係豬‧泰式肉碎飯」或「我堅唔_係韓牛‧植物牛肉飯」。
中環平價漢堡 天之樂素食
圖：漢堡可以話係唔少香港人嘅comfort food，呢間餐廳主打嘅仲要係自家製天貝漢堡，好食得嚟又健康啲，啱晒各位希望保持靚靚身型嘅上班一族。天貝係一種印尼食材，以黃豆加天貝菌種發酵而成，有豐富蛋白質同維他命呢。餐廳另外亦有提供多款素食意粉同飯類。
OpenRice限定優惠：指定食品7折
大坑西式素菜 素食微調
圖：餐廳舖位有啲細，唔想等太耐嘅話外賣自取就最啱。Menu以西式嘅素菜為主，素漢堡嘅主要餡料包括豆腐、茄子同南瓜等，味道juicy有驚喜。另外亦有選用近期大熱嘅食材，黃薑，製作黃薑椰香印度飯，味道溫和又有陣陣椰香，值得一提係啲飯仲係用印度長米呢。
OpenRice限定優惠：指定食品7折
文：Kar
相：Tom
