當愈嚟愈多新花款嘅嘢食推出巿面，有陣時，都會忽然懷下舊，想食下以前嘅嘢食。之但係，嗰啲孖條呀涼粉冰呀之類，都唔係咁易隨街就搵得返。有間以懷舊做主題嘅冰室，就趁住大熱天時，出返一系列嘅特色懷舊凍飲，同時亦推出新款冷麵。
先講冷麵，有兩款。重口味之選一定係「勁爆芫荽涼拌青瓜牛𦟌冷麵」，牛𦟌用秘製招牌瑞士汁滷過，配埋自家調製嘅酸、麻、辣涼拌青瓜，單係呢兩樣料撈冷麵都未夠開胃，面層仲要疊多層芫荽！係疊！因為都真係幾多下，令到碗冷麵更有味道。
唔食芫荽嘅朋友仔就可以揀「麻醬青蘋果手撕雞冷麵」或者「芥末胡麻醬煙三文魚冷烏冬」，前者微酸嘅青蘋果絲為冷麵添加咗一陣清新感。
至於飲品方面，就係懷舊特飲嚟。包括用菠蘿汁加雪凍菠蘿粒組成嘅菠蘿冰、用花奶拌涼粉就整到嘅涼粉冰，同埋倒插孖條再加利賓納同雪碧調製出嚟嘅孖條三色冰，又懷舊又消暑。
詳情
八月中旬起，逢星期一至六 2:00pm後在指定分店供應
冷麵：灣仔店、西營盤店、新蒲崗店、葵涌店、將軍澳店
懷舊凍飲：樂富店、新蒲崗店、葵涌店
文：Kar