甜魔們又有新目標啦：台灣人氣日式梳乎厘班戟店，即將開到嚟尖沙咀！香港店仲有七款香港限定口味，包括北海道夕張哈密瓜雪糕、70%Mix朱古力瀑布等，唔同配搭總有一款啱心水。另外仲有日本雪糕同茶飲，要抓住夏天嘅尾巴去試下啦！
 

王子神谷嚟自台南，喺台灣有10間分店，今次開到嚟香港仲特別設計咗七款共同研發嘅新口味，香港限定㗎！而梳乎厘班戟用嘅麵粉、牛奶，同雞蛋都嚟自日本，麵粉仲特別選用兩款唔同麵粉，令班戟鬆軟輕身得嚟唔會太快塌。
 

北海道夕張哈密瓜雪糕日式梳乎厘班戟（$88）

香港主打口味之一，一份有齊北海道直送哈密瓜、北海道夕張哈密瓜軟雪糕，同哈密瓜忌廉梳乎厘班戟！哈密瓜甜度達15至16度，香甜多汁，而且已經預先切好一塊塊方便食。梳乎厘班戟口感輕盈，濕潤度適中，唔會完全入口即溶有少少咬口。
 

焦糖奶油脆脆日式梳乎厘班戟（$58）

平少少可以試呢款焦糖忌廉口味，兩塊梳乎厘班戟上面係自家製焦糖忌廉、果仁、爆谷同自家製焦糖脆脆。坊間比較少見焦糖口味嘅忌廉，有淡淡焦糖苦甜香幾得意。而且果仁同焦糖脆脆都增加口感層次。
 

70%Mix朱古力瀑布日式梳乎厘班戟（$58）

另一推介係70%Mix朱古力，選用比利時百年品牌Callebaut 70.5朱古力製作朱古力醬，配士多啤梨、鮮忌廉等。朱古力醬味道香濃，唔會得個甜字。秘訣原來係落咗少少酒，撇除朱古力嘅可可脂味。而且士多啤梨酸酸甜甜，可以平衡返膩度。
 

 

北海道夕張哈密瓜軟雪糕（$28）

香港獨家嘅仲有日本直送Nissei軟雪糕！主打嘅係北海道夕張哈密瓜軟雪糕，顏色粉嫩而且唔算融得好快，最啱打卡。食落甜度適中，哈密瓜香自然。
 

日本牛乳蓋水蜜桃沙冰（$44）

水蜜桃沙冰選用日本甜度達16度嘅白桃打成，啖啖香濃清甜！牛乳蓋係用日本鮮奶加鮮忌廉打成，口感柔滑，奶香中帶少少鹹味，增加味道層次。
 

雪球波霸爆谷玄米茶（$34）

玄米茶配牛奶、珍珠、雪糕球同爆谷，一杯有好幾款唔同口感。建議大家食咗雪糕上面嘅爆谷先，浸得太耐會變腍呀。
 

王子神谷
地址：尖沙咀彌敦道132號美麗華商場1期地下G38號舖
*預計9月第二週開張

文、相、片：Cathy