台中人氣手工芋泥甜品登陸尖沙咀 必試招牌雙芋仙草奶凍、神仙奶(有片)
2019-09-03

又多一間台灣甜品店插旗!今次呢間嚟自台中,主打手工芋泥、芋圓、黃金地瓜泥等,有多款唔同配搭,重點係80%原材料都嚟自台灣,確保大家喺尖沙咀店食到嘅同台灣店一模一樣。除咗甜品,飲品亦有驚喜,例如黑糖神仙奶、芋泥鮮奶都值得一試。
 


品牌創辦人Patrick係台灣花劍冠軍,退役後決定創業賣自己鍾意嘅台式甜品

嚐仙以原味、健康為旨,供應鮮製台式甜品。品牌創辦人Patrick跟親戚學師,佢話製作手工芋泥嘅秘訣係要識得揀啱芋頭,所以店內供應嘅芋泥會根據時令選擇最適合嘅產地。另一特點就係無論係唔加防腐劑、每日新鮮製作。
 


雙芋仙草奶凍($45)

台灣甜品店嘅芋頭通常係一塊塊,佢哋就特別整成一球球好似雪糕咁嘅芋泥,食落口感特別綿密!招牌雙芋系列即係有齊手工芋泥同芋圓,紫色嘅係芋圓,黃色同橙色係雙色地瓜圓,口感煙韌甜度適中。而仙草凍同樣每日新鮮製作,口感滑溜。
 


配搭一小杯鮮奶油,建議食法係先試咗手工芋泥、芋圓嘅原味,仙草凍可以配紅豆或者芋泥,之後按自己口味加入鮮奶油撈嚟食,享受唔同味道層次。
 


黃金地瓜泥豆花($45)

芋泥甜品就見得多,黃金地瓜泥係Patrick偶然諗出嚟嘅新配搭,口感無芋泥咁綿密,保留地瓜嘅少少纖維口感。甜度方面地瓜泥比芋泥稍高,所以建議配搭比較清淡嘅豆花。配料仲有珍珠同紅豆,口感豐富。
 

更多【新店直擊】:
1. 新加坡海南雞飯始祖 進駐尖咀新商場 香港限定美祿雪花冰甜品
2. 最平$48!觀塘新開懷舊港風素食自助餐 大蝦芝士焗伊麵、麻辣口水雞
3. 銅鑼灣新開高質鐵板燒 必試和牛三文治、煙燻帆立貝

 

黑糖神仙奶($29)

神仙奶當然唔係普通鮮奶咁簡單啦,其實係自家炒嘅黑糖,加上自家製仙草凍同牛奶。特點係乾炒過嘅黑糖會增加一份焦香,飲落有少少似焦糖味,但比一般焦糖清甜。加埋甘涼清爽嘅仙草凍平衡返甜度,而且增加咬口。
 


芋泥鮮奶($29)

Patrick自己最鍾意嘅就係呢杯芋泥鮮奶,坊間唔少芋頭牛奶都係將芋頭蒸熟再同牛奶一齊打勻,呢度就特別做分層效果:先將芋頭加少少芋頭湯打成芋泥醬,整嘅時候先加入冰同鮮奶。芋泥醬特別幼滑,口感亦更厚身,飲得出真材實料。
 



芋泥牛奶冰($43)

尖沙咀店亦有供應刨冰、燒仙草、紅豆湯等唔同台式甜品,推介之一係呢份芋泥牛奶冰,刨冰淋上手工芋泥醬、煉奶,再配搭紅豆同珍珠。細細碎碎嘅刨冰同柔滑芋泥醬營造口感層次,配料亦夠多,唔怕食到一半就得返碎冰。
 


見你睇到最後咁捧場,醒大家一個優惠:呢個星期六(7/9)12:00至15:00,招牌雙芋仙草奶凍特價$10份!想試嘅話可以Mark定時間同朋友嚟啦。
 



嚐仙
地址:尖沙咀金馬倫道19號地下A舖




文:Cathy
相、片:Tom Li

Keyword
尖沙咀
甜品
芋泥
芋圓
地瓜泥
神仙奶
嚐仙
新店直擊
走在最前線,為大家搜羅及報道有關新開餐廳的資訊。
Restaurant Info