到底全盛時期可以有幾多間台灣茶飲過江龍嚟香港開店？而家幾乎每星期都有新嘅舖頭開張，今次要介紹嘅呢間就座落喺荃灣掃街熱點度，無論係杯嘅設計定飲品嘅外貌都有種文青嘅氣息。

呢間舖係由台灣著名藝人納豆開㗎，一直堅持用嚟自台灣本土嘅小農手工茶葉，珍珠則用古法以天然食材搭配手工新鮮製作，選用人體100%可以吸收嘅蔗糖煮制而成。而每杯手搖奶茶都係用純牛奶沖，不含奶精、味精等。客人可以揀要奶味較淡但較健康嘅脫脂奶，或者濃厚奶味嘅全脂奶。至於珍珠亦有五款，分別係黑糖、白玉、黑芝貳、抹茶同火龍果珍珠，粒粒都幾有咬口，其中黑芝麻嗰隻仲真係食到啲芝麻粒喺度，好香下。

兩款牛奶、五款珍珠都係由得客人自行選配。如果有選擇困難症嘅，不妨參考下呢幾杯官配。

啵爆黑糖厚鮮奶淨係賣相都已經贏在起點線，黑糖同珍珠仲有鮮奶混埋一齊，黑白交融，面層仲要有層厚厚der黑糖粉！不過提一提，味道都頗甜下。           

愛情動作草莓牛奶就靠個名嚟先聲奪人，科科。一片片士多啤梨黏喺杯邊，成杯粉紅色咁的確係幾誘人。飲落發現原來係士多啤梨牛奶沙冰嚟，有時仲會飲到啲士多啤梨籽，奶味又好香濃，幾推介。

抹茶控就應該要揀宇治抹茶珍珠鮮奶茶，用上抹茶味較重嘅宇治抹茶粉去調製，抹茶味比奶味突出，偏重甘澀味多少少。

多啲生果嘅感覺好似有夏日feel啲，呢杯奇異博士愛草莓都ok㗎，飲出陣陣果香。而火龍果珍珠鮮奶茶啲珍珠，細心咬嘅話，都真係有啲火龍果嘅甜味，不過混埋入奶茶度之後，就比較難嗒得出喇嗚。

至於其他茶飲，都好啱喺IG打卡啊，因為隻杯好多花花，好靚啊。不過想飲到都唔係咁易啊，頭幾日都要排成個幾鐘先至買得到呀，睇嚟呢股熱潮仲會維持多段時間添啊……

良辰吉時
地址：荃灣荃興徑2-8號昌泰大廈地下4號舖

文、相：Kar