全城抗炎! 5間酒店自助餐轉型 任點任食海鮮/主食/甜品 變陣保衛生
2020-03-17

好多人都鍾意食自助餐,但係最近受疫情影響,都唔多敢食,sosad!有多間酒店見狀,就馬上變陣,將自助餐轉為任點任食嘅形式,由專人送上枱或代夾,衛生啲,食都食得放心啲!

天后 Corner 18    

呢間酒店由即日起,以任點任食嘅午餐同晚餐代替原本嘅自助餐,提供一系列嘅燒海燒、阿根廷紅蝦、海膽、鴨肝等美饌,另外當然唔少得烤美國西冷牛肉滿足一眾牛魔王啦,就連Haagen Dazs雪糕都可以無限任點送到埋枱呢~ 

供應時間:
任食午餐(每日);任食晚餐(逢星期五、六)

供應期:即日起至另行通知

優惠券:任點任食午餐高達7折優惠
優惠券:任點任食晚餐高達65折優惠

尖沙咀 柏景餐廳 

尖沙咀呢間酒店嘅自助餐暫時暫停供應,平晚轉咗做set dinner。嚟緊今個星期五(20/3)起,就會喺指定日子提供無限任點嘅午餐同晚餐。每位入座首先會送上蟲草花圓肉杞子燉豬腱湯,同凍海鮮拼盤,晚巿時段更可升級送多客特選刺身拼盤!至於任點任食menu亦好豐富,刺身、壽司、沙律、燒扇貝、鵝肝燒飯團、法式普雲蘇烤羊排等通通都有得食,仲有Mövenpick 雪糕同多款甜品添!兼且有埋清潤花果茶——金銀花雪梨茶或無花果南北杏蘋果茶呢~

供應時間:
任食午餐(逢星期日);任食晚餐(逢星期五、六)

供應期:3月20日 – 4月30日

黃竹坑 海灣餐廳及海灣咖啡室

一向主打可持續發展環保海鮮嘅呢間buffet,嚟緊呢個星期六(21/3)起轉推任點任食嘅形式後,都會繼續供應。每枱都可以享用無限量供應嘅海鮮拼盤,包括有麵包蟹、青口、海螺等。至於其餘美食,好似刺身、肉類、燒味、甜品等美食同熱食,則會繼續放喺自助吧位置,但就改由戴晒口罩同手套等防疫裝備嘅餐廳職員代勞代夾。晚餐時段更特設阿拉斯加蟹、磯燒鮑魚配柚子汁同埋開邊即蒸龍蝦等菜式添。

供應時間:
任食午餐及晚餐(逢星期六、日及公眾假期)

供應期:3月21日 起 至另行通知

尖沙咀 海景咖啡廊    

望到海景嘅呢間酒店餐廳,推出「春日海陸盛宴」,由原本嘅自助餐,變為由餐廳團隊逐枱捧上。盛宴中近30款嘅美食,好似各款嘅即燒牛扒:澳洲優質西冷牛扒、頂級肉眼扒、牛柳、腹肉牛排;多款海鮮包括松葉蟹腳、即開法國生蠔、淡水小龍蝦等,以及薯條、沙律、烤羊架、燒春雞扒等其他肉類選擇,6款芝士蛋糕,仲有仲有Haägen-Dazs雪糕全部都係無限任點!法國紅/白酒、啤酒、果汁同汽水都可以無限量添飲呢!

供應時間:
任食晚餐(每日晚餐時段)

供應期:即日起 至 4月30日

優惠券: “春日海陸盛宴” 低至8折

北角 綠茵閣  

位於北角嘅呢間酒店餐廳,同樣將自助餐轉為無限任點任食形式,各款海鮮、凍肉、刺身壽司、即蒸海鮮、串燒烤肉等原本喺自助餐中食到嘅嘢,一樣食得返!當中包括泰式燒豬頸肉沙律、香草羊架、星洲香辣炒大蝦、北京片皮鴨同酥炸廣島生蠔等多款環球美食,剔完點餐紙後會由餐廳職員捧上。而成餐最重要嘅甜品同Movenpick雪糕,一樣都係無限任食,並由甜品師傅即場為大家供應!

供應時間:
任食午餐(逢星期日);任食晚餐(逢星期六、日)

供應期:3月21日 至 4月30日

文:Kar

相:各酒店Facebook


Keyword
全城抗炎
酒店
自助餐
任食
尖沙咀
北角
黃竹坑
天后
開飯專題
開飯仔為你提供各類型最新飲食情報及優惠,全面照顧你的飲食喜好。
Restaurant Info
Show More
Show Less