全城抗炎!將屋企變Cafe 網購咖啡包/冷泡茶/甜點推介
2020-07-20

第三波疫情爆發,大家都多咗時間留喺屋企,但偶然咖啡癮起,或者掛住去Cafe Relax下嘅感覺點算好?其實只要花啲心機,就可以將屋企變成Cafe!香港有唔少咖啡同茶嘅品牌可以網上訂購,唔需要專業工具都可以沖到杯優質咖啡或者冷泡茶。再配埋件蛋糕,安坐家中都可以享受下午茶。
 

咖啡掛耳包推介

本地新咖啡包品牌  CAYU Coffee Company


香港新創立嘅咖啡品牌,目標係簡化大家喺屋企沖咖啡嘅步驟,鑽研後就推出三款掛耳式咖啡包!分別係按唔同心情品味唔同產地風味嘅The Mood系列,將甜點嘅氣息糅合到咖啡當中嘅The Sweets系列,同喺蘇格蘭用威士忌酒桶陳存一段時間以吸取精華嘅The Whisky系列。

訂購方法:透過FacebookInstagram私訊,或致電 / WhatsApp 至5621 5013訂購
 

當季咖啡寄上門  Brew Note Coffee Roaster


佢哋唔單止係北角一間自家烘焙咖啡館,亦有將烘焙嘅咖啡放上網畀大家訂。掛耳包有兩款,House Blend糅合哥倫比亞豆嘅蔗糖甜度,衣索比亞古吉豆嘅莓果風味,巴布亞新幾內亞豆嘅蘋果果酸。想特別啲可以揀Adventure Box,由烘焙師精選當季嘅單品咖啡,每次都有驚喜!

訂購方法:網上預訂 - https://brewnotecoffee.com/
 

台灣到港咖啡香  Artista Perfetto


品牌從台灣回流到銅鑼灣開店,咖啡就依然堅持喺台灣烘焙,將當地嘅咖啡文化同感覺帶嚟香港。掛耳包House Blend一樣有兩款選擇,01係中淺烘,花香、莓果茶感較重嘅Fruity;02係中度烘焙,帶朱古力、堅果味嘅Nutty。

訂購方法:透過Facebook私訊,或於好生活網店訂購 - https://goodlife.com.hk/brand/artista-perfetto/  
 

驚喜9+1咖啡包  Coffeed


咖啡期刊啡聞開設嘅Pop-up咖啡生活館因應疫情推出在家沖啡包郵寄9+1優惠,會喺多個產地當中挑選九款,再加一款神秘咖啡豆組成Surprise Set!唔單止可以試多啲唔同地區、處理法嘅咖啡,加上咖啡全部都係嚟自本地咖啡烘焙店,支持本地生產。

訂購方法:WhatsApp至5741 6875訂購
 

冷泡茶推介

多款口味冷泡茶  Tea Express Bar by Jrink


夏日炎炎最啱飲冷泡茶,茶包只要用常溫水放喺雪櫃浸泡八個鐘就飲得,超方便!加上冷泡方式所釋放嘅咖啡因同單寧酸都比較低,飲落亦更清爽更甘甜呀。呢個品牌從多個國家嚴選原材料,配搭成唔同風味嘅茶包,好似桂花烏龍、茉莉鐵觀音、玫瑰紅茶等,總有一款啱心水。

訂購方法:網上預訂 - https://bit.ly/32uVbqj  
 

新出冷泡桃灼烏龍  上林茶舍


上環呢間手沖日本茶吧亦新出兩款冷泡茶包,桃灼烏龍帶天然嘅蜜桃果味同清新花香,桃灼紅茶同樣有果香但增添一層糯米香更獨特!兩款茶包嘅建議冷泡法係兩個茶包加500mL水,放喺雪櫃2-3個鐘就完成喇。

訂購方法:網上預訂 - https://www.greenginkgotea.com/shop 
  

甜點推介

新出茶香卷蛋  小念頭


旺角呢間主打茶香蛋糕嘅甜品Cafe有開網店,熱賣嘅鐵觀音芝士蛋糕、焙茶雙層芝士蛋糕都有得訂。最近仲新出兩款口味嘅卷蛋:伯爵茶香橙卷蛋,同朱古力鐵觀音卷蛋,前者嘅伯爵茶忌廉配搭香橙醬感覺清爽,後者有朱古力淋面同鐵觀音茶凍口感豐富。

訂購方法:網上預訂 - https://littleideacafe.com/ 
 

新鮮製作蛋糕+純素甜點  JOMO


呢間喺西營盤同將軍澳都有分店嘅Cafe亦可以喺網上預訂佢哋新鮮製作嘅手工甜品,原個蛋糕推介黑芝麻戚風蛋糕,用台灣黑芝麻製作,口感輕盈甜而不膩!另外亦有今年大熱嘅巴斯克焦香芝士蛋糕。而純素甜點就有檸檬撻、咕咕霍夫等選擇。

訂購方法:最少3天前網上預訂 - https://www.jomocnc.com/shop 
 

健康純素蛋糕  the vege lab


如果對蛋奶敏感嘅朋友,出街搵純素蛋糕都唔容易,觀塘呢間甜品店就標榜健康純素,不含雞蛋、牛奶、牛油或動物成份,加上使用有機食材,好似無漂白麵粉、日本米粉、墨西哥有機龍舌蘭蜜、有機雲呢拿油等去製作。另有蛋糕、撻、曲奇等唔同選擇。

訂購方法:網上預訂 - https://thevegelab.com/ 
 

夢幻無麩質蛋糕  Infiniti C


呢間咖啡店嘅蛋糕亦好受歡迎,唔少人會特別去試佢哋嘅Signature Earl Grey Cream Cake,淺藍色嘅輕盈忌廉下面係茶香濃郁嘅伯爵茶蛋糕,本身係無麩質,如果係食純素嘅朋友亦可以另外訂購純素版!另外亦有其他純素、甚至適合生酮飲食嘅蛋糕,照顧唔同需要。

訂購方法:用指定手機程式或親臨分店外賣自取




文:Cathy
圖:官方網站截圖

Keyword
全城抗炎
咖啡
掛耳包
冷泡茶
蛋糕
純素
開飯專題
開飯仔為你提供各類型最新飲食情報及優惠,全面照顧你的飲食喜好。
Restaurant Info
Show More
Show Less