中環食飯出名貴，但最近喺旺中之旺嘅皇后大道中竟然出現咗一間日式平民食堂，主要供應日式及港式料理，選擇夠晒多，而且價錢「貼地」之餘食物質素都喺水準之上，用料唔馬虎，係「疫」市中嘅搵食好去處～

滿滿食堂石燒牛($78)

餐廳最主打就係石燒系列，呢個招牌石燒牛選用肩胛美國牛中間位置，肉質軟腍而且都有牛味，$76有200g。上枱時候約3成熟，想食幾多就自己控制啦。午市就會包一個沙律及白飯，而晚市有自助區，前菜、沙律、飯和湯都無限添加，大胃王都喂得飽。而且仲有八款調味料畀大家任配！

宮崎和牛漢堡($128)

由日本宮崎和牛製成嘅漢堡扒，漢堡扒勁厚身，肉汁豐富帶牛脂香。除上以上兩款牛仲有安格斯西冷牛扒、美國牛柳及美國頂級牛肉眼揀添。

超嫩石燒雞扒(孜然口味)($72)

唔食牛嘅朋友，都有雞、羊、豬畀大家揀，推薦呢味孜然口味超嫩石燒雞扒，香料味重送飯一流。因為雞扒都幾厚身關係記得確認熟先好食啊～

除咗肉類連海鮮都可以加配，如日本原隻磯燒鮑魚($22)、日本廣島蠔($28)及法國鵝肝($28)，CP值一樣咁高～

黑松茸鮮菌炒滑蛋飯($72)

港式人氣炒滑蛋飯，選用日本雞蛋，加上師傅咁多年嘅經驗炒出嚟嘅滑蛋特別香滑，加上黑松茸層次又幾豐富。而且有得配多兩個小菜添。

芝士黑胡椒雞煲、泰式咖喱軟殼蟹($84)

餐廳連石鍋料理都有供應～芝士黑胡椒雞煲加入兩種芝士，「芝」味香濃，而泰式咖喱軟殼蟹都好惹味！

滿滿食堂

地址: 中環皇后大道中58-60號振邦大廈地庫

文: Yanica

相、片: Tom Li