平時見開嘅韓式飯卷多數都係牛肉、泡菜及芝士等口味，但原來中環置地廣場最近有一間新派時尚嘅韓式飯卷外賣店進駐，主要供應多款創新口味嘅韓式飯卷，由BaseHall嘅Moyo Sik及人氣韓國餐廳Moyo嘅創辦人Francesco Lee同時主理！除咗係一間外賣店，更售賣一系列同唔同風格設計師合作嘅T恤、帽及衞衣，希望可以宣揚韓國潮流文化。呢度嘅韓式飯卷同傳統kimbap唔同，餡料結合韓式及西方元素，連包裝都與眾不同！飯卷以簡便型格嘅運動鞋盒盛載，方便易攜，而且夠飽肚，啱晒中環繁忙嘅上班族～
Rollin由美籍韓裔Francesco Lee主理，同時為香港餐廳Moyo負責人。
飯卷一共有五個口味，推介呢款Kpop Fishcake & Tofu Rice，韓式元素較多，餡料有韓式魚餅、豆腐、生菜、蛋及蘿蔔，口感彈牙。而Mortadella Sandwich有意式肉腸、麵包、芝士及草莓果醬，味道鹹鹹甜甜，口感亦好豐富，難怪係最賣得！
Truffly Beef Rice嘅idea係來自韓式烤肉飯卷，不過調味就用黑松露蛋黃醬代替韓式醬油，所以多咗份松露香～至於減肥人士都有嘢啱食，就係呢個Keto Egg Salad，用大量蛋絲代替白飯 ，健康又好味！
而呢個English Breakfast Rice都係人氣之選，加入煙肉、車打芝士、蛋絲及生菜等食材，香濃惹味。
如果覺得淨係食飯卷太單調，仲有賣埋原味、朱古力、抺茶及水果roll cake，一件飯卷+一件蛋糕卷做lunch就啱啱好。
地址: 中環皇后大道中15號置地廣場地下底層B53號鋪
文: Yanica
相、片: Tom Li