一年一度中秋節就快到，又係時候睇吓今年有咩創新搞作嘅月餅，帶啲新鮮感畀自己～
新款月餅
流心開心果麻糬月餅 森林麵包
嚴選日本開心果醬加低糖白蓮蓉慢慢煮，入口香滑唔太甜，仲包住自家製麻糬同鹹蛋黃，一咬落仲有杜拜朱古力開心果脆脆，煙靭又脆，鹹甜夾埋一齊，好有層次感～
早鳥優惠: 即日起至至9月1日HK$158元 原價: HK$188元
蛋糕與中秋禮盒 Pandan Man
今次中秋禮盒有兩款月餅，一款係白蓮蓉加斑蘭蓉同麻糬，香滑又有口感；另一款就係斑蘭奶黃流心，切開即流好有驚喜。入面仲有原個斑蘭戚風蛋糕，送禮一流！
售價: HK$580
和牛威靈頓月餅禮盒 Steak King
將英式名菜威靈頓牛柳變成中秋月餅！用上等和牛牛柳，加上香濃蘑菇醬，再包上酥香牛油酥皮，外型仲有傳統月餅壓紋，夠晒特別，中西合璧，送禮有新意又夠面子！
售價: HK$888
奇華x國窖1573月餅禮盒 奇華餅家
全新白酒月餅禮盒將國寶級老窖酒香融入月餅入面，入面有兩款口味，白酒玫瑰豆沙月豆沙綿滑，加埋淡淡玫瑰香同白酒韻味，花香酒香好夾；白酒奶皇月奶香幼滑，混合國窖1573嘅醇厚酒味，香氣滿載。
售價: 即日起至10月6日期間，在奇華餅家指定分店限定發售，售價HK$318元
開心果麻糬酥皮月餅 恆香老餅家
酥小月系列一直好受歡迎，用酥脆老婆餅皮包住足料餡，香口又有層次。今年加推開心果麻糬口味，香濃開心果餡配煙煙靭靭嘅麻糬，食落好滿足。
售價: HK$195
巴斯克冰皮月餅系列 Soulgood Bakery
用咗巴斯克芝士蛋糕做靈感，只用中間嗰層軟滑芝士餡，味道清爽唔膩。外層係煙韌冰皮，會因應唔同餡料調整口感，食落去更有層次。四式巴斯克冰皮月餅禮盒有原味、士多啤梨乳酪、奶黃及流心鹹蛋黃；仲有一款杜拜開心果口味，果仁香超突出～
早鳥優惠: 由即日起至9月6日期間
- 四式巴斯克冰皮月餅禮盒: 四件裝早鳥價HK$288；六件裝早鳥價HK$368
- 杜拜開心果巴斯克冰皮月餅禮盒: 四件裝早鳥價HK$318；六件裝早鳥價HK$398
全新素食及清真月餅 香宮
素食月餅用松子、棗蓉、無花果等材料製作，健康又有果仁香，每盒有兩款口味：松子棗蓉同無花果果仁，各四件，啱晒素食或注重健康嘅朋友。仲有清真月餅系列，用符合清真標準嘅材料整成，包括流心白蓮蓉、陳皮紅豆同流心奶皇，每款三件，味道香甜，人人都可以安心過中秋。
香宮雙臻素月售價: HK$438
清真映月月餅禮盒售價: HK$438
海鹽焦糖夏威夷果仁月餅 COVA
由大師級團隊精心調配，香脆夏威夷果仁經過烘焙，配上香甜焦糖同細膩冬瓜蓉，仲有少少海鹽鹹香，鹹甜交錯，食落層次豐富，中秋嚟個新驚喜！
金秋饗宴月餅禮盒售價: HK$1,598
巧月月餅曲奇禮盒售價: HK$488
佛跳牆月餅 茗悅
全新佛跳牆月餅用上海參、金華火腿、瑤柱、鮑魚同蝦乾，材料足料又矜貴，鹹香味濃、層次豐富，中秋送畀摯愛夠晒特別又有心思。
售價: 四件裝$488
三款迷你桃山月餅 國金軒
五福臨門月餅禮盒入面包括三款新口味迷你桃山月餅，餅皮綿滑，用白雲豆沙加蛋黃同牛奶整成，食落似和菓子咁。開心果口味有果仁粒，香口有咬感；咖啡味香濃啱晒啡迷；海鹽檸檬酸甜清新，幾特別。
五福臨門月餅
早鳥優惠價即日至8月31日: HK$338
優惠價9月1日至9月30日: HK$368
原價: HK$558
武夷奇蘭桂花單黃白蓮蓉月餅 龍景軒
中菜行政總廚陳恩德師傅今年特別為周年推出新口味武夷奇蘭桂花單黃白蓮蓉月餅，用上蘭花同桂花淡雅香氣，配上傳統白蓮蓉同鹹蛋黃，味道鹹甜平衡，層次細緻，展現粵式糕點嘅匠心手藝。
售價: 六件裝HK$628
文：Cathy、Yanica
