2020年絕對唔係容易過嘅一年，疫情由年頭開始一直反反覆覆，莫講話一系列嘅抗炎措施，例如禁堂食、禁吧令或限制入座率等，令到餐廳生意受到重創，就算香港人自己都為安全起見，對外出食飯有所保留。不過，香港人就係有種打不死嘅精神，即使面對「疫」境，依然有絕處逢生嘅能力。正所謂，有危便有機，2020年，可以話係餐飲業最悲壯嘅一年，但同時亦係突破最多可能嘅一年。
1. 與醫護同行
喺年頭爆發初期，有好多良心餐廳以實體行動支持一眾勇敢無私、努力抗疫嘅醫護人員，紛紛組織同加入「全城同步支援醫護人員」行動，免費請佢哋食飯或者享用醫護特別優惠。
傳送門：全城抗炎 與醫護同行！提供醫護餐飲免費優惠餐廳一覽
2. 提供防疫用品
圖：桔梗Facebook
除咗合力支持醫護，好多餐廳仲合力幫助有需要嘅香港人。喺最初各樣防疫用品，好似口罩、搓手液都缺貨，大家都要四圍撲、捱貴貨時，多間餐廳救人自救，以超抵價錢甚至免費送贈酒精搓手液畀食客。
傳送門：全城抗炎！60間餐廳推$0-$25酒精搓手液換購計劃
3. 自助餐轉型
往時最受港人歡迎嘅自助餐，喺疫情下，生意大受影響。為免人多聚集、減低喺夾取食物時交叉減染嘅風險，多間酒店立馬變陣，將自助餐轉為任點任食嘅形式，由專人送上枱或代夾，感覺衛生啲、安心啲！
傳送門：全城抗炎！ 5間酒店自助餐轉型 任點任食海鮮/主食/甜品 變陣保衛生、
全城抗炎！ 4間酒店自助餐轉型任點任食 2.0
4. 外賣自助餐、下午茶 
外賣開始變成常態。以前外賣畀人嘅印象大多數都係茶記、平、頹飯盒等，較低消費嘅餐廳先會做。不過自從疫症出現後，大家用餐嘅生態都改變咗，減少咗堂食，轉而嗌外賣。結果連高級酒店餐廳同米芝蓮餐廳，亦都加入外賣嘅行列，自取或送遞服務都有。有酒店更推出嶄新嘅家居體驗服務，派出大廚同專業侍應親自去到客人屋企，即場烹煮時令餐單！但最估你唔到嘅應該係，連自助餐同下午茶都有得外賣呀！
傳送門：全城抗炎！安坐家中嘆高級美食 連酒店都有外賣、
滋味到家！嶄新米芝蓮飲食體驗 五星級酒店大廚上門即場煮時令餐單、
全城抗炎！北角酒店最新應變 自助餐都有得外賣？ 、
全城抗炎！屋企都嘆到三層架下午茶 Tea Set外送/外賣自取推介
5. 懶人煮食包
香港人一向靈活多變，餐廳除咗推出多款外賣套餐之外，有啲仲準備埋煮食包、懶人包等，將餐廳嘅招牌菜式預先處理好或調味，客人拎返屋企後只需要簡單加熱或煮熟就可以「扮大廚」，更揼本嘅係連燒肉專用爐等都包埋，喺屋企食到壽喜燒、燒肉、韓燒，甚至鐵板燒等都不是夢。
傳送門：全城抗炎！喺屋企做大廚 懶人煮食包/套餐集合文、
全城抗炎！送上門懶人煮食包及套餐大合集2.0 花膠燉湯/火鍋/鐵板燒
6. 外賣生啤、雞尾酒
「禁吧令」喺4月頭首次推出，對酒吧業界同酒迷都做成大打擊，一邊冇得賣酒，一邊冇得落吧飲酒。然後就慢慢發展出連酒都有得外賣嘅局面，仲要係接近喺舖頭tap頭斟出嚟嘅生啤味道，由調酒師調製嘅cocktail亦有得入樽買走。
傳送門：全城抗炎！禁吧令下 酒吧、酒廠變招 喺屋企都可以飲到生啤、
全城抗炎！留喺屋企飲Bottled Cocktail 網購雞尾酒推介
7. 在家調酒
疫症令唔少人學識咗煮餸，甚至係調酒！美食有懶人煮食包，美酒都有簡單調酒套裝！有唔少品牌都推出調酒禮盒，包晒基本調酒工具，仲有埋文字或短片教學，邊睇邊調，零經驗整杯cocktail出嚟都零失敗呀~ 仲有咖啡、茶品都係，多個品牌提供網上訂購，輕易就將屋企變成café咯~
傳送門：全城抗炎！新手在家 也能輕鬆自製Cocktails 雞尾酒禮盒+教學、
全城抗炎！將屋企變Cafe 網購咖啡包/冷泡茶/甜點推介
8. 網上買餸
以前買餸，唔係街巿就係超巿，今年疫情出現後，就突然多咗好多「網上街巿」喇。多間網店應運而生，而且食材種類同質素絕對唔會輸畀傳統街巿，無論係海鮮、扒類、蔬果定係湯包等，都有得揀，仲有專人送埋上門呢，夠晒方便。OpenRice亦開設咗網上Food Mall（連結按此），有多款氣炸鍋美食、煮食包、甜品、湯水同酒類飲品等選擇。
傳送門：滋味到家！3個食材直送上門網站推介 輕鬆在家自選新鮮蔬果、海鮮、
滋味到家！新鮮海野海鮮+逾200款蔬果肉類 食材直送上門網站推介2.0
9. 飲食盛事取消/轉形式
多個大型嘅年度飲食盛事，包括Taste of Hong Kong、美食博覽會、Wine & Dine等都被迫取消實體活動，當中Wine & Dine則轉個形式繼續舉行，改為「線上+線下」，活動延長至5個星期咁耐，畀大家除咗可以優惠價預早買定品酒套餐或美食外，仲可以免費參加網上大師班，學下品酒同煮食。後嚟嘅工展會亦轉為網上形式。喺疫情下，線上展覽似乎成為一種新形態。
傳送門：Wine & Dine 2020預告 免費網上學品酒 精選品酒套裝率先睇、
Wine & Dine 2020 大廚免費網上教煮 中西日式及甜品都有得學
10. 疫巿創業
雖然逆境重重，但依然有唔少勇敢創業嘅朋友，無懼世事變改，還是愈難愈「創」，睇準平租嘅時機，喺「疫」巿中開設新餐廳或分店，闖出一片天。根據資料，今年有逾4200間嘅新餐廳開業呢。
傳送門：搵食有道系列、新店直擊系列
文：Kar