唔知大家會唔會同Nicole一樣，每個月都要有一、兩日畀自己chill吓食好嘢？今次佢就去山頂同中環，介紹兩間法式餐廳畀大家，齊齊感受法式悠閒同美食～
85折｜招牌USDA Prime頂級肉眼牛扒配任食薯條套餐 [1位用, 2位起] 
La Vache!係唔少鋸扒愛好者嘅愛店，而家山頂新開咗間靚景分店，天氣好嘅時候可以居高臨下一邊欣賞維港景色一邊用餐；而店內裝潢貫徹一向嘅法式風情，採用紅皮櫈加格紋檯布，而且空間感十足，令人好relax。
兩款前菜開胃
餐廳必叫Item係招牌牛扒配薯條，呢個套餐就供應USDA Prime頂級肉眼牛扒，不過入戲肉之前先食前菜～經典法包配牛油，仲有好fresh嘅合桃沙律，簡單又清爽。
招牌USDA Prime頂級肉眼牛扒
盤下面設有微火保溫
肉眼扒一上枱就聞到好香嘅牛肉味，再用微火保溫，如果嗌Medium rare咁就可以慢慢食，同時keep到口感喇，加上牛扒表面煎得好香脆，有種外脆內軟嘅感覺。Sauce方面有兩款：茄汁同秘製蛋黃醬，後者同平時食到嘅有啲唔同，帶少少酸酸哋，好開胃，蘸薯條都非常之夾。
牛油薯條
薯條係Freeflow任食㗎！用熟牛油炸特別金黃香脆，邪惡到令人停唔到口。
套餐不含甜品，每款甜品均需另外結算
餐廳另一個Signature就係甜品車喇～林林總總嘅法國甜品擺滿成架車，真係未食先興奮，大家要準備好第二個胃呀。
La Vache! 
地址: 山頂山頂道128號凌霄閣1樓2號舖
由法國藍帶主廚主理嘅小餐館，裝修行優雅路線，佢哋嘅六道菜晚餐畀人好warm嘅感覺，嚟約會幾溫馨㗎～
香草白酒牛油煮藍青口
第一道菜係用香草白酒牛油煮藍青口，分量都唔少，加上青口本身煮得好嫩滑，蘸埋醬汁更加juicy。
新鮮黑松露蘑菇湯
第二道菜先到湯品，新鮮黑松露蘑菇湯菇菌香氣突出，加上新鮮黑松露片同芝士提味，入口好有滿足感。
海蝦意大利麵配龍蝦汁
主食方面點少得意粉呢？海蝦意大利麵配龍蝦汁炒至偏乾身少少，所以龍蝦汁收得夠濃味；海蝦則新鮮彈牙，味道層次細膩。
法式香煎鵝胸配香橙沙律
法國菜經常出現鴨胸，師傅特別轉用鵝胸帶嚟新鮮感
令人期待嘅主菜係法式香煎鵝胸，表皮煎到好似燒豬咁脆卜卜，至於肉就好似牛肉，但食落又好有鵝味；配埋好fresh嘅香橙沙律同香橙汁，成個層次出晒嚟！
士多啤梨拿破崙
法式經典甜品之一嘅拿破崙，餐廳製作咗士多啤梨口味，鬆化餅皮、吉士醬同鮮果組合，為成餐畫上完美句點。
紅館
地址: 中環干諾道中50號地下B號舖
主持：Nicole
文：Cathy
相：Reol
片：Yan Yan
