【飲食潮流】抵食尖咀酒店海景晚餐 3道菜300有找

2016-09-01

去酒店唔一定要食自助餐嘅，要返個set dinner都一樣得。如果你以為喺酒店食，仲要有海景睇，就一定好貴，咁少年你真係太年輕，尖咀有酒店最近就推出咗個3菜晚餐，都不過係238蚊咋。

前菜、主菜、甜品，成個餐單嘅食材主要都係由澳洲入口，兩個人嚟食就可以食到6款澳洲美食喇。即刻睇下menu有咩揀先~

(左)玉米濃湯配脆爆谷（右）凱撒沙律伴風乾火腿
前菜可以2揀1，湯或者沙律。湯係粟米濃湯配爆谷。開飯仔試過，超甜嘅粟米味，原來係用澳洲粟米，一碗湯就用一條，咁足料唔怪得咁香，湯碗面嘅泡泡聽大廚講，係用粟米心打成㗎，用盡晒成條粟米呀下~ 碗邊嘅爆谷，空口食又得，扔落湯度食又得。

(左上)海鮮汁大蝦扁意粉（右上）香煎比目魚伴刁草青口汁（左下）香烤澳洲西冷牛扒 (10oz) 配烤野菌及特色薯條[加$60] （右下）黑松露野菌意大利飯
主菜就可以4揀1，首推海鮮汁大蝦扁意粉，因為佢個意粉汁係用咗8種海鮮熬出嚟㗎，雖然食嗰陣已經食唔返係邊8種海鮮，但味道真係幾鮮，問一問嗰8種海鮮係包括蝦、青口、帶子、蟹等等。另外有道香煎比目魚拌刁草青口汁，睇個名以為得魚同青口汁，其實有真‧青口㗎。條魚好滑，撈埋汁食又幾香。

（左）棉花糖朱古力布朗尼配乳酪雪糕（右）焗蘋果卷配雲呢嗱雪糕
至於甜品就有棉花糖朱古力brownie配乳酪雪糕或者焗蘋果卷配云呢嗱雪糕，老實講，兩種都幾飽。前者絕對係甜魔之選，成隻杯裡面嘅都係邪惡嘢，上枱嗰陣仲會即時點火添，不過啲cream就可能有少少燒焦過嘅味喇。至於個蘋果卷都夾咗好多蘋果喺裡面下，一片片混埋冧酒咁焗，甜酸脆軟嘅口感都齊晒。

詳情

堤岸酒吧及餐廳
地址：尖沙咀廣東道33號中港城皇家太平洋酒店海景翼大堂高座
優惠限期：即日起至10月31日（10月1日除外）
註：網上訂座仲有精選佳釀、啤酒、飲品半價優惠　　

文：Kar

隨時接收最新資訊
讚好OpenRice專頁！

開飯專題

開飯仔為你提供各類型最新飲食情報及優惠，全面照顧你的飲食喜好。