疫情又再爆發，飲食業又再經歷一趟大風浪。最近又開始有餐廳忍痛宣佈要結業了。上一輪嘅餐廳結業潮，我哋已經失去咗屹立咗成30年嘅老字號、新開咗一兩年嘅街坊小店、傳統蛇羹、新興甜品等等，嗚，今次又有老店唔做喇。幾唔捨得都好，都係要講句再見。
老字號
百年歷史 公和荳品廠
結業日期：9月尾
位於九龍城，有逾百年歷史嘅老字號公和荳品廠，餐廳日前貼出告示，話會營業到今年9月咋。佢哋嘅豆花又香又滑，仲有坊間少見嘅杞蓉豆花同棗蓉豆花添。另外亦有煎釀豆腐、三寶等小食。趁有得回味時，好去回味喇，愈嚟愈多回憶都將要消失了。
牛頭角老店 蘭香園
結業日期：8月17日
呢間老店有成51年歷史，早已成為附近街坊嘅飯堂。由早餐午餐常餐特餐晚餐等等茶記茶餐就梗有，連中式小菜都有，超多選擇。脆皮炸子雞、西多士，沙薑手撕雞等都係客人至愛。不過，佢哋近日就貼出「結業通告」，表示租約期滿，會於8月17號正式結業。開飯仔有打過電話去查詢，回覆指暫時都唔會搵地方重開住了，想重溫回憶嘅朋友仔，抓緊時間了。
蛇羹老店 蛇王二
結業日期：4月底
圖：屹立咗喺銅鑼灣近40年嘅老字號蛇羹店，曾經獲得多年米芝蓮車胎人美食推介。佢哋嘅臘味飯同燒味飯，亦相當受熟客歡迎。但主角當然係蛇羹，蛇肉佔咗大半碗好足料，湯底以蛇骨熬成，係唔少人冬天保暖嘅回憶，食完好暖身，可惜，佢哋就唔能夠為自己保暖了……
何文田懷舊快餐 天馬快餐
結業日期：4月15日
喺何文田長大嘅，一定有食過呢間港式快餐店啦（冇食過都一定聽過啦），經典米高漢堡包，手打漢堡扒又厚又juicy，加埋粗身嘅波浪薯條。食嘅唔係味道，而係一份回憶！香港又少一間懷舊港式快餐店，大家以後要好好珍惜啦~
92年古典西餐廳 Jimmy's Kitchen
結業日期：4月13日
中環呢間1928年開業嘅英國餐廳相當架勢，李小龍、威廉荷頓、甘乃迪夫人、球王比利都曾經係座上客，食家蔡瀾盛讚係「香港人最喜愛、最熟悉、最親近的西餐廳」。可惜呢位老友即將要同大家告別，結業前將會供應經典菜單，團隊亦表示物色緊新店希望可以重開。
荃灣米線 雄記粉麵
結業日期：3月30日
圖：荃灣地鐵站附近有條食街，左右兩旁嘅食店都換過唔少，呢間米線店都算長壽了，做足30年，可惜最後都係敵不過要結業嘅命運。呢度最出名嘅就係打孖上，賣相好似牛脷酥咁嘅魚肉春卷，食落啖啖魚肉又夠飽滿結實，再加自家製辣椒醬真係無得輸！另一推介係墨魚丸，彈牙得嚟真係有墨魚味唔會成口粉。
人氣小店
除咗一批老字號外，亦有唔少口碑唔錯，但只係做咗幾年嘅小店，都要結業。
深水埗日韓小食店 金芝龍日韓美食外賣站
結業日期：7月31日
圖:深水埗呢間超人氣、專賣日韓小食嘅外賣小店，主要供應撈麵、丼飯及小食，招牌龍汁和牛牛丸同流心芝士漢堡扒都好受歡迎，不過餐廳早前於官方專頁宣佈正式於7月31日結業，襯呢排多咗喺屋企食嘢去支持吓啦！
大坑人氣牛扒Omakase Pheromone - Steak House
結業日期：7月底
大坑呢間小酒館招牌係佢哋嘅牛扒套餐，由廚師發辦揀最靚嘅，嚟自唔同國家唔同部位嘅是日推介牛扒，絕對可以滿足各位牛魔王，亦所以有牛扒Omakase之稱。套餐仲包埋餐湯、沙律、薯條、配菜，甜品。可惜嘅係大坑店因租約完結，7月尾就要結業啦，幸好老闆們有意覓址重開，希望早啲聽到好消息！
馬來西亞酒吧餐廳 Jalan
結業日期: 5月30日
呢間位於中環嘅馬來西亞菜係附近上班族嘅聚腳點，餐廳取名為JALAN，喺馬來西亞語中係「街頭」嘅意思。餐廳希望可以將大馬風味呈現畀香港人，有啲菜式仲融合咗中式元素添～招牌有巴東牛肉咖喱角、惹味喇沙炸雞、椰子烤大蝦咖喱及斑蘭吉士醬冬甩等。
Soho手工Pizza Al Forno Pizzeria 
結業日期：4月30日
呢段時間大家都多咗買外賣返屋企食？中環呢間手工Pizza店就係一個好選擇，採用100%意大利麵粉人手搓，加上訂造嘅磚爐溫度夠高，好快就焗好Pizza，令批底鬆軟香脆得嚟，配料仲Keep到Juicy！但日前老闆表示租約傾唔掂，小店要同大家告別，不過佢哋有意搵新舖重開，希望早日聽到好消息啦。
灣仔Hidden Gem Three Blind Mice
結業日期：4月30日
圖：呢間歐洲風小店可以話係灣仔嘅hidden gem，樓高兩層，每星期有幾日都係主題夜，一日burger一日steak咁，漢堡有牛肉、炸雞同素食選擇，而牛扒亦有肉眼、牛柳、西冷揀，每次主題夜都可以任食埋薯條呢。
歐洲現代餐廳 Beet
結業日期：4月25日
圖:呢間位於中環嘅餐廳主要供應多國菜，係唔少鍾意食歐洲菜嘅朋友嘅私人聚腳點，無論裝潢定食物都好有歐洲風味。餐廳於官方Facebook宣佈正式於25/4結業，真係有啲可惜～不過佢哋話有計劃於下年重開，想食嘅朋友仲有機會！
大角咀養生糖水 無糖不歡
結業日期：4月19日
圖：Adam121
大角咀呢間糖水店主打養生，根據中醫食療配搭出超過六十款養生糖水，喺傳統糖水嘅基礎上再搞下新意，例如手搓糖不甩加入新式抹茶和鐵觀音口味。而且佢哋仲堅持唔用砂糖，只會用天然黑糖、片糖同冰糖去製作甜品，健康啲，甜度亦適中。另外，雖然佢哋頂唔住要結業，但係到呢刻為止，仍然堅持每日將10%嘅生意額捐出，幫助有需要嘅人。
葵廣人氣芋圓 甜圓
結業日期：4月15日
圖：前幾年，葵廣人潮旺盛，個個都會去掃街，呢間芋圓店亦係其中一間人氣店。大部分配料都係自家製，包括芋圓、地瓜圓同紫薯圓等都係每日手工製作，有咬口，甜味又夠自然，仲有啲健康配搭，好似燕麥配生熟薏仁咁。不過佢哋約滿後決定唔續約喇，但暫時又未搵到合適舖位去擴充，惟有暫時同大家講聲拜拜先啦。
手工石磨黑米、紅米腸粉 鳳鳴石磨腸粉（銅鑼灣店）
結業日期：4月14日
石磨腸粉近年喺香港大熱，但多以白米為主，呢間就有少見嘅黑米、紅米腸粉！米漿、腸粉、配料、豆漿等都係手工製作，而且每份腸粉都係即叫即蒸，米香突出而且都相當滑溜。銅鑼灣店即將結業，不過好消息係觀塘同新蒲崗兩間分店繼續營業，等疫情好轉可以過海去食嘅。
咖啡控召喚 手日土咖啡室
結業日期：4月14日
圖：觀塘工廈有唔少特色餐廳，呢間陶瓷工作坊加咖啡室，用嘅杯全部都好特別。主打精品咖啡，提供唔少特色單品豆，仲有手沖鴛鴦，即係單品咖啡豆加高山烏龍茶調泡！其他Milk Coffee都有水準，係唔少咖啡控嘅心水。
彈牙棍打牛丸 潮丸
結業日期：4月4日
圖：phonebus
尖沙咀呢間小店裝修簡潔似Cafe，其實係主打自設工場整嘅棍打牛丸嘅潮式粉麵店，牛丸粒粒彈牙爽口又有牛味。另一食家推介係牛三鮮，即係牛爽腩、牛筋同牛肚。識食一定點埋自家製紅、黃燈籠椒醬！雖然因為租約完結而結業，但餐廳表示會喺未來搵新鋪希望可以以更好嘅面貌同大家見面，Fans記得留意啦。
京都過江龍班戟 雪ノ下
結業日期：4月4日
圖：emmi
嚟自日本京都嘅甜品店，主打厚燒班戟同刨冰，前者足4cm厚，用廣島雞蛋同霧島牛奶製作即叫就即製，口感濕潤扎實。後者用日本低鈣同低鎂離子含量嘅天然軟水加原材料製作，冰粒細細碎碎入口即溶。
旺角新派特色菜 街坊CAFÉ
結業日期：3月31日
圖：開咗3年嘅呢間餐廳，將香港特色融入各款菜式中，例如經典街頭小食雞蛋仔咁，就用嚟拌雪糕。最後呢幾日，晚巿仲有75分鐘嘅日式石燒自助放題，可以食到石燒牛之餘，仲有得任飲任食湯、沙律、串燒意粉、甜品等。不過業主要加租喇，佢哋決定唔再續約嚕。
萬花筒主題餐廳 漫花燈火
結業日期：3月31日
圖：呢間開咗短短唔夠一年，以萬花筒為主題嘅餐廳都宣佈結業啦！餐廳設計以各種顏色、不同花朵、切角鏡面為主題，令顧客仿如置身於萬花筒的繽紛世界內。唔單止裝潢，連食物同餐具都好值得打卡，吸引唔少人慕名而去。咁有心思嘅餐廳，要結業真係好可惜。
中環健康素食店 MANA! Fast Slow Food
結業日期：3月27日
呢間素食店嘅門面十分有feel，一向都有唔少人鍾意喺呢度打卡，主打沙律同flat bread，配料選擇相當豐富，超過30款，好似酸瓜、甘藍、水波蛋等，令中環嘅打工仔多一個健康嘅選擇。
文：Kar、Cathy、Yanica