話明係旗艦店，即係應該食物款式係最多嘅，由輕食嘅頭盤、意粉、薄餅、窩夫到行健康路線嘅超級乳酪樽同果汁都有。
首推嘅一定係呢間舖獨有嘅「墨西哥烤原條粟米」，total有成6種口味咁多，斯文啲嘅可以用刀批落嚟食，而率性啲嘅成條拎住嚟食都唔會畀人歧視嘅，應該。其中傳統墨西哥嗰隻，搽滿蛋黃醬再加搭芝士，焗完出嚟灑埋墨西哥辣椒粉，不過唔使驚唔會好辣嘅，反而芝士味更出。
而滿記點會少得榴槤吖？榴槤芝士烤粟米就用金枕頭榴槤肉溝埋吉士芝士醬、Mozzarella芝士嚟整，榴槤味都頗重下，開飯仔食嗰條，仲見到有好大嚿榴槤果肉添呀！不得不提嘅係甜甜der朱古力棉花糖烤粟米！成條粟米都搽晒Nutella，咁都未夠邪惡，仲要喺面頭舖滿晒一粒粒棉花糖！烤完出嚟全部半溶狀態，甜魔會流晒口水，不過都可能因為咁，粟米味反而有少少被掩蓋咗。
煙三文魚雞蛋芝士窩夫嘅窩夫呢係自製嘅，皮脆而軟身，上面有煙三文魚同沙律火箭菜，佢嘅賣點係在於一早已經混入咗喺窩夫中間嘅雞蛋，一切就有蛋黃汁流出嚟，成個窩夫嘅蛋味都幾香。
最後，介紹返款健康啲嘅菜式過你哋啦，烤羅馬生菜凱撒沙律。就咁聽好似冇乜特別，但見到佢上碟個樣就知道又係玩味之作。生菜原棵上，用Mozzarella芝士焗過下嘅，另外有多幾兜醬料同食材：脆香煙肉、Parmesan 芝士、麵包方脆同自家製凱撒沙律醬。自己想要幾多料就加幾多，再撈勻就食得。
詳情
HONEYMOON DESSERT de avenue
地址：銅鑼灣軒尼詩道500號希慎廣場317-319號舖
文：Kar
隨時接收最新資訊
讚好OpenRice專頁！