行過西環卑路乍街大街，可能諗都無諗過海都樓地下一條隱蔽嘅小巷內會藏有一間格格不入嘅美式熱狗店。餐廳由曾任職飲食業嘅Joe及其拍擋、從外國回流嘅Bibiana開設，佢哋表示選擇呢個舖位雖然有挑戰性，但就係鍾意佢夠隱蔽，而且樓底高，內部同外面嘅視野對比好大，能夠營造外國好流行Hidden Bar嘅感覺，畀一個空間客人去放鬆。至於點解想開設一間熱狗店，因為佢哋都認為香港熱狗店好多，但仍未有一間印象特別深刻嘅，所以就希望自己可以開一間客人會回頭嘅熱狗店。
店舖選材方面已經好有誠意，講到熱狗最重要當然係麵包同條腸。特意選用天然腸衣製成嘅腸，肉味會濃啲，無一般加工腸咁彈性。麵包方面都有嘗試過好多種，最後揀咗兩款基本嘅Hot Dog Bun，鬆軟得嚟有彈性，而且就算遇上汁醬質感都唔會變腍。兩位負責人嘅煮食偏好都唔同，Bibiana比較偏向西式口味，而Joe就鍾意Asian fusion style，所以menu絕對令客人有驚喜。
Numb Cheeks 四川麻婆豆腐（$68/S、$98/L）
愛爾蘭三十日熟成牛肉腸配上麻婆豆腐醬汁。坊間重汁醬嘅熱狗不外乎茄汁、肉醬或辣醬，但原來麻婆豆腐加入熱狗一樣咁夾。Joe以自家製嘅麻婆豆腐汁取替咗芥末同茄汁，醬汁加入花椒及豆瓣醬炒香後加入番茄同煮，番茄嘅酸味同辣味好和階，絕對係驚喜之作。
HOT MESS（$68/S、$98/L）
呢款HOT MESS熱狗口味就偏向西式啲，選用煙肉包蘋果豬肉腸，面層再加入辣椒仔、墨西哥辣椒汁及洋蔥，味道酸酸辣辣，連辣味都有層次感，最後加返乳酪醬中和返個辣味。
BIG BIRD（$68/S、$98/L）
食咁多熱狗腸，吉列香腸你又食過未？Bibiana將雞肉腸炸香後，加入特製醬汁、蘋果粒、大蒜、大、煙肉 、肉桂及蜜糖等食材，味道比較rich但又唔會太膩。
更多【新店直擊】： |
OooeY Gooey（$68/S、$98/L）
芝士控唔可以錯過！加入五款芝士包括法國Camembert、英國車打及mozzarella等，醬汁係自家製嘅洋蔥醬，用紅酒、牛油及香草製成，咁樣味道就唔會太heavy，可以享受返腸本身嘅味道，同時感受到芝士奶香及紅酒汁酸甜味道。
Magic Wings（$78/5 pcs）
地址: 西環卑路乍街7-11號海都樓地下29號舖
文、相: Yanica