【國際新食力】機會嚟喇，飛雲！台灣餐廳指定搭枱識異性！

平時出街食飯，如果聽到話要搭枱，可能有好多人都會耍手擰頭，寧願等耐啲都希望有多少少屬於自己嘅空間。不過，台灣上個月就開咗間「搭枱專門店」。說穿了其實係以搭枱為名，speed dating為實嘅餐廳。

呢間餐廳就咁睇落，同普通日本餐廳冇分別，都係一間間房隔開每張枱，又提供海鮮迷你丼飯等等嘅日式美食，仲有張吧枱放咗啲輕食、無限添飲嘅飲料，同埋層層疊之類嘅小遊戲，你可以話佢係一間有café style嘅日式居酒屋。的確，喺店內男女人數唔平均嗰陣，佢係一間普通居酒屋，但如果有足夠男女人客嘅話，佢就變成硬性規定搭枱屋喇，即係一定要同異性搭枱。

餐廳嘅宗旨，就係希望可以做個媒人，幫各位單身男女搵返個伴。透過食下飯、（焗住）吹下水、玩下game咁輕輕鬆鬆鄧梓峰之後，就算做唔成情侶，識多個朋友仔都好吖。放心，唔係one on one嘅，餐廳都知大家會怕醜，所以有規定一定要兩個或以上嘅同性朋友先至可以入去食（係同性留意返，情侶同兩公婆不得入內放閃！），如果你咁進取想單挑嘅，sorry喇。至於入到去同邊個搭枱，再一次sorry喇，你係冇得揀嘅，緣分由餐廳註定㗎！不過如果搭落唔啱嘅，都可以隨時走嘅。BTW，最重要嘅資訊係，囡囡（係，只限囡囡！）如果只係食吧枱輕食同嘢飲，免費！！！

今次仲唔係機會嚟喇，飛雲？我即刻想飛台灣一轉呀！

詳情：
恋活居酒屋
地址：台北市中山區中山北路一段57號
電話：（02）2541ｰ1121
營業時間：18:00-23:00
來源：戀活居酒屋

文：Kar

隨時接收最新資訊
讚好OpenRice專頁！