禽日喺我同BB既2周年紀念, BB 喺個幾月前, 就巳經book咗台慶祝, 禽日懷住興奮心情去食飯:

我地book咗7點半, 但我地大約7點10分巳經到咗, 我地就坐喺2樓既細枱, 一坐低, 侍應們就將個手寫menu放喺台面, 但...佢寫既字, 好有藝術氣質, 唔知佢寫咩..., 我地唯有睇番原本果份. 今日既set dinner, 其實唔係好啱我地食(羊膝, 燒春雞捲大蝦同埋帶子酥盒), 我其實target係食蠔同牛扒, 但又孤寒唔想散叫, 所以有少少手忙腳亂...最終我地叫咗:

2份set dinner, 每個set dinner HKD320, 龍蝦再加HKD90 (1個係蒸龍蝦, 1個係燒春雞捲大蝦), 轉龍蝦加多100蚊左右

先嚟2支Corona, 因為天氣太熱, 啤酒夠凍 (每支42蚊)

一開始嚟咗半打生蠔(每個set dinner 包3隻)
係新西蘭既, 唔記得叫咩名, 好新鮮好肥美, 好重海水味, 正

之後到面包, 佢跟d黑醋, 無咩特別...一般

跟住係洋蔥湯
呢個好好味, 個洋蔥好淋, 好入味, 佢個湯應該加咗少少芝士落去, 所以好滑, 惦

輪到main course 出場
個龍蝦好新鮮, 好多膏, d肉好爽, v good, 有點意料之外, 加埋佢比個蒜容汁...無得頂oY
燒春雞捲大蝦, 呢個反而麻麻地, d雞肉幾孩吓, 可能我地先食龍蝦, 相比之下覺得係失色咗, 個汁係波菜煮既...咸咗少少.

甜品我地要咗朱古力慕思, 好香, 好滑, 覺得朱古力好淳

最尾係跟咗2杯餐茶, 要凍檸茶, ok la.

服務我就覺得非常唔錯, 侍應們有禮, 又主動, 幫你影相之餘, 又有耐性, 到最尾埋單, 我地同個經理反映, 個雞好孩, 佢係咁say sorry, 話會同廚師提番. 有誠意 !

價錢好合理, 食完後, 我認為係值得既, 我諗我會再嚟, 我好想試吓佢地既牛扒!

埋單總共: 895個大洋!

禽晚位置係尖沙咀,而bb心情唔好,我好想同佢去一笪坐得舒服少少既地方抖吓,傾吓計,我又為食想食越南嘢,諗咗一陣就嚟呢度.
大約7點半嚟到,等咗5分鐘左右有位,一坐低待應們都禮貌咁奉上餐牌,叫咗:
特級牛肉湯河粉(65蚊):碗嘢嚟到,賣相唔錯,牛肉係半生熟,飲啖湯,覺得有少少淡,應該係預d客加魚露,但都幾鮮甜,河粉好滑,牛肉唔un,有牛肉味,唔錯,幾好味!

牛油鷄翼(50蚊):一上台,好香好熱,食落口有少少油,但都可以,ok

蒜蓉牛油原隻長臂蝦(115蚊):嚟到賣相好靚,有生果陪礏,隻蝦唔係話好大隻,但都係意料之內,先食個蝦頭,好多膏,好香好好味,而蝦身都好爽,連埋d炸蒜蓉,好味道!

自製三球雪糕(蜜糖脆,朱古力,士多啤梨-45蚊):蜜糖脆最好味,朱古力同士多啤梨都唔錯,好濃好滑,good!

嚟呢到食嘢,我預咗價錢係偏高,但今次我覺得物有所值,收咗你錢,同樣咁比到嘢你食,或者係我地今次叫既嘢啱咗.

另外,環境同服務同唔錯,侍應態度勤快有禮,但人手略嫌不足,唯獨門口接待姐姐有少少呆.

食一餐飯,有幾樣重要因素:人物,食物質素,環境同氣紛,今餐飯齊晒,好滿意,最緊要係食完餐飯,bb開心番d,舒服咗.

幾日前開始,不斷嘈住要食生蝦同飲冬陰公湯,睇完OR食評,又咁啱出銅鑼灣,跟住星期六就同bb嚟呢度食,一嘗心願!可能我地坐低都係7點,時間尚早,d餸嚟得好快,同服務唔錯,我地叫咗:

生蝦(68蚊):有成12隻,d蝦好肥同好新鮮,夾埋d辣椒同蒜頭點落d醬汁,勁好味呀,蝦又爽又彈牙,good!

冬陰公(45蚊-細):有一小鍋,有2隻蝦,磨菇同蕃茄仔,小小咸,但都幾好味,2個人好夠飲

馬拉棧炒通菜(38蚊),呢個都唔錯,味偏濃,但多咗少少油

蝦醬炒飯(38蚊):炒得幾乾身,有臘腸,肉鬆同蛋喺面,唔太濃味,幾好食,但bb就嫌佢唔夠味,我就覺得ok

青檸梳打(12蚊):算抵,幾大杯,但飲到底,覺得好甜吓,要溝淡少少先得.

埋單201,我覺得好ok,後尾計番,佢地無加一,同埋服務唔錯,亞姐快手快腳,會encore,下次會試吓附近間泰成,邊間好味d!

今次酒店住係十六蒲, 住宿係連埋早餐buffet, 第二朝瞓醒, 落去食早餐, 其實之前果日食得太多, 都滯滯地, 諗住飲杯架啡多士就算啦, 點知...一去到餐廳門口, 嘩 正呀...

我地坐室外, 係泳池隔離, 感覺好輕鬆寫意

無諗過朝早食buffet, 有煙三文魚, 同埋凍既魚頪供應, 仲要係好味喎, 跟住行多個轉, 有中式點心: 菜苗餃, 干蒸牛肉, 皮蛋瘦肉粥, 另外一邊, 有粟米片呀, 麵包呀, 水果....好豐富, 轉過去水吧過邊, 仲有過廚師即煎奄列, 煎蛋....其實仲有好多好多(雞肉腸, 焗豆, 乳酪, 炒蛋, 薯餅 .....) 淨係望, 都夠皮.

因為實在太多, 唔能夠全部描述, 我只係講重點好味既嘢.

即煎奄列 : 熱辣辣, 有磨菇, 青椒... 半生熟, 好好味.
菜苗餃 : 味道清新, 蝦肉爽脆 好味過好多大酒樓
乳酪 : 偏酸, 士多啤梨味好好味, 有果肉,
牛角酥 : 好味過你係taste買果啲. 又香又鬆脆
炒蛋 : 好滑, 好軟好香.
煙肉 : 香得嚟, 無肥膩感覺

最後既架啡, 同waitier order既, 好香濃, 佢成壺放低比我地...

呢一餐係我今次澳門之旅, 最滿意既一餐.

一定會再encore ~

我的評分 : 90分

劉森記, 食過好多次, 蝦子撈必食之選, 通常都會+水餃,牛栢葉或者豬手,最好嘢係... 樣樣都覺得好味, 仲有佢地跟面個湯, 你都飲到陣蝦子味, 亞姐服務有禮!

唯獨係環境一般, 天氣炎熱, 行住冷氣都食到身水身汗, 但總括嚟講, 值得一試!

平時都食過好多次,味道都唔錯!

星期六,放工後去食,下午茶由2點開始,一碗一餸米線+2隻雞翼,送豆漿,20蚊真係抵都爛.

好在佢唔係因為下午茶而行工減?,味道一樣出色,最鐘意佢既炸醬同豬潤,好好味,湯底呢...唔麻,辣味偏重,亞姐服務都唔錯,唔該前唔該後,好過附近間譚仔,d亞姐塊面黑過包公,十問九唔應!

唯讀是星期六既下午茶太多人,服務有d亂,少少失準,但仍然值得嚟呢度試吓!

Lunch行過嚟食,2個人叫咗:豬蹄肉+鎮江骨上海面,同事叫咗鎮江骨薯粉

豬蹄肉鎮江骨上海面: ($30,賣相一流,鎮江骨酸酸地好味,豬蹄肉好爽,個面就有少少硬,加埋酸菜一起食,正)

鎮江骨薯粉: ($25,薯粉入口好滑,幾清涼,唔錯)

2杯飲品,凍檸茶同熱檸水都ok,無話酸到眼朦.

最重要係,食完唔會覺得口渴,呢樣嘢非常好,價錢又唔貴,亞姐服務都有禮貌,ok,推薦!

星期六, 同BB去嘉亨灣探朋友, 我又好少機會去港島東區, 之前上嚟睇到openrice食評大讚, 所以諗都唔諗嚟咗呢度.

下午2點3嚟度, 巳經有一堆人排緊隊, 排到去隔離廟, 不過好快都有得食, 叫咗:
牛根魚蛋河 : 牛根好淋, 魚蛋好味道, 好有魚味, 惦!
片頭切腩撈粗 : 魚片好香口, 切腩好入味, 撈粗既咸咗少少...唔錯
菜心一碟 : 一般料
凍檸茶少甜 : 呢個有驚喜喎, 好香茶味, 好飲喎!

間嘢真係好旺, 伙計哥哥個樣惡惡地, 但全部都好醒目, 手快腳快, 地方環境就真係係一般, 冷氣唔夠係一大敗筆!

推薦~~

呢餐承惠 : 71個大洋

同朋友B食完嘢, 就行咗嚟呢度飲嘢啦, 一坐低都係7點鬆少少, 仲係happy hour, 價錢會抵好多.

叫咗2杯"好加頓", 容易入口得嚟, 又香麥味, 朋友大讚good,
之後叫1杯 "coors light" waitress姐姐介紹, 試吓無妨, 可惜真係淡得個鳥來, 好似飲水咁, 唔多惦
之後嚟多杯"波定頓", 好creamy, 另一種啤酒, 我就覺得飲完好漏, just so so.

最驚喜係佢地d嘢食, 好好味喎! 要咗個炸薯格, 唔會好多油, 但炸得金黃, 正呀! 見到隔離台叫pizza, 個樣好靚, 係薄底果隻, 可惜我地2個都好飽, 如果唔係...我諗一定一件不留.

服務水準就一般. 但好喜歡佢呢度, 無nuts, 無加一, 只係每次嗌嘢每次收錢(即係要比少少貼士), 飲杯啤酒都係廿靚蚊, 仲有...呢度係吸煙區, 啱晒吸煙人仕, 咁既環境, 咁既價錢, 係旺區...去邊度揾

是晚駛費: 160個大洋

推薦~

星期六的晚飯, 友人從嘉亨灣駕車前往, 10分左右. 一行四人

一坐低, 叫咗個4人餐 (488)
椒鹽蝦 ( 唔記得個名), : OK la
清蒸鮑魚仔 8 隻 : 都可以, 幾好味
胡椒豬肚湯 : 好多料, 飲到底有好多胡椒粒, 不過個湯就無咩胡椒味
滷水鵝併盤 : 呢個最好味, 鵝入味又鬆, 豬耳仔好爽, 喺底既豆腐都好滑
菠蘿咕嚕骨 : 個骨炸得好脆, 個汁都唔錯
西蘭花扒鮑魚菇 : 麻麻地, 鮑魚菇有d un
另加3碗:
紅燒潮洲翅 : 呢個好足料, 杰杰地, 好味道!

服務都唔錯, 侍應們都殷勤服務! 有機會, 再嚟!

友人請客, 所以唔知幾多錢!!! 多謝晒